مع السيّد فتّش عالخازوق… المخرج والكاتب يوسف ي. الخوري/19 نيسان/2021
من سني وشهرين، وكان بعدا الثورة شادي طلوع، عْمِلِت محاضرا ببيت الأحرار المركزي ركّزت فيها عَ إنّو الانتخابات المبكّرة هيي أكبر فخ للثورة، وأكّدت إنّو نتيجتها رح بتكون 128 – صفر لصالح المنظومي الحاكمي، مش لأنّو الشعب ما بدّو يغيّر، ولكن لأنّو الانتخابات مش بس تجميع صوات، إنّما كمان القانون إلو تأثير ودور، والتنظيم بيلعب دور، وأدّيش البنوكي بتحرّرلك فلوس تَ تستخدمها بالإنتخابات بيلعب دور! وبما إنّو أحزاب المنظومي هيّي اللي مخترعا القانون الحالي وهيّي اللي بتعرف تلعب عليه وتلعب فيه – بلا معنى -، وبما إنّو هالأحزاب منظّمي، وقادرا تأمّن فلوس بعكس الثوار اللي نقرطت فلوسن بالبنوكي، فكفّتها مرجّحة تربح وبدون مبالغة 128 – صفر.
هلّأ بفهم إنّو القوّات صارت عم تطالب بالإنتخابات المبكّرة، وعَ نفس القانون المسخ، ميشان تحسم المعركي مع التيّار المشرقي. والكتائب بدها تسرّع الانتخابات وكمان عَ نفس القانون، لأن نوّابها صاروا برّات المجلس والفرصة مناسبي يسترجعوا شوي من ألقهن اللي بَهَت. وبعض الثوار بدّن الانتخابات، يا قاتل يا مقتول، لأن هودي هنّي يلّي عنجد ركبوا عالثورة تا يعملوا نوّاب، وهيدا حقّن مع إنّو بشفق عليهن. كل هيدي الحسابات بتبقى حسابات خاصة، والنتيجة رح تبقى هيّي ذاتها، والتغيير من جوّا مع حزب الله هرطقة حتّى لو حصّلوا المتحمّسين عالإنتخابات الـ 128 مقعد بالمجلس.
هيدا كلّو مش مهم… قد ما يصرخوا الشبيبي، انتخابات مبكّرة أفيش، بالسلميّي ودستوريًا أفيش (راجع المادة 65 من الدستور، بتفهم)، في بس انتخابات بإحتلال المجلس وشَحط النواب عالحبوسي، وهاي كمان منها أفيش… بس لمّا جميل السيّد، يلي معتبر الثوار حئُن “سندويشي”، بيقترح للخروج من الأزمي حلّ المجلس النيابي وإجراء انتخابات مبكّرة متل ما بدّن الثوّار، فهالشي بيأكّد إنّي على حقّ، وبيأكّد إنّو الانتخابات النيابيّي ما رح تكون لا لصالح الثورة، ولا لصالح الأحزاب المسيحيّي اللي عم تطالب فيها، خصوصي إنّو مع جميل السيّد بدّك تنتبه كيف عم يتركّب الخازوق، وبدّك ما تِركَب عالخازوق تَ ما يركَب لبنان عَ الخازوق… الفيديو المُرفق 3 دقايق عَ بَعضو وبيوضّح منيح الصورة…أضغط هنا لمشاهدة الفيديو
