جورج يونس/منتهية … زمن الأقزام، زمن الأوباش، وزمن أشباه الرجال 

منتهية … زمن الأقزام، زمن الأوباش، وزمن أشباه الرجال 
جورج يونس/فايسبوك/12 آب/2026

هيك هيك نحنا نازلين تنازلات… وهيك هيك اللي عنا عم يبيعوا ويشتروا ع حسابنا، ليكدّسوا ثرواتن فوق أنقاض وجعنا.
وهيك هيك… راحت أيّام رجال الدولة اللي كان الانتماء عندن عقيدة، والوطنية موقف، والصلابة قرار، والكرامة خطّ أحمر.
وراحت أيّام الرجال اللي كان ينحسبلهم حساب بكل دول العالم.
وراحت أيّام كان في رجال بيشبهوا الوطن، مش وطن بيتفصّل على قياسهم.
يلا كتروا البلطجية… وسلّموهم كل شي!
سلّموهم نيابة الرئاسة.
سلّموهم وزارة الدفاع.
سلّموهم حاكمية مصرف لبنان.
سلّموهم إدارة المرفأ.
سلّموهم نيابة رئاسة المجلس.
سلّموهم أمن مطار بيروت.
سلموهم قيادة الجيش.
سلّموهم الرئاسة.
وسلّموهم، فوق كل هيدا، رقابنا ودم ولادنا…
سلّموهم حجارة ديارنا المقدّسة.
سلّموهم التماثيل اللي عم تزرعوها بكل زاوية من هالوطن، بوقت شبابنا عم تهاجر، وكأن الإيمان معكن صار حجر، وصورة، وصفقة، وعملةً خضرا.
سلّموهم قمر مشغرة، وتلال حريصا، وهياكل بعلبك.
سلّموهم رفات شهدائنا.
سلّموهم جامعاتنا، ومستشفياتنا، ومدارسنا.
سلّموهم إعلامنا، ومصارفنا، وذاكرتنا.
سلّموهم خَبْرية جبال الصوّان.
سلّموهم دموعنا… وحنيننا للبنان اللي بيشبهنا.
سلّموهم عدالتنا، وشرشف العفاف اللي صار يغطي عوراتكم.
سلّموهم ماضينا اللي ضيّعتوه، وحاضر إفلاسنا اللي ورّثتونا ياه.
سلّموهم كل شعاراتكم…
هيدي الشعارات اللي صارت فارغة من معناها، مثل وعودكم، مثل مواقفكم، ومثل كل شي كنّا نصدّق إنّه باقٍ فيكم.
وسلّموهم آخر ذرّة كرامة بعدها عايشة بقلب حدا منّا.
لأنّكم، بكل بساطة، ما خُلِقتوا على مقاس هالوطن.
ما بتجاوروا صلابة جباله.
ما بتلامسوا طهر قدّيسيه.
ولا بتقاربوا فكر نوابغه.
وإذا كان بدنا نفتّش عندكم عن شَبَه الرجولة، ما منلاقي إلّا الانبطاح والاستسلام… والجدال اللي ما عندو أفق.
سلّموهم كل شي!
بركي بهالطريقة بينتهي حلم لبنان الرسالة.
بركي بيتحوّل كل الوطن لجنوبٍ منكوب ومنصير كلنا نازحين.
بركي منكتب بإيدينا آخر سطر بحكاية طائر الفينيق.
وبركي بيكمّل التاريخ يلعنكم، لوقت ما ينحفر اسم كل واحد منكم بجمر جهنّم، وعَ حدود لعنة الساعة اللي عرفناكم فيها.
وضلّكم تذكّروا…
التاريخ ما بينسى.
يمكن يسكت.
يمكن يتأخّر.
يمكن يترككم فترة طويلة تفرحوا بانتصاراتكم الصغيرة فوق ركامنا…
بس التاريخ، بالنهاية، بيحفظ الأسماء.
وبيحفظ مين خان، ومين باع، ومين سكت، ومين انبطح.
وساعتها، ما رح تنفعكم لا المناصب، ولا الصور، ولا التماثيل، ولا المباخر، ولا الخطب، ولا كل شعارات الإيمان اللي لبستوها فوق عورات السياسة.
رح يبقى الوطن شاهدًا…
والتاريخ شاهدًا…
والناس شاهدة…
على زمنٍ صار فيه الأقزام يقرّروا مصير وطنٍ أكبر من مقاساتهم.
جورج يونس
زمن الأقزام زمن الأوباش زمن أشباه الرجال