رابط فيديو ونص مقابلة مهمة للغاية مع الإعلامي السيادي الشاب وسيم جانبين يحلل من خلالها بأسلوب شجاع، مباشر، علمي، دستوري، وطني وتاريخي كذبة المقاومة، ويؤكد فشل الحكم اللبناني، اعتبار الطبقة السياسية هي العدو وليس إسرائيل، التوجه إلى خيار السلام مع إسرائيل الصديقة، التخلص من هرطقة مقولة الدولتين وفصل لبنان عن القضية الفلسطينية

رابط فيديو ونص مقابلة مهمة للغاية مع الإعلامي السياسي السيادي الشاب وسيم جانبين يحلل من خلالها بأسلوب شجاع، مباشر، علمي، دستوري، وطني وتاريخي كذبة المقاومة، ويؤكد فشل الحكم اللبناني، اعتبار الطبقة السياسية هي العدو وليس إسرائيل، التوجه إلى خيار السلام مع إسرائيل الصديقة، التخلص من هرطقة مقولة الدولتين وفصل لبنان عن القضية الفلسطينية

أجرى المقابلة الإعلامي محسن حجازي من موقع السياسة على اليوتيوب/30 أيلول/2026
ملاحظة/تم تفريغ المقابلة ونص صياغتها بكل مفرداتها ومقدمتها وجدول عناوينها والخلاصة بواسطة الياس بجاني بحرية تامة 

مقدمة
في هذه الحلقة يستضيف برنامج فايرل الصحافي والناشط السيادي وسيم جانبين للحديث عن زيارة رئيس الحكومة نواف سلام إلى الولايات المتحدة ولقائه وزير الخارجية الأمريكي ماركو روبيو، وما طُرح حول مفهوم “التنفيذ المتوازي” وجدول انسحاب إسرائيل مقابل حصر سلاح حزب الله.السيد جانبين يعتبر أن الأزمة الأساسية هي فقدان الثقة الدولية بلبنان بسبب عدم تنفيذ القرارات المتراكمة منذ اتفاق الطائف حتى اليوم، ويطرح موقفاً صادماً بضرورة تحديد لبنان لموقفه النهائي من إسرائيل، والانتقال من شعار “حل الدولتين” والعداء الدائم إلى خيار السلام وبناء الدولة.

جدول العناوين

1. التنفيذ المتوازي وجدول سحب السلاح

2. تراكم عدم التنفيذ من الطائف إلى القرار 1701 واتفاق نبيه بري

3. تناقض خطاب جنوب وشمال الليطاني

4. أزمة الثقة مع المجتمع الدولي ودعم الجيش اللبناني

5. تصنيف حزب الله كميليشيا خارجة عن القانون

6. هل تريد إسرائيل حرباً أهلية في لبنان؟

7. ضرورة تحديد الموقف العربي واللبناني من وجود إسرائيل

8. ثقافة الاقتتال والموروثات الوهمية في المجتمعات العربية

9. قانون مقاطعة إسرائيل والتناقض في التفاوض غير المباشر

10. العدو الحقيقي: المنظومة السياسية الفاسدة

11. من يجلب القتل إلى لبنان؟ – رواية المقبرة والجامع

12. استهداف المدنيين والمستشفيات وكيفية محاسبة إسرائيل

13. مستقبل المنطقة: هل نحن أمام حرب قريبة ودور نتنياهو وإيران؟

نص المقابلة – سؤال وجواب

الإعلامي محسن حجازي: أرحب بكم متابعي منصة السياسة بحلقة جديدة من برنامج فايرل، يسرني أن أستضيف معي في هذه الحلقة الصحافي وسيم جانبين، أهلا وسهلا فيك أستاذ وسيم.

وسيم جانبين: أهلا وسهلا، شكراً على الاستضافة.
الإعلامي محسن حجازي: الجميع في لبنان ينتظر عودة الرئيس نواف سلام من الولايات المتحدة الأمريكية لمعرفة ما الذي دار بينه وبين المجموعة الأمريكية التي اجتمع بها وعلى رأسهم وزير خارجية الولايات المتحدة ماركو روبيو. الرئيس سلام سيطلع مجلس الوزراء غداً في الجلسة على ما تم تداوله في أمريكا. بحسب المعطيات حتى هذه اللحظة هناك مفهوم جديد دخل إلى الساحة: “التنفيذ المتوازي”. لا نعرف الكثير عنه بعده. هل حضرتك ممكن تعطينا معلومات عن هذا الموضوع؟ وهو يعني تم الاقتراح أن يقابل انسحاب إسرائيل من منطقة في جنوب الليطاني بالمقابل إخلاء منطقة مماثلة شمال الليطاني من سلاح الحزب؟ يعني كأنه رحنا على خطوة بخطوة ولكن إسرائيل تخلي منطقة جنوب الليطاني والجيش اللبناني يحصر السلاح في منطقة شمال؟ هل هذا ما تم الاتفاق عليه بحسب معلوماتك؟

وسيم جانبين: بكل بساطة كان الكلام اللي عرفنا فيه، إنه الرئيس سلام طلب بجدول زمني للانسحاب الإسرائيلي. كان الرد بسيط جداً: “تكرم عينك، خلينا نشوف جدول زمني لسحب السلاح تبعكم بالأول”.
وهذا يعود إلى تراكمات عشرات سنين لورا. ما عاد في ثقة. قلناها وعم نعيدها دائماً، لبنان مش عم بيقدر يفهم إنه ما في ثقة فيكم. انسى القديم، نحن من 2023 لهلا، شو عملنا بسحب السلاح، بنزع السلاح، بتطبيق القرار 1701؟ الحرب من 8 أكتوبر، من اتفاق نبيه بري، من الاتفاق اللي صنعه نبيه بري، نحن شو عملنا هلا لهلا لغاية هاللحظة؟ شو أثبتنا للمجتمع الدولي ولإسرائيل العدوة إنه نحن ماشيين باتجاه نزع السلاح؟
نحن عملنا الاتفاق وصرنا نلعب على الاتفاق، صرنا بدنا نطلع نصرح لشعوبنا ولبيئتنا إنه لا نحن شمال الليطاني. لك خيي أصلاً انت كيف بتقبل تصرح هذا التصريح إنك انت جنوب الليطاني؟ إذا بتعتبر إسرائيل عدوة كيف بتقبل إنه إسرائيل تفرض عليك نزع سلاح جنوب الليطاني بالمكان اللي انت قادر تهددها فيه، وشمال الليطاني اللي بتهدد فيه اللبنانيين تحتفظ بسلاحك؟ يعني في تناقض بالأمور.
إذا رجعنا لقبل، من 89 من اتفاق الطائف. اتفاق الطائف شدد على نزع سلاح الميليشيات وخروج القوات الأجنبية من لبنان. إجينا على عام 89، لم يُنزع السلاح. إجينا على عام 2000، تطبيق القرار 425، نفذت إسرائيل الجزء الخاص فيها بالتزاماتها وانسحبت من لبنان. وقلنا دحرنا إسرائيل، انتصرنا بالـ 2000 وهي رجعت لورا. طيب ما نزعتوا سلاح حزب الله. أنتم كلبنان رسمي كنتم اغتنموا هيدي الفرصة وانزعوا السلاح بوقتها.
إجا عام 2004 القرار 1559، لم ينفذ بند نزع السلاح. انسحبت سوريا بناءً لاتفاق الطائف وانسحاب القوات الأجنبية من الأراضي اللبنانية مقابل نزع سلاح الميليشيات. انسحب الجيش السوري من لبنان والسياديين طبعاً طلعوا هن اللي طردوا الجيش السوري من لبنان. أوكي طردتوا الجيش السوري، أكملوا وانزعوا سلاح حزب الله. لا، بل تحاصصتم مع حزب الله واتفقتم معه ورجعتوا عملتوا محاصصات طائفية معه وسلاحه ظل موجود، احتفظ بسلاحه واحتفظتوا بصفقاتكم.
بهذه المنظومة بعدها مستمرة. بالـ 2006 القرار 1701، هل طُبق؟ يلي هو من أهم بنوده نزع سلاح الميليشيات على كافة الأراضي اللبنانية. إجينا على اتفاق نبيه بري الأخير، نزع سلاح الميليشيات اللي ذُكر فيه سبع مرات بالاتفاق على كافة الأراضي اللبنانية، وطلعوا يقولوا لك نواب حزب الله لا جنوب الليطاني. خيي مذكور بالاتفاق كافة الأراضي اللبنانية، لا جنوب الليطاني، وأقنعوا بيئتهم وبعدهم مصرّين. وصلت إسرائيل على النبطية وبعدهم عم يحكوا على جنوب الليطاني.

الإعلامي محسن حجازي: هل نزعتم السلاح خلال هيدي المرحلة؟ هيدي المرحلة الأصعب اللي مرق فيها لبنان واللي تعرض فيها لتهديد إسرائيلي مباشر بقصف كافة الأراضي اللبنانية.
وسيم جانبين: وما في تصريح بيطلع فيه الإسرائيلي إلا بيقول من الأسبوع الماضي قالوا: لن تتوقف إسرائيل حتى نزع سلاح حزب الله على كافة الأراضي اللبنانية. يعني هن مصرّين على كافة الأراضي اللبنانية وبعدنا نحن عم نحكي بجنوب وشمال الليطاني.
هلا اليوم بكل الأحوال انتهى جنوب الليطاني. انتهى جنوب الليطاني من ناحية نزع السلاح منه. أنا قصدي انت الدولة اللبنانية شو قدمتي لحتى تكسبي الوزير روبيو والولايات المتحدة والضامن الأمريكي؟ انت يا دولة الرئيس سلام عم بتقول بدك جدول زمني لحتى ينسحب الإسرائيلي من الجنوب، خيي انت شو قدمت للإسرائيلي؟ مش عم نقول خدمة للإسرائيلي، خدوم هالشعب، ارحموا الناس، ارحموا العالم المهجرة، ارحموا الاقتصاد، ارحموا البنى التحتية اللي تهدمت، بـ 100 ألف منزل متهدم بالجنوب. انتم شو قدمتوا؟ شو عملتوا انتم باتجاه غير بتقولوا بدنا دعم للجيش اللبناني وهلا مؤتمر فرنسا رايحين عم تطلبوا دعم للجيش اللبناني مقابل تثبيت قواعد الجيش ونزع سلاح الميليشيات، وبنفس الوقت بتقولوا إنه الجيش اللبناني ما بيقدر ينزع سلاح لأنه قد نسبب بحرب أهلية طاحنة بلبنان؟ يا خيي شو هالتناقض هيدا اللي عايشين فيه؟ كيف بدها توثق فيكم المجتمعات الدولية؟ يعني انتم مفكرين إنه الناس برا، المراقبين الدوليين، الدول العظمى ما عم بتراقب تصريحاتكم؟
حسب مفهوم الدولة اللبنانية اليوم إسرائيل لم تتمكن خلال ثلاث سنين تقريباً، صرنا على أبواب ثلاث سنين، من نزع سلاح حزب الله. الدولة اللبنانية بدها تنزع السلاح بخلال أشهر؟ الدولة اللبنانية إذا نوت إنها تنزع السلاح، إذا عندهم النية والإرادة والعزيمة، أخذوا قرار ولكن لم ينفذوه مثل ما اتخذت قرارات من 89. بعدنا بنفس منظومة جمهورية نبيه بري من 89، بنمشي مع المجتمع الدولي على أساس عامل الوقت وبنستغل الظروف الإقليمية وبكرة إيران، بكرة ترامب بيفل، وبكرة اليمين المتطرف بيترك السلطة بإسرائيل بيجي غيرهم، إيران بتنتصر على العدو الإقليمي وممكن تتغير المعادلات داخل لبنان. ومش قادرين نحن كدولة ناخذ قرار.
نحن بعدنا متمسكين لهي اللحظة برددوا شعارات بلبنان، برددوا شعارات حل الدولتين. لك يا خيي انت شو إلك بحل الدولتين؟ انت حل سلاحك، نزع السلاح الفلسطيني عن الأراضي اللبنانية وما بدي منك شي. نحن متمسكين بالسقف العربي لحل الدولتين ونحن لن نذهب منفردين إلى السلام. وهذا اتفاق الإطار، دولة الرئيس سلام، اتفاق الإطار هو تفريط بسيادة لبنان. لك يا خيي انت فرطت بسيادة لبنان وقت ما عملت اتفاق سلام مع إسرائيل؟ وقت انت ما عم بتروح باتفاق مباشر للسلام مع إسرائيل عم بتفرط بسيادة لبنان؟ انت وقت سمحت لحزب الله يطلع يقاتل بسوريا فرطت بسيادة لبنان؟ وين السيادة بلبنان؟ أي سيادة محترمة بلبنان وقت طلع قاتل بسوريا بدون الرجوع إلى الدولة؟ هل كان هناك احترام للسيادة بلبنان؟ انت وقت حزب الله يعلن إنه فصيل إيراني، وقت يعلن إنه هو عم يدافع عن إيران وعم بيكون خط دفاع أول بقرب من الحدود الإسرائيلية، هل هذا احترام للسيادة؟
هذا الفصيل أخذت قرار انت بأنه خارج عن القانون، هل نفذت هذا القرار؟ الخارج عن القانون بتروح بتعتقله. نعيم قاسم لازم يكون معتقل هلا ومحطوط بالحبس. قياديين حزب الله اللي برددوا كلام الاعتداء على سيادة الدولة عبر الانتماء للمحور الإيراني وولاية الفقيه هو بحد ذاته جناية يجب أن يعاقبوا.

الإعلامي محسن حجازي: بالنتيجة خرج الشيخ نعيم قاسم وقدم للدولة اللبنانية طروحات قال لهم تفضلوا للحوار. خلينا نروح، لأول مرة الشيخ نعيم قاسم لربما يستخدم كلمة حصر السلاح وليس استراتيجية دفاعية وخطابه بالذكرى الثانية لاستشهاد الأمين العام لحزب الله. طيب هناك بديل يطرحه اليوم الشيخ نعيم قاسم وعم بيقول للدولة اللبنانية تراجعوا عن القرارات، قرار اعتبار حزب الله منظمة خارجة عن القانون، قرار التفاوض المباشر مع إسرائيل وتفضلوا نقعد على الطاولة. إذا انتم مش قادرين تنفذوا القرارات التي اتخذتموها بـ 5 آب ومن ثم بـ 2 أيلول خلينا نروح على خيار بديل. ألم يحن الوقت للدولة اللبنانية بالجلوس إلى الطاولة مع حزب الله للوصول إلى حل فعلي؟
وسيم جانبين: أكيد لا. حزب الله ميليشيا خارجة عن القانون، ميليشيا مصنفة، ما بتعامل معه. كيف ما قدرت أتعامل معه؟ أخذنا قرار نتعامل معه. انت دولة مش قادرة تمون على ضابط ما يحضر ذكرى اغتيال زعيم ميليشيا على أرضك، ضباط ينتمون إليها، ضباط بدولتك انت ما انك قادر تمون على هؤلاء الضباط لشو وجود هديه الدولة؟ كيف بدي اقعد فاوض أنا ميليشيا على الأرض؟ يعني انتم صنفتوها خارجة عن القانون وانتم عملتوا اتفاق إطار وانتم وافقتوا على 1701 وطلبتوا فيه وانتم وافقتوا على ترسيم الحدود وما بدكم تفاوضوا مع إسرائيل وبنفس الوقت بدكم تدعموا الجيش اللبناني ليثبت مواقعه وبنفس الوقت بدكم هذا الدعم الذي يأتي إلى الجيش أن لا ينفذ الجيش. يعني تناقض بتناقض بتناقض.
خيي انتم كيف عم تطالبوا بدعم للجيش لينفذ اتفاق 1701 وكيف بنفس الوقت بتقولوا إنه الجيش اللبناني لا يستطيع أن ينفذ الاتفاق بسبب احتمالية نشوب حرب أهلية ضخمة قد تمحي الوجود اللبناني؟ مش رح يصير حرب أهلية. طول عمرها الحرب الأهلية بلبنان ما بتصير من اللبنانيين نفسهم، بتصير بسبب الدعم الدولي لها. وهلا الدعم الدولي عم بقول لكم تفضلوا احصروا السلاح، ما رح نغذي فئة على فئة لتقتلوا بعضكم. مش من مصلحة إسرائيل.
إسرائيل وصلت لمرحلة، جربت خلال السنوات والعقود الماضية، جربت الفوضى بالدول العربية وهي أنشأت هذه الفوضى بالدول العربية ونحن ولا أسهل من إنه نتلقف الفوضى ونعيد فساد ببعضنا. جربت إسرائيل الفوضى بهذه الدول، لقت إنه الفوضى بالدول المحيطة فيها مش رح توصل على مطرح ولن تفضي إلى سلام مع هذه الدول. هي اعتبرت إنه هذا التخلف إذا استمر بهذه الدول وهي تطورت فهي ستبقى، وبالتالي على هذا التخلف أن يستمر. وصلت لمرحلة إسرائيل اقتنعت بأنه إذا ضلت الدول اللي حواليها متخلفة وجاهلة وليس لها نظام دولي وقانون ولا تعتمد على قانون مؤسسات فهي لن تعيش بسلام. وبالتالي في قناعة إسرائيلية تشكلت حديثاً بأنه بوجوب إنشاء دول حقيقية بمحيطها، يعني وليس مزارع. وهذا اللي أكده نتنياهو، إذا سمعت كلامه بيقول نحن دولة قانون، يعني أنا تحت سقف القانون، مش دولة ميليشيات ومزارع ومحاصصات وزبائنية.

الإعلامي محسن حجازي: التطبيق على الأرض مختلف تماماً. كيف اليوم شو اللي عم يجرب يعمله بنيامين نتنياهو بسوريا؟ هيدي دولة قانون؟
وسيم جانبين: كيف شو دويلات؟ يريد بسوريا يريد أن تقسم سوريا إلى دويلات ويكون لكل دويلة نظام خاص بها وعلاقات مع كل الدويلات وعلاقات جيدة مع إسرائيل ونفس الشيء بلبنان. شوف قبل ما ليش الإسرائيلي ما بده حرب أهلية بلبنان، قبل ما نسأل أنا بدي قبل ما نسأل إسرائيل شو بدها، أنا بدي أعرف نحن شو بدنا، نحن كعرب وكلبنانيين وكلبنان رسمي وكدول وأنظمة عربية، نحن شو موقفنا من وجود إسرائيل؟ هذا اللي بدي أفهمه. هل نحن بنعتبر إسرائيل يعني بدنا نحدد أولوياتنا بالموقف الأساسي.

الإعلامي محسن حجازي: حددنا، رحنا على حل الدولتين بقيادة المملكة العربية السعودية اللي هي إذا بدك الأب الراعي للدول العربية. لشو طلعنا مبارح من الأمم المتحدة؟ لشو طلعوا العرب من مجلس الأمن؟ لأنه إسرائيل لا تلتزم بحل الدولتين وإسرائيل تقتطع يوم بعد يوم الأراضي الفلسطينية.
وسيم جانبين: لشو ما التزمت بحل الدولتين إسرائيل بعد؟ شو هل قدرتوا انتم كبحتوا جماح حماس بقلب فلسطين إنها تهجم على إسرائيل في أكتوبر؟ هل كبحتوا؟ عمره سنين وسنين المبادرة العربية في بيروت، لشو بعدها متوقفة؟ لشو طرح الدولتين متوقف لغاية هاللحظة؟ انتم وقت عم تتمسكوا بحل الدولتين قادرين تمونوا على حماس؟ لا. ما طول عمركم انتم تمولوا حماس وتمولوا فتح، وقت يختلفوا تجيبوهم لحد لعندكم تعزموهم على الأوتيلات وتصالحوهم وتعطوهم اللي فيه النصيب وآخر شي يرجعوا من الأوتيل متصالحين ويرفعوا شعار الموت لآل سعود والموت لدول الخليج والموت للعرب.
يعني انتم مش قادرين تفرضوا رأيكم على حماس كنتم بهذاك الوقت وعم بتطالبوا بحل الدولتين. كم سنة صرنا عم نطالب بحل الدولتين؟ بالمقابل عم ندعي إلى زوال إسرائيل من الوجود. هل زالت إسرائيل من الوجود؟ لا.
اللي بدي قوله، تحديد الموقف من إسرائيل، نحن بحاجة لتحديد موقف. هل نحن نعتبر إسرائيل عدوة ويجب إزالتها من الوجود كعرب؟ عم بحكي كمنطق عربي، هل نحن بنعتبر إنه إسرائيل عدوة ويجب إزالتها من الوجود أم إنه هي دولة جارة ويجب أن نتعايش معها؟ أو إنه نحن عقائدياً من غير المسموح لنا إنه نتعاون مع هذه الدولة؟ يعني بدنا نحدد مفهومنا لوجود إسرائيل. هل إسرائيل موجودة بقرآنك ومعترف فيها وموجودة بإنجيلك ومعترف فيه انت كعربي؟ وهل انت قادر إنك تعترف فيها ولا عن جد انت ما انك معترف لا بالديانة اليهودية ولا بالنبي موسى ولا بوجود إسرائيل بدك تزيلهم من الوجود؟ بدك تحدد موقفك من إسرائيل لتقدر تتعامل معها.
نحن لغاية هاللحظة مش محددين موقفنا من إسرائيل. بدنا نساير حزب الله لأنه حزب الله يعادي إسرائيل لأنه ولاية الفقيه تقتضي عليه عقائدياً إنه يعادي إسرائيل. شوف مشكلتنا شو، مشكلتنا موروثات عقائدية وهمية وأساطير عشنا عليها، زعمائنا ركبوا لنا إياها براسنا، الزعماء العرب ركبوا هيدي العقائدية برؤوس الناس بناءً على ديانات متنوعة، عشنا بأوهام وأساطير وعشنا بحالة القوة وبحالة السيف وبحالة العداء الدائم لمكون. يعني نحن كعرب إذا بتلاحظ إذا مش موجودة إسرائيل رح نعادي بعضنا، يعني رح نقتل بعضنا. إذا مش الشيعي رح يقتل الشيعي، إذا مش حركة أمل رح تقاتل هي وحزب الله، رح تلاقي إنه الثنائي الشيعي رح يتقاتل هن والسنة، وإذا السنة ما تقاتل هو الثنائي الشيعي رح تلاقي الشيعي متقاتل هو الدرزي والمسيحي عم بيقتل الدرزي والدرزي عم بيقاتل العلوي والعلوي عم بيقاتل الكردي والكردي عم بيقاتل السني. نحن شعوب عايشين على دوامة قتال، نحن مش عارفين شو بدنا أصلاً. لذلك المشكلة مش مع إسرائيل ووجود إسرائيل، مشكلتنا مع أنفسنا، نحن مش قادرين نحدد أولوياتنا من بعضنا.
نحن يا عمي بلبنان صار في عنا جولات قتالية داخلية منذ الحرب الأهلية، قتلنا بعضنا بالـ 2013 أنا بضيعتي راح ست قتلى بسبب إنه سب، هذا مشكل طائفي بأسباب تافهة لأنه إذا ما تقاتلنا سني شيعي أو درزي مسيحي رح نتقاتل عشائرياً، انت عشيرتك فلان وأنا عشيرتي فلان ولازم نقتل بعضنا، أو انت ابن العائلة فلان وهذا ابن العائلة الفلانية، أو انت ابن المنطقة الفلانية وأنا ابن المنطقة الفلانية لازم نقتل بعضنا. فنحن شعوب عايشين على الاقتتال، نحن شعوب عايشين على الأساطير الوهمية، عايشين على أخذ الحق بالقوة وهذا المبدأ الغلط كلياً، مش قادرين نكون دولة، مش قادرين نعيش بكنف دولة. وإذا بتلاحظ نحن بلبنان روسنا روس ميليشيات، ما بنقدر نعيش بضمن مؤسسة، حتى زعمائنا وحتى المستلمين هلا مش قادرين يكونوا دولة، مش قادرين يبنوا دولة لأنه تعودنا على حياة الميليشيا وحياة لا قانون وتعودنا على موروثات أسطورية وهمية لا تمت بالدين بصلة ولكن هي بصلب العقيدة اللي عم نتشربها من صغرنا وعم نتوارثها، كلها أخطاء بأخطاء.
وبالتالي يجب تحديد موقف لبنان من إسرائيل. يتفضلوا يطلعوا من الحكومة ببيان واضح، دولة لبنانية رسمية تحدد الموقف، شو الموقف من إسرائيل؟ قانون مقاطعة إسرائيل لا يزال قائماً ولم يتم إلغاؤه حتى هذه اللحظة، وبالتالي الموقف اللبناني هو إنه إسرائيل حتى هذه اللحظة وحتى إشعار آخر هي دولة عدوة. يعني عم نناقض أنفسنا، أنا ما بقدر فاوض عدو، ما في فاوض عدوي، كيف بدي فاوض عدو بطريقة غير مباشرة؟ لحد هلا صرنا ثلاث سنين عم نفاوض، خيي لأي مرحلة وصلنا؟ لشو وصلنا؟ بعدنا ولا شي لأنه طريقة التفاوض غلط، لأنه نحن بعدنا مش محددين شو بدنا من إسرائيل، بعدنا معتبرين، بعدنا عم يطلع بيانات عم نصدر بيانات إنه طولوا بالكم لا تلومونا، نحن اتفاق الإطار هو اتفاق إطار ما إله علاقة بالسيادة اللبنانية. لك يا خيي حتى لو عملت تفاوض مباشر يعني بتنمسح بتنطعج سيادة لبنان؟
في قول بيقول إذا ابتليتم بالمعاصي فاستتروا، وعلى هالقاعدة الدولة اللبنانية اليوم تعتبر إنه ما يحصل هو معصية، مفاوضة إسرائيل، ولكن نحن مكرهين عليه. إذا التفاوض مع إسرائيل معصية وهدر 100 مليار دولار من أموال المودعين ليس معصية وليس كفر وليس جريمة، معناتها الشعب مش لازم ينطق أو يحكي أو يعبر عن موقفه. وأعتقد إنه ما تقوم به إسرائيل هي إنه فهمت عقولنا، إذا نحن عم نفكر بهذه الطريقة وهي مستمرة بما تفعله.
وللأسف يعني إذا عن جد عم نفكر بهذه الطريقة شي مؤسف إنه يكون الشعب وصل لمرحلة متدنية من هذا التفكير إنه يترك عدوك، انت ليس إسرائيل، عدوك هو هذه المنظومة السياسية التي سرقت ودائع الناس والتي أفقرت الشعب اللبناني واللي خلت كل طفل لبناني يخلق على رقبته 50 ألف دولار دين. هي هيدي المنظومة السياسية هي عدوة اللبنانيين. إذا في شعب بيفكر، مش إسرائيل. شو عملت لك إسرائيل؟ شو عملت لنا إسرائيل؟ أنا كمواطن مش عم تجيني المي، مش عم تجيني الكهرباء، مش عم تجيني الخدمات، مش عم بمشي على طريق مرسومة مضبوط، إشارات متوقفة، بنى تحتية مهترئة، وزارات متوقفة عن العمل، قرارات بتصدر استنسابية. هيدي هي العدوة للشعب.

الإعلامي محسن حجازي: ليش عم نغطي مشكلة إسرائيل بإخفاقاتنا جميعاً؟ من إخفاقات الدولة اللبنانية، السلطة اللبنانية، إخفاق حزب الله بكثير من الأماكن بقضايا المقاومة؟ ليش بدنا نغطي كل هذه الإخفاقات ونقول إنه أو بالعكس نغطي الإجرام الإسرائيلي اللي صار على الأرض الفلسطينية ولا الأرض اللبنانية بإخفاقاتنا؟ ما فيهم يكونوا أعداء للشعوب العربية، الفساد وإسرائيل. فكرة إنه نحن عم نغطي جرائم إسرائيل، طيب هل نحن غطينا جرائم حزب الله بحق الشعب السوري أم لا؟
وسيم جانبين: الدولة اللبنانية الرسمية غطت جرائم حزب الله بحق الشعب السوري. تعال ليه نحن بنقول إنه نحن عم نغطي جرائم إسرائيل بحق اللبنانيين والتهديم والدمار اللي صار بالجنوب؟ ما بنقول إنه إسرائيل أعطتك فرصة وقت انسحبت عام 2000 وطبقت القرار 425 وحلت عنك، رحت انت خطفت بالـ 2006 جنود واستفزيتها لرجعت احتلت أراضي وضربتك، ورجعت انت عملت لها حرب و استفزيت لترجع تفوت على لبنان. خيي ما نحن اللي عم نقتل اللبنانيين وليس إسرائيل، لا انت اللي عم تخلي إسرائيل تيجي تقتلك، انت اللي عم تتحرشها، انت المسبب، انت اللي بتتحمل الجزء الأكبر من هذا الجرم. حزب الله من استدعى إسرائيل لتقتل اللبنانيين وتقتل بيئته، حزب الله الذي شارك بهذه الحكومات مع هذه المنظومة السياسية المتكاملة الكاملة هم من دمروا لبنان وأدخلوا إسرائيل على لبنان، لأنه مش قادرين ياخذوا قرار منذ اتفاق الطائف حتى اليوم، مش قادرين ينفذوا قرار سحب السلاح.
في أي دولة طبيعية لو في أي دولة طبيعية لا يأمنون إسرائيل على ظل السلاح مع حزب الله والميليشيات. شو عملتوا لإسرائيل؟ عم تقاوموها؟ هلا في مقاومة مثل ما قال مبارح نعيم قاسم نحن قاومنا وصمدنا والهدف ليس الإبقاء على تلة علي الطاهر، الهدف ما بعرف شو عنده أهداف مخفية هو. خلصنا باع وهم للعالم وكذب على الناس والكثير من الأكاذيب والأوهام.

الإعلامي محسن حجازي: برأيك يجب إنه فعلاً ننسى كل ما حصل ونذهب إلى اتفاق سلام مع إسرائيل؟ نطوي صفحة بالمنطقة؟
وسيم جانبين: صفحة شو بدنا نطويها؟ ما نحن شو عنا صفحات كتير أصلاً؟ نحن بلبنان قلت لك بدنا نعرف صفحة العداء لإسرائيل، أكيد بدنا نوقف العداء لإسرائيل، ما بدك تقتنع إنه هيدي الدولة دولة، حدد موقفك. نحن رايحين على عملنا اتفاق إطار ورايحين بدنا نفاوض بفكرنا إنه نحن هلا بنقدر إنه نسلك، يعني هيدي التسليكة ما رح تمشي مع الإسرائيلي. الإسرائيلي مصرّ، أخذ قرار ولن يعود إلى الوراء. إذا انتبهت انت لكلام نتنياهو عم بيقول We have no choice، لا بد لنا إنه ننتصر، يعني جماعة مش متراجعين. ما لفظ كلمة غزة، عم بيقول يهودا والسامرة، ما عاش معترف بغزة الزلمة، ما عاش معترف بالضفة الغربية، ما معترف بفلسطين أصلاً بوجودها.
هيدي المقاومة والتسليح الذي أنفقت عليه ملايين دولارات الدول العربية لحماس وغير حماس، هذه المقاومة أوصلتنا إلى هذه النتيجة: إصرار إسرائيلي، توغل إسرائيلي أكبر، احتلال إسرائيلي أكبر، عدم اعتراف بوجود فلسطيني. كانوا بالأول معترفين هلا بطلوا معترفين. معناتها السلاح والمقاومة والعداء لإسرائيل وصلونا لشو؟ بالإضافة إلى إنه نحن عنا الدعاء، ما تنسى إنه نحن أمة المليار صار لنا 40 سنة بندعي إلى زوال إسرائيل وللمفارقة الله بعده لهلا ما رد علينا، يعني ما بعرف شو السبب. نحن كافة الظروف الشرعية واللوجستية مسخرة إنه نحن ننتصر وللأسف مش عم ننتصر، معناتها استراتيجيتنا غلط، بدنا نعيد التفكير بطريقة تعاطينا مع إسرائيل.

الإعلامي محسن حجازي: ما بحل المشكلة أستاذ وسيم هذا الطرح، حكي به كثيراً منذ تأسيس إسرائيل ووجودها حتى اليوم. العداء مع هذا المكون اللي البعض بيعتبره دولة البعض بيعتبره كيان محتل وما بينهما، هذا العداء لن ينتهي طالما هناك فلسطيني أرضه محتلة ولم يأخذ حقوقه، طالما هناك من سيخرج ويقاتل ويقاوم ويفتعل المشاكل، هيدا منه حل.
وسيم جانبين: خي الفلسطيني ترك دولته وإجا يحتل لبنان قبل. جزء من الفلسطينيين. بس أنا في فلسطين اليوم موجود بقلب أرضه. أليس الفلسطيني اليوم، السلطة الرسمية الفلسطينية الممثلة بمحمود عباس، ألا تعترف بوجود دولة إسرائيل؟ تعترف. أنا شو خصني لاجي عادي إسرائيل؟ نحن عم نحكي إنه ما رح ينتهي المشكل، ما بينتهي المشكل، نحن كعرب عقائدياً وقومياً ويعني ترابطياً عربياً مع بعضنا إنه نحن لا بدنا نكون نحن مع بعضنا ونحن العرب لازم نقاتل إسرائيل. تفضلوا قاتلوها، إذا مش معترفينكم بحل الدولتين اللي عم بتطالبوا فيه ومش معترفة بوجود فلسطين هلا صارت، انتم شو عندكم خيار؟ تفضلوا قوموا قاتلوها. إيران عم تضربكم يومياً ما في رد وبعدكم حاطين براسكم.
ما إسرائيل عم بتساعدكم لحتى تتخلصوا من النظام الإيراني وبنفس الوقت انتم بدكم النظام الإيراني يضل والنظام الإيراني بتقولوا انتم إنه عم ينشر أذرع ميليشيات بالمنطقة لتحاربكم من ضمن الحوثي اللي ما عم بيهدي بال المملكة العربية السعودية ولا دول المحيطة، وبنفس الوقت بدكم تدمروا إسرائيل يلي هي عم بتدمر النظام اللي عم بيدمركم. فهيدي المعادلة المتناقضة هي أساساً عدم وجود رؤية واضحة لدى العرب بتحديد ماهية وجود إسرائيل، هي المشكلة. عليهم على هؤلاء الدول إنه يحددوا موقفهم اتجاه إسرائيل ولاحقاً بتنتقلوا على المرحلة الثانية.

الإعلامي محسن حجازي: هل بدكم تحديد موقف قصدك إنه يروحوا على السلام مع إسرائيل؟
وسيم جانبين: يا أخي إذا ما بدكم تروحوا على السلام روحوا على الاتفاقات الإبراهيمية، إذا ما بدكم تروحوا على سلام روحوا قاتلوها، شيلوها، زيلوها من الوجود، انتم كثار ما شاء الله عنكم. طيب لا بدكم تزيلوها من الوجود ولا بدكم تقاتلوها ولا بدكم تعملوا معها سلام، متمسكين بحل الدولتين وماشيين فيه. حل الدولتين حل الدولتين. والأحلى إنه لبنان ماشي بهالموجه، خي انت في عندك أهم من حل الدولتين، لبنان انسى شو بدك بحل الدولتين والسقف العربي ونحن تحت السقف العربي ونحن تحت الطلبات العربية المتكاملة؟ تحت أصلاً ما في عندك جامعة عربية تفرض وجودها. قال مبارح طلعوا زعلوا من كلمة نتنياهو، طلعوا لبرا إنه جماعة خلص، طلعتهم هيدي رح تأثر وراح تخلي نتنياهو ينكسر أمامهم. وعن جد طيب انتم كنتم ما زالكم قويين هالقد وانتم كعرب يا أمة المليار لشو ما أخذتوا مقعد بمجلس الأمن وكان لكم حق النقض الفيتو فيه يا أبضايات؟ لشو ما وصلتوا لمرحلة إنه انتم تستغنوا عن مجلس الأمن الدولي وتعملوا جامعة الدول العربية؟ لك جامعة الدول العربية اللي عملتوها ناجحة؟ لك ما قادرة تكون تجمعكم هيدي الجامعة، مقررات حبر على ورق. ما في نظام ديكتاتوري بالدول العربية إلا ما دُعم من هذه الجامعة وقتل شعبه من قبل هذه الجامعة.
شو طلعتوا حملتوا حالكم وفليتوا وطلعتوا أكثر من 70 دولة بالعالم طلعوا تركوا، وأكثر من 100 ممثل عربي طلعوا من الجلسة وقاطعوا، ولكن هؤلاء عندما لما طلعوا خلوا الملايين يفوتوا على اليوتيوب يحضروا كلمة نتنياهو لأنه أثاروا فضول الناس ليعرفوا لشو طلعوا، يعني ما كانت لمصلحتهم هيدي الطلعة. الناس فاتت حضرت.

الإعلامي محسن حجازي: أن تصبح إسرائيل مقاطعة عالمياً بسبب إجرام ارتكبته بغزة وبلبنان وفي سوريا، منو لصالح العرب؟
وسيم جانبين: لا أنا برأيي الإجرام الذي ارتكب من قبل الأنظمة العربية بحق شعوبها هو الذي يستحق المقاطعة. ما خصني بإسرائيل، أنا إسرائيل عم ترتكب، عم بتقاتل حزب الله مش عم تقتلني. عم تقاتل حزب الله بلبنان، عدوهم واضح، الجماعة عم بيقاتلوا حزب الله لأنه الدولة اللبنانية مش قادرة.

الإعلامي محسن حجازي: والمدنيين اللي سقطوا؟
وسيم جانبين: ما بعتقد في مدنيين، ما بعتقد، قلة قليلة المدنيين اللي سقطوا، هؤلاء أنا بعتبرهم Collateral Damage بسبب الحروب اللي عملها حزب الله، بيتحمل مسؤوليتها حزب الله.

الإعلامي محسن حجازي: خيي حزب الله يستجلب الضرب والقتل إلى لبنان، ليش التوجيه على أحد على حزب الله وكأنه إعفاء إسرائيل من الجرائم؟ التوجيه هي جرائم لا يحق لإسرائيل أن تستهدف حتى نقطة عسكرية إذا كان في هون خطر على مدنيين أن يصابوا، هيدا قانون دولي.
وسيم جانبين: هيدا قانون أحمر. إسرائيل إذا حزب الله ميليشيا، إسرائيل ماذا تصنف؟ إذا حزب الله إرهاب، إسرائيل وقت تستهدف، وقت عم تستهدف عم تستهدف بناءً على معلومات وعم يكونوا هؤلاء عناصر، حتى العسكريين بالجيش اللبناني الذين يقتلون بالجنوب اللبناني، عم بيكونوا هؤلاء العسكريين عم ينقلوا أغذية. استُهدفت في جنوب لبنان خليه يحقق قائد الجيش بهذا الموضوع، نحن عندنا معلومات دقيقة تشير إلى إنه الجيش اللبناني يعلم بنقل الأسلحة داخل الجنوب ويعلم بتركيب الصواريخ داخل الدكاكين اللي عم يفوتوا عليها العسكريين يشتروا دخان ويلاقوا عناصر الحزب عم يركبوا رؤوس صواريخ هناك وعم يركبوا حمولات بقلب الدكاكين لينقلوها وعم بيتغاضوا عن الأمر. ونعلم ويعلم الجيش اللبناني إنه عم يمرق على عناصره، عناصر حزب الله ببطاقات اللجنة الأمنية ويتغاضى عنها الجيش اللبناني وسلاحه الفردي حده ليتنقل داخل الجنوب، إنه الطفل خي روح دبر حالك.

بس هذا اتهام خطير للجيش اللبناني.
حزب الله بيعرفوا الجيش اللبناني هذا الموضوع ويعلموا وأصلاً قدمت إسرائيل خلال لجنة التفاوض الثلاثية معلومات بهذا الخصوص وأوضحت إنه في عندها تسجيلات بهذا الموضوع.
المهم حزب الله كيف يجلب القتل إلى لبنان؟ بآخر ضربة عملتها إسرائيل، الضربة العشر دقائق اللي ضربت فيها كامل الأراضي اللبنانية، وقف إطلاق نار، بليلة يوم وقف إطلاق النار قبلها بدقائق استهدفت إسرائيل أحد المقابر وقامت القيامة إنه كيف بتضربوا مقبرة.
حزب الله بعد ما توقفت اتصالاته وضُربت البيجر، لجأ إلى جهاز محمول مركزي من نوع موتورولا بيحملوها على الظهر وهيدي المركزية بتحكي بضمن مجموعة يعني بيتجمعوا حواليها مجموعة ست سبع أشخاص بيحكوا عبر هذه المركزية مع بعضهم. هيدي المركزية نقلوها الشباب اللي بدهم يحافظوا على بيئتهم ويحافظوا على شعوبهم، شوف لك هالمقاومة اللي عندها أخلاق، نقلوا هيدا الجهاز على أحد الجوامع بإحدى القرى، بجامع حطوه بجامع، يعني صاروا بصلاة الجمعة يجوا الشباب يجتمعوا، الصلاة قائمة وهن عم يحكوا عبر المركزية عبر هذا الجهاز بقلب الجامع. قال لهم الخطيب إمام الجامع قال لهم يا شباب يعني نتمنى إنه تشيلوها لأنه صارت العيون مفتحة والناس متضايقة وصار في عنا شكاوى منها. شالوها، أخذوها على مكان أحلى، على المقبرة، بأحد المقابر بغرفة قزاز بأحد المقابر فوق قبر وصاروا ينطروا وقت يصير في أي عزل أو تشييع يطلعوا الشباب يجتمعوا بقلب الغرفة. يبدو إنه إسرائيل رصدتهم فقامت باستهدافهم، راح 11 شخص، تسعة من حزب الله وعسكريين اثنين، واحد متقاعد وواحد بالخدمة الفعلية. أعلن الجيش اللبناني يومها إنه استشهاد عسكريين نتيجة استهداف معادٍ. أنا كنت بتمنى من الجيش اللبناني يقوم بتحقيق ويعرف كيف تم استهداف هذه المقبرة. وعلى فكرة كان بعدها وفد التشييع ما وصل على الجبانة، كانوا بعدهم عاملين اجتماعهم الشباب بالغرفة فاستهدفت هالغرفة، كان في شاب عم يحفر قبر راح بالضربة.

هلق انت برأيك إسرائيل اللي قتلت أو حزب الله مين اللي قتل هؤلاء؟
التسع عناصر مشروع شهيد هم رايحين على الجنة، بس هؤلاء العسكري والثاني المتقاعد اللي ماتوا ما إلهم علاقة بحزب الله، ماتوا Collateral Damage. برأيك انت مين قتلهم؟ أليس حزب الله؟ ألا يجب أن يكون هناك ادعاء على…

الإعلامي محسن حجازي: هول العسكريين كانوا على علاقة مع المجموعة عسكرياً؟
وسيم جانبين: لا لا ما إلهم علاقة بمجموعة، طالعين يحضروا الدفن، العسكري في خاله متوفي والثاني عم بيحفر قبر كان عم بيحفر بأجرة يعني بياخذ 20 دولار يومية بيحفر قبور ما إله علاقة، متقاعد. لشو بدك تحرمه لأولاده؟ بأي حق انت بيحق لك تروح تحط جهاز تواصل أو اتصال بقلب مقبرة أو بقلب جامع؟ هذا العنصر تبع حزب الله أو المسؤول بحزب الله بيعطي أوامر بأنك تحط انت مكان اتصال بقلب جامع أو بقلب مقبرة، هل هو بيهمه مصلحتك كبيئتك انت الحاضنة، انت البيئة الحاضنة له بيهمه مصلحتك أو بيهمه يحافظ على حياتك أو بيهمه تنفيذ الأجندة الإيرانية على حساب دماء اللبنانيين؟ أليس هو من يقتل اللبنانيين؟ ألا تعتبر إنه حزب الله ميليشيا خارجة عن القانون مصنفة إرهاب دولياً؟

الإعلامي محسن حجازي: طيب هذا المعيار عندما تطرح هذه الأسئلة بأنه من الذي قتل ومن الذي جنى على هؤلاء الأشخاص، ليش بدك تاخذ الذي ارتكب الفعل اللي هو حزب الله وما بدك تاخذ معه إسرائيل التي أرادت أن يرتكب حزب الله الخطأ لتقتل مدنيين؟ يعني في أشخاص، أستاذ وسيم كنا أمام تجارب نحن شفنا إسرائيل تقوم بالاتصال إلى هاتف أحد الأشخاص تقول له اخرج من بيتك لنستهدفك، صار أو ما صار، شفنا درونات عم تفوت على أهداف دقيقة بداخل شقق سكنية وشفنا بالمقابل مجازر ارتكبت بحق عسكريين بحق قوى أمن دولة بحق عائلات قاعدة بقلب بيوتها، هذا لا ينفي ذلك الإجرام الإسرائيلي.
وسيم جانبين: بالنسبة لمعيار القانون الدولي وحقوق الإنسان لا تستطيع الدفاع عنه، هناك إجرام ارتكب من قبل إسرائيل إن كان في غزة أو في جنوب لبنان أو في جنوب سوريا حتى في إيران من خلال استهداف أحد المدارس وقتل عشرات لمئات المدنيين، هيدا الإخفاق لحزب الله وطريقة تعاطيه مع البيئة ما بيخولكم تبرروا إجرام إسرائيل اللي ارتكبته طيلة هذه الأعوام الثلاث.
طيب وقت حزب الله بده يبدل عناصره بقلب مستشفى، مش رح سميها، وتستهدف، يحق لإسرائيل ضربها وتستهدف هذه المستشفى؟ يحق لإسرائيل ضربها؟ كيف بدك إذا مش قادرة تتعامل مع… انت عامل أنفاق تصل إلى تحت هذه المستشفى، عم تطلعوا من تحتها عم بتجيبوا المصابين تفوتوهم على المستشفى عم تطلعوا انتم عم تبدلوا العناصر، لا يحق لإسرائيل وتطلعوا بالصحية، هذا العسكري المصاب لا يستحق، لا يحق لإسرائيل استهدافه في قانون حروب، حتى الحروب لها قانون، ما بتقدر تقول لي إنه هذا المصاب بمعنى إنه إذا كانت قوات الصليب الأحمر أو الهيئة الصحية عم تنقل مصابين يحق لإسرائيل استهدافهم؟ لا يحق لإسرائيل استهدافهم. والصور اللي عرضهم وزير الصحة خلال فترة الحرب لا شيء يبرر لإسرائيل استهداف سيارة الإسعاف.

الإعلامي محسن حجازي: طيب كيف بدنا نحاسبها لإسرائيل؟ هات لنشوف كيف بدك تحاسبها؟ مجرمة إسرائيل وعم تستهدف المستشفيات وعم تستهدف…
وسيم جانبين: أقله أن لا نعتبر إنه إسرائيل لم تجرم بحق اللبنانيين، أقله إنه هؤلاء الأبرياء الذين قتلوا بكل هالدول ما نقول إنه إسرائيل مبرر لها قتلهم. أنا ما بدي تحاسبها بس ما بدي تروح باتفاق الإطار وتقول لا نريد أن نحاسب إسرائيل على شي وحقنا تنازلنا عنه، هذا أسوأ من أن تقتل إسرائيل اللبنانيين. هناك من يتنازل عن حق هؤلاء اللبنانيين أمام المجتمع الدولي ونقول لإسرائيل انت ما ارتكبتي شي. حق القتلى قصدك اللي راحوا؟

الإعلامي محسن حجازي: طبعاً.
وسيم جانبين: أوكي هؤلاء القتلى هل هم يقاتلون من أجل لبنان أم من أجل ولاية الفقيه وإيران؟ المقاتلين العسكريين حرب الإسناد التي افتعلوها مشروع لإسرائيل بالحرب تعمل اللي بدها إياه مع العسكريين، إنما المدنيين، المدنيين أنا مع إنه لبنان يتفضل يرفع دعوى بالمحاكم الدولية ضد إسرائيل على شرط إثبات إنه هؤلاء مدنيين. ما انت بدك تثبت أيضاً. عنا آلاف الدلائل، الممتاز يتفضل لبنان ياخذ حقه. وإذا قوي لبنان بعدنا عم نحكي باتفاق الإطار تنازلنا، إذا لبنان قوي كتير وكتير سلاح حزب الله مهم وبيدافع عن لبنان مثل ما عم بيقول نعيم قاسم يتفضلوا يقاتلوا إسرائيل، ياخذوا حقهم منها بالقوة، يروح يقاتل نعيم قاسم يفتحوا له يروح يقاتل يلا خليه يقاتل ياخذ حقه من إسرائيل. خي نحن دولة مهزومة وحزب الله هُزم، هذا الذي كنا نفاخر فيه ونفاخر بسلاحه إنه هذا بيحرر الأرض وبالـ 2000 حررنا وطبقنا القرار 425 ودحرنا الاحتلال الإسرائيلي.
لماذا لا نكمل هذا الانتصار؟ لماذا بالـ 2006 اعتديتوا على إسرائيل؟ انتم اعتديتم على إسرائيل، انتم اختطفتم جنود لأسباب غير معروفة بذريعة مزارع شبعا، هل مزارع شبعا تحررت اليوم بعد ما عملتوه خلال هديك التجربة الماضية والسنوات الماضية من الحروب مع إسرائيل ومن الاعتداء على إسرائيل والانتصارات الوهمية اللي عاشها حزب الله وعيّشها لبيئته على إسرائيل، هل استرجعتم مزارع شبعا؟ لا بل ازدادت إسرائيل توغل أكبر وهي عم تتوغل أكثر على فكرة والمتوقع إنه على ما يبدو إنه نتنياهو سيغير… المراد المطلوب من نتنياهو دوره هو تغيير وجه الشرق الأوسط والأرجح نتنياهو رايح على حرب لاحقة أكبر من اللي سبقت، مقابل إعطائه عفو شي خصه عندهم بالمحكمة، يعطى عفو ويتوارى عن الحياة السياسية، هذا ما أتوقعه. يعني سيكون نتنياهو كبش فداء أو كبش محرقة لما سيحصل لاحقاً، وبالتالي لأنه الإسرائيلي بات يعني حتى اليمين واليسار الإسرائيلي غير مقتنعين بضرورة وجود إيران بالمنطقة وبالتالي هذا النظام رح ينشال بطريقة أو بأخرى وسلاح حزب الله أيضاً راح يزال بطريقة أو بأخرى. وبتصور يعني الله يهديه الشيخ نعيم وما يطلق شي ست صواريخ بين الليلة وبكرة ويفاجئنا ويجيب لنا حرب تانية.

الإعلامي محسن حجازي: هناك احتمالية، تكلم مبارح بنيامين نتنياهو عن إنه هناك تجهيزات لضرب إسرائيل بحسب معلومات استخباراتية قبل الانتخابات الإسرائيلية بناءً للكلام الإيراني إنه نحن رح يكون عنا ضربة استباقية، أتوقع إنه تكون ضربة استباقية من داخل لبنان؟
وسيم جانبين: إن شاء الله الله يهديه لنعيم قاسم ومع إنه مش هو المتحكم بالقرار، إن شاء الله الله يهديهم العناصر الموجودة المنفذة على الأرض وما تقوم بإطلاق ست صواريخ مثل اللي مضوا لأنه عليهم أن يعلموا إن نتنياهو أحد أدوات إنهاء هذا المحور وهو مستعد لأن يقوم بما لا تتخيله عقولهم بإنهائهم، وبالتالي أي خطوة الآن غير محسوبة سندفع ثمنها أغلى مما سبق.

الإعلامي محسن حجازي: ليش ممكن الإيراني أو حزب الله يستهدف إسرائيل قبل الانتخابات لصالح مين بتكون هذه الخطوة إذا ما قاموا بها بحسب كلام نتنياهو؟ وبرأيك كمان من ناحية أخرى من السؤال ليش نتنياهو عم يعلن على الإعلام هذا الموضوع؟
وسيم جانبين: أتوقع إعلانه عن هذا الموضوع هو تجهيز للمرحلة القادمة، تجهيز للداخل الإسرائيلي للمرحلة القادمة، تجهيز للضربة القادمة، بمعنى أن يأخذ هذا كدليل أو كذريعة لتنفيذ هو ينفذ ضربة استباقية. مشكلة إنه الكلام الإسرائيلي قابله كلام إيراني، يعني هذا الكلام الإيراني بتحس كأنه متقاطع مع الإسرائيلي وكأنه الإيراني بده المنطقة لا تهدأ وكأنه الإيراني بحاجة لأنه حزب الله يعمل شي لحتى يستفز إسرائيل لتقوم إسرائيل بالرد وكأنه الإيراني عم يحاول يوسع نطاق الضربات بجواره. إذا بتلاحظ إنه الحوثيين عم يتحركوا يومياً الآن، حزب الله من المتوقع أن يتحرك، قد يقوم بإطلاق صواريخ من العمق اللبناني، يعني قد يقوم حزب الله بإطلاق صواريخ من منطقة بعلبك الهرمل مثلاً، قد نشوفها بالمرحلة إنه بجنوب ما عاد قادر يضرب، وهذه الصواريخ عم تنلقى على ارتفاعات منخفضة جداً وهي مرئية. قد تكون هي شرارة ما سيحصل وما سيحدد مصير المنطقة في المرحلة المقبلة ومصير لبنان.

الإعلامي محسن حجازي: دولة إيران مصلحة بهذه الضربة؟
وسيم جانبين: إيران لها مصلحة تتوسع بكار الضربات أكيد، إيران كل ما توسعت ضربات بكار الضربات في المنطقة كل ما هي ارتاحت أكثر. ولكن هل هي قديه قادرة تستمر بهذه الراحة؟
الإعلامي محسن حجازي: بالختام هناك احتمالية ولم ينقطع احتمال أن تنشب الحرب مجدداً قبل الانتخابات الإسرائيلية والأمريكية؟
وسيم جانبين: برأيي الحرب قريبة جداً صارت، يعني برأيي في طريقة حرب جديدة حتكون. الدولة اللبنانية يعني مطالبة بأن تتحرك سريعاً باتخاذ إجراءات على الأرض. هي دولة وصار لهم ثلاث سنين عم بيماطلوا بقصة اتفاق إطار وتاركين الداخل وتاركين المؤسسات وتاركين قطاع الكهرباء وتاركين البنى التحتية وتاركين النافعة تتسكر بدون رقيب أو حسيب وتاركين جباية الضرائب وتاركين سجن رومية، 83% من الموقوفين غير محكومين مخالفين لقانون أصول المحاكمات الجزائية بالكامل، ضاربين الدستور بعرض الحائط، 300% نسبة الاكتظاظ بسجن رومية، 41 حالة سل صار منتشر بسبب الاكتظاظ وبسبب الآفات الصحية جوا، صار منقول أربع خمس حالات على المستشفيات بين أمس واليوم. في مشكلة لبنان منه دولة.
أنا كنت بتمنى إنه يكون في عنا نصير نبلش نعمل دولة قانون، يا خيي خلينا نعمل نتماثل بما يفعله الإسرائيلي بالداخل، خلينا نطلب… رئيس حكومة عم يتحقق فيه، لك يا عمي المفارقة مبارح بخطاب نتنياهو بهذه النقطة تفضل، خطاب نتنياهو بالمجلس، شوف رئيس حكومة عنده الوقت إنه يراقب مرشح عمدة نيويورك لمين عامله لايك على الفيسبوك ومسجلها عنده وحافظها وعنا رئيس حكومتنا مش عارف إذا حق ربطة الخبز، يا عمي لك هي دولة؟ رئيس حكومة عنا ما بيعرف حق ربطة الخبز. بس فاضيين لمحاصصات وللصفقات وللتجارة ولتراكم الأموال وللفساد. أنا هؤلاء هم أعدائي، هذه المنظومة السياسية التي أفسدت لبنان هي عدوي، ليست إسرائيل. إسرائيل ما بتعني لي شي، منا عدوة، لا بل إذا بتكون صديقة بيكون أفضل لي، بتعلم من تطورهم من حضارتهم شوي، حاج عم نرجع لورا وهن بيتطوروا، خلينا نتعلم منهم يا أخي، بركي بنعمل مراكز أبحاث نحن وإياهم تكون متشابكة مع بعضها، عنا كتير نوابغ بلبنان وعقول عم بتسافر لبرا وعنا عقول عم تنمحي بسبب البيئة والتخلف الموجود عنا، بركي بصير عنا مراكز أبحاث نتطور نحن وإياهم سوا بننهض بهذا البلد، حاج عم نرجع لورا.

الإعلامي محسن حجازي: شكراً لك الصحافي وسيم جانبين على هذه الحلقة وشكر موصول لكم متابعينا إلى اللقاء في حلقة قادمة.

الخلاصة
يلخص وسيم جانبين موقفه بالنقاط التالية: كذبة المقاومة: يعتبر أن سلاح حزب الله لم يحرر مزارع شبعا بل جلب المزيد من الاحتلال والدمار، وأن كل الحروب من 2006 إلى حرب الإسناد كانت استفزازاً لإسرائيل تتحمل مسؤوليته الميليشيا.
فشل الدولة المزمن: منذ الطائف 1989 مروراً بالقرارات 425 و1559 و1701 واتفاق نبيه بري الأخير، الدولة اللبنانية تماطل ولا تنفذ نزع السلاح وتتذرع بالحرب الأهلية بينما تطلب دعماً دولياً للجيش دون السماح له بالتنفيذ.
العدو الحقيقي داخلي: العدو ليس إسرائيل بل المنظومة السياسية التي سرقت 100 مليار دولار من أموال المودعين، وأغرقت كل طفل بدين 50 ألف دولار، ودمرت الخدمات والبنى التحتية وسجن رومية.
تحديد الموقف من إسرائيل: لبنان لا يزال رسمياً يعتبر إسرائيل عدوة عبر قانون المقاطعة، بينما يفاوضها سراً لثلاث سنوات. المطلوب بيان رسمي واضح: إما اعتبارها دولة جارة والذهاب إلى سلام مباشر واتفاقات إبراهيمية، أو مواجهتها علناً، أما التمسك بحل الدولتين دون القدرة على ضبط حماس فهو نفاق.
السلام خيار استراتيجي: يدعو إلى وقف العداء العقائدي الوهمي، والتعلم من التجربة الإسرائيلية في بناء دولة القانون والمؤسسات ومراكز الأبحاث، بدل العيش على ثقافة الثأر والاقتتال الطائفي والعشائري.
تحذير من حرب قريبة: يتوقع أن نتنياهو ذاهب إلى حرب أكبر لتغيير وجه الشرق الأوسط وإنهاء المحور الإيراني وسلاح حزب الله، وقد تكون الشرارة إطلاق صواريخ من بعلبك-الهرمل بطلب إيراني لتوسيع رقعة الصراع قبل الانتخابات الإسرائيلية.