الكولونيل شربل بركات: ملخص لأحداث عين إبل 5 ايار سنة 1920

158

ملخص لأحداث عين إبل 5 ايار سنة 1920

أعداد الكولونيل شربل بركات/06 أيار/2020

عين إبل سنة العشرين كانت ضيعة كبيرة نسبيا فيها شي 300 بيت وكنيستين للموارنة وكنيسة للروم الكاتوليك وفي دير للراهبات. وكانت ضيعة غنية فيها 100 جمل لنقل الغلة عالبيادر والتجارة بين حوران وصور وصفد وعكا غير عن الحيونات العاملة والبطالة وقطعان الغنم والماعز. وكان رجعلها شوي من ولادها المهاجرين بأميركا وعمروا بيوت قرميد زينوها وزادوا على أراضيها ومنهن اشترى أراضي برات الضيغة وعمل مزارع بمناطق بعيدة متل طير سمحات على نهر الليطاني أو الصالحاني غرب القوزح. من هون كانت كلمتها إلها تأثير ورايها مسموع.

بالحرب العالمية الأولى، وبالرغم من انفتاح ولاد عين إبل على الاتراك لدرجة انو فتحوا مركز لجمعية الاتحاد والترقي، وصاروا أعضاء الجمعية يتدخلوا بأمور الضيعة، بس لما تغيرت الأحوال صار الطلب على الخدمة الاجبارية من سن ال18 بالأول توصل لسن 45 بآخر الحرب. وهيك كتار راحوا وما رجعوا وكتار هربوا تما يخدموا بالجيش العثماني من هون بسنة العشرين كان عدد السكان أقل من ما لازم يكون يعني إذا قبل الحرب كان حوالي أربعة لخمس الاف بايار سنة العشرين لازم يكون حوالي 1500 ل 2000

العثمانيي انكسروا وتركوا البلاد وفاتوا الانكليز على كل فلسطين وعلى دمشق. بينما كانوا الحلفا خسروا بمعركة “غاليبولي” وحدها بمواجهة العثمانيي حوالي 160 الف اصابة بينهن 31 ألف قتيل. وكان هم فرنسا تكفي التقدم لصوب الأرض التركية خاصة بعد وقف اطلاق النار بتشرين 1918 وتسيطر على الممرات المائية. من هون ما كان في بصور عسكر فرنساوي بيكفي لضبط الأمن بالمنطقة. واتفاقية سايكس – بيكو كانت أعطت الانكليز الاشراف على فلسطين والأردن والفرنسوية على لبنان وسوريا.

الأمير فيصل ابن الشريف حسين قائد الثورة العربية بالحجاز دخل على دمشق مع الانكليز. وجرب يعمل دولة عربية. كل الخايفين من بقايا الأتراك التحقوا بفيصل تما يتلاحقوا من الحلفا. وهيك كانت قيادات فيصل أغلبها من النظام البائد. وبالطبع طريقة تصرفها ما بتختلف عن “جمال باشا” وغيرو من الضباط العثمانيي.

خلال سنة 1919 كان مؤتمر باريس هاللي أعلن عن نشوء عصبة الأمم عم يبحث بتفاصيل الانتداب على دول المشرق. وهون جرب فيصل ومين وراه يعمل مملكة عربية. بينما البطرك الحويك واللبنانيي وعين إبل كان بدهن لبنان الكبير. هون أساس المشكل والباقي تفاصيل. يعني طريقة الضباط الاتراك متل ما عملوا بجنوب تركيا (مدابح الأرمن واليونانيي والسريان والآشوريي…) يعني تهجير بالقوة لفرض لون واحد ورأي واحد. بينما حلم اللبنانيي كان دولة بحدود لبنان التاريخية، يعني دولة فخر الدين بالقرن السابع عشر مع دولة ناصيف النصار شيخ مشايخ جبل عامل بآخر القرن الثامن عشر.

جيش فيصل تالف من متطوعين من هب ودب يعني مش من زعما المنطقة. وجرب يفرض حالو بالقوة على الطريقة العثمانية. وهاللي ما بيمشي بيدفع جزية او بيتعرض للنهب. عين إبل ما رضيت تدفع ورجالها وقفوا وقفة مشرفة بدهن لبنان لأنو أهلن هنيك وجذورهن كمان وبطركهن وكل تاريخن بيحكي لبناني. جماعة الشام لما لقيو أنو الأمور راح تفلت من أيدهن وفيصل وافق يمشي مع الفرنسوية قاموا عملوا الهجوم فكرهن يخوفوا فرنسا ويجبروها ترجع تفاوضهن ويجبروا فيصل يتراجع عن الاتفاق. النتيجة كانت اختيار هدف محرز وعين إبل دافعت عن حقها بالحياة وصمدت تسع ساعات بمعركة غير متكافئة. وبالأخير المهاجمين اعتمدوا على الحيلة وفهموهن انو البيك مش راضي على عمل العصابات وراح يجي يزور الضيعة تيثبت حسن النية. وبظل الأعلام البيضا والمصاحف فاتوا وبلشوا تقتيل. اضطروا الأهالي يخلوها بعد ما خسروا عشرات المقاتلين. وكل من بقي انقتل وخلوها مفتوحة للنهب والحرق والتدمير ثلاث أسابيع. بها الوقت بعتت فرنسا فرقة من 1000 عسكري بالبحر نظفوا المنطقة من كل العصابات. وأهل عين إبل هاللي كانوا تهجروا على فلسطين رجعوا بالبحر على صور ووصلوا على ضيعتهن المدمرة ورفعوا الأنقاض ودفنوا الموتى وعضوا على الجرح. وهيك بأيلول 1920 أعلن الجنرال غورو دولة لبنان الكبير. وبعد سنة بالخامس من أيار 1921 احتفلوا ولاد عين إبل بيوم الشهدا مع تدشين القبر الجديد جنب الكنيسة هاللي انبنى بسواعدهن وشوية تبرعات من ولادهن بالأرجنتين. ومن يومها بتحتفل عين إبل بذكرى الشهدا بها اليوم المقدس.