الأب سيمون عساف/لبنان البيت… بلادي العلم، الحلم، الكِلمِهْ، الحكمِهْ الحُب والشعب السِلمي/نحنا الزنبق، نحنا الفِلّْ ومش رح نتخلَّى ونفـِلّْ

لبنان البيت… بلادي العلم، الحلم، الكِلمِهْ، الحكمِهْ الحُب والشعب السِلمي/نحنا الزنبق، نحنا الفِلّْ ومش رح نتخلَّى ونفـِلّْ
الأب سيمون عساف/26 آب/2021

حتى  تعرف وين الفرق      وبدَّك صرح العزِّ تفوت
تفضَّل دقِّ بْواب الشرق     المجد التاريخ  ببيروت
لبـنان البيت الجـامع      خَلوِهْ وكنيسهْ وجـامع
لِـمْ  زارو أَلله طَـوَّل     بيشهـد تاريخـو الأَول

مجدو تجلَّى بهالتالوت
كسرو الخاطر ذلُّو الشعب   تركونا بالظرف الصعب
حلم اللبــناني اغتالو      وختموهـا بسرقة  مالو

وما تركولو حتى القوت
انشقّْ الصف انهدّْ البيت     وصرنا حكايِهْ بالياريت
حَرق المرفـأ زاد الهم      خاوى الردم الدمع الدم

موجك يا بحر الياقوت
مهما عِملو يـا بيروت      نحنا الشعب الما منموت
من عِنَّـا  طير  الفينيق    تمرَّد عالموت وعالضيق

ورشِّ جبال الأَرز بيوت
بلادي مش ممكن  ترتاح      لو أَخْـدو مِنَّا  المفتاح
حول البـيدر نمل الدين      مـا أَثَّـر عالحصَّادين

لولا افترشو الأَرض تخوت
ما خوَّفنـا عَـدَّ.. وكَمْ      ومِنَّـا المستدعي  تبلكَمْ
وقت الحَزِّه  نحنا رجال   بْخَوض العركِهْ وكل مْجال

حاج يتغطُّو بورقة توت
فهمـنا المقصد والغايِهْ    احْفظنـا السُوره  والآيِهْ
للقوِّهْ  مش  رح  نركـع   لو إِلنـا  الطاغي تسكَّع

وهدَّدنا تِنِّين وحوت
يا أَغـلى من عَينـينا    لبـنان الغـالي عليـنا
مهما ضيقَـهْ عانيـنا   بإِيـديـنا وبإجـريـنا

منتصدَّى للناس الخوت
بترابو جدودي بَركِـهْ   وبـاقي محافظ عالتَركِهْ
لبـنان الجـانح والريش      إِلاَّ  بْظِلُّو مـا منعيش

وإِلاَّ بأَرضو ما منموت

نحنا  الزنبق… نحنا الفِلّْ    مش رح نتخلَّى ونفـِلّْ
يا أَخصام… ويا  أَنصار    لولا  لون الأَزرق صار

عم يتحمَّم بالمازوت
ما بدهـا قول وقانون      إِسمِك يـا بلادي الحُرَّه
أَغلى مْنِ الدر المكنون    بقلبي وعاطفتو الحَـرَّى

وجوَّات ضلوعي منحوت
أَلله  للدنيـا … وللـدين     وسعـة صدرك عبَّـاها
بالعمران … وبالتمـدين   وجمَّـل مجدك وتباهى

بأَغلى وأحلى وأَعلى نعوت

بلادي
بلادي العلم، الحلم، الكِلمِهْ     الحكمِهْ الحُب الشعب السِلمي
الوعـد، السعد، البيت  الأَوَّل      راحو.. وعهد  المجد  تحوَّل

وغِرقت  ضيعتنا  بالظُلمِهْ
بلادي الحلوِهْ  كـانت جَنِّهْ      تحب  تعيش تهـنِّي .. تغنِّي
بلادي عمري وقلبي وذاتي      ومنهـل علمي… وشهاداتي

ردُّولي شهاداتي وعلمي
اختلفو ولاد البيت.. وصفَّى      سراج الإِلفِهْ الضاوي مطفَّى
تفرَّقنـا .. وتوفَّى  المـاضي      وشربنا من الكاس الفاضي

ومش باقي مِنَّا وْلا  زلمي
انشقّْ الصف وأَهلي  خسرو     انهدّْ  البيت.. انهزمو انكسرو
رغيف  الخـبز  الطيِّب عفَّن      العـار  الشامت  فيـنا  كفَّن

حلمك يا لبناني وحلمي
يـا  رزق الله  مبارح  كِنَّـا      بعـرس  الكيف اليوم  تجنَّى
الدهر القهر الفقر موجِّـع      فينا  الحقد.. الكره.. مشجِّـع
يمحي ذكرى العهد السلمي