اتيان صقر – ابو أرز تعليقاً على بيان البرلمان الأوروبي: يبلّوو ويشربو ميتو 15 تموز/2023
بيان صادر عن حزب حراس الارز حركة القوميي اللبنانيي
من بعد ما صوّت البرلمان الأوروبي على قرار بيدعم بقاء النازحين السوريين عَ أرضنا، تبيّن انو لبنان ما عندو اصدقاء، و ما في دولة صديقا واحدي مستعدّي توقف حدّو بإيام الشدّي، وخصوصاً فرنسا يللي بعد في ناس اغبيا بسموها الام الحنونة… ويمكن هيدا هوّي قدرنا انو نواجه اعدائنا لوحدنا … ونربح.
١- وقت حَربنا مع المنظمات الفلسطينيي، العالم كلّو وقف ضدنا، يعني الدول الغربيي والشرقيي وكل الأنظمي العربيي دعمو الفلسطينيي … ورغم هيك ربحنا.
٢- وقت حَربنا مع الاحتلال السوري، كمان العالم الغربي والشرقي اعتبر القوات السوريي قوات سلام و وقف ضدنا … و رغم هيك قاومناه وربحنا.
٣- اليوم العالم كلو عم بساير حزب الله” ضد مصلحة لبنان، والبلد عم يعاني من ازمات وجوديي خطيرا، و متروك لوحدو ليقلّع شوكو بإيدو… كمان رغم كل شي لبنان رح يرجع يوقف عَ جريه … ورح نربح.
٤- مبارح أوروبا طعنت لبنان بضهرو، وقررت، قال، توطّن النازحين السوريين بلبنان… أكيد نحنا مش بس رافضين هل قرار، كمان رح نعتبرو مش موجود ورح نرجّع النازحين عَ بلادن، ونقلّا للدول الأوروبيي: فيكي تبلّي هل مشروع وتشربي ميتو.
بالمناسبة منقلّا لأوروبا انتي ارتكبتي بحق لبنان خطيّي مميتي، ورح تدفعي حقّا أكيد، لأن ما حدا بالتاريخ تعدّى علبنان الا ما دفع تمن غلطتو…
فيا أوروبا، الله يسترك من لعنة لبنان يوم البتحل عليكي، لأن لعنة لبنان من لعنة الله.
لبيك_لبنان
اتيان صقر – أبو أرز
