واللي بيقلّك غير هيك طعميه بطاطا
مروان العلم/فايسبوك/10 تشرين الثاني/2026
وقت اللي منطوي آخر صفحة من الكتاب، بيِجيك فهلوي مصدّق حالو سيادي ليتعلّم لفظ الحروف الأبجدية بركي بيصير يَعرِف يقرا. لا جيراننا هيّنين!. ولا شعبنا واعي ليحاسِب، ولا مستزعمينا عَم يستحوا او بيشبعوا!.
فما بقا تظبط بهالبلد غير بحلّ واحد وحيد ليصير عنا دولة وجمهورية وبس.
بالمنيح.. بالقوّة.. بالخبيط.. باللبيط!.
لازم بقا يتلزّم لبنان بشكل وصاية خارجية حضارية لفترة جيل كامل (٣٣ سنة) بالقليلة.
لأنو الشباب الطيّبة بالوطن وبتعداد أجنداتهم وولائاتهم ومصالحهم الشخصية وأطماعهم ما عّم يتركو الشباب اللي قادر يحكم!. يحكم.
ولا أساساً بظُل هالطغمة الفاسدة العنكبوتية المتشابكة المتشاركة #كلها!. قادر أي حدا يحكُم.
فلازم بقا يتلزّم لبنان لدولة أجنبية متل هولندا، سويسرا او اليابان او اي دولة اجنبية متحضرة وما تكون بتعرف تلفظ ولا حرف عربي.
والتلزيم بيكون من رئاسة الجمهورية لأصغر شرطي بلدي عالارض، وبينطرد منّو اي زعيم عميل ومصلحجي مع جماعتو لأي بلد كان (الحمدالله كلن لازم ينطردوا)، وأكيد مِن بعد تشليحو هويّتو وكل اموالو وعقاراتو داخل وخارج لبنان وإستردادهم للدولة، ونّزع اي سلاح شرعي كان ام غير شرعي، وخلصنا سلاح بقا لأن حتى السلاح الشرعي حاميهُم وما بيلبقلنا ولا منستاهلو…
ولازم كمان تنسحب الجنسية اللبنانية من كل اللي اخدوها بفترة الإحتلال السوري، وكل شي قوانين انعملت تحت التهديد والترهيب والحروب، (من سرقة وأونطة ونهب منظّم) وينردّ لصحابو اللي أهل إنُن يحافظو عليه، وتتلزّم الحدود الجوية والبحرية والبرية للجيش المنتدب الغريب (يكون من غير قارة)، وساعتها بينشغل عا ترتيب وتعقيم البلد كلّو من جوّا لمّا نصير كلنا متساويين.
واللي بيقلّك غير هيك طعميه بطاطا
