رابط فيديو مقابلة مع الناشطة السيادية والوطنية عبير مروة/ نعم، أنا جنوبية وعميلة لدولتي وصوتي هو صوت الأكثرية في الجنوب/لا لم ولن يخيوني ومستمرة في نضالي الوطني من أجل دولة حرة سيدة ومستقلة

رابط فيديو مقابلة مع الناشطة السيادية والوطنية عبير مروة/ نعم، أنا جنوبية وعميلة لدولتي وصوتي هو صوت الأكثرية في الجنوب/لا لن يخيوني ومستمرة في نضالي الوطني من أجل دولة حرة سيدة ومستقلة
أجرت المقابلة الإعلامية باتريسيا سماحة من موقع الدولة 17 تشرين الأول/2026

ملاحظة/تم تفريغ المقابلة وكتابة نصوصها واختيار عناوينها واستنتاج مقدمتها والخلاصة بواسطة الياس بجاني بحرية مطلة

مقدمة مطولة وشاملة
تأتي هذه المقابلة في لحظة مفصلية يعيشها لبنان والجنوب تحديداً، بعد حرب مدمرة انتهت بهزيمة عسكرية وسياسية كبرى لمشروع حزب الله الإيراني والإرهابي، وتهجير مئات الآلاف وتدمير آلاف المنازل والقرى الحدودية. عبير مروة، وهي ابنة الجنوب، ابنة النبطية – صربا، لم تكن شخصية عامة معروفة على المستوى الوطني قبل زيارة رئيس الحكومة اللبنانية نواف سلام إلى النبطية. خلال تلك الزيارة، كسرت جدار الصمت الذي فرضته لسنوات بيئة حزب الله، وصرخت أمام رئيس الحكومة والكاميرات: “دولة الرئيس، بدنا لبنان، نحن معك للآخر. بدنا انسحاب بالتفاوض وإعادة إعمار بالتفاوض”. هذه الجملة القصيرة فجرت عاصفة. ففي عرف البيئة الحزبية، ممنوع على الجنوبي أن يطالب بالدولة، ممنوع أن يطالب بالتفاوض، ممنوع أن يطالب الجيش اللبناني بأن يحميه. فالمطلوب هو أن يكون الصوت الوحيد هو صوت الحزب، وأن تكون الرسالة الوحيدة الموجهة لرئيس الحكومة هي رسالة اتهام بأنه سبب الخراب. عبير تمثل تحولاً عميقاً داخل البيئة الشيعية الجنوبية. هي ليست معارضة من خارج الطائفة أو من بيروت، بل هي من صلب البيئة، تعيش بين الناس، تسمعهم في محل الخضرة والملحمة وعند تعبئة المياه. وتقول إن ما قالته هو موقف الأكثرية الصامتة، التي خافت لسنوات من التخوين والتهديد.

المقابلة تكشف ثلاثة مستويات من الصراع
صراع على تعريف الهوية الجنوبية: هل الجنوبي هو بالضرورة تابع لحزب الله، أم أن الجنوبي هو لبناني يريد الدولة والجيش والقانون؟
صراع على مفهوم الوطنية والعمالة: حيث تحولت تهمة “العميلة” إلى أداة ترهيب لكل من يطالب بالدولة. وعبير تقلب المعادلة وتقول بفخر: نعم أنا عميلة لدولتي، لحكومتي، لجيش بلدي.
صراع على مستقبل الجنوب: هل يبقى الجنوب رهينة قرارات خارجية ومحور إيراني، أم يعود إلى كنف الدولة اللبنانية، عبر التفاوض الذي يوقف تمدد الاحتلال، ويؤمن عودة الأهالي وإعادة الإعمار.
كما تفضح المقابلة الأساليب التي يستخدمها جيش الترهيب الإلكتروني: التشكيك بالانتماء الجنوبي، والطعن بالحياة الشخصية والزواج المختلط من مسيحي، واستهداف العائلة وحتى شقيقها المتوفى، ونشر صور زوجها وهو ضابط في قوى الأمن الداخلي، في خرق فاضح للقانون.

النص الكامل للمقابلة
باتريسيا: قلتِ له “دولة الرئيس بدنا لبنان نحن معك للآخر” كم كلمة قلتيهم وولع البلد وكأنه الجنوبي ممنوع يقول هذه العبارة.
عبير: أنا قلت موقف أكثرية أهل الجنوب، حتى اللي ما عم يتجرأ يقولها. أنا قلت بصوت عالي اللي هني ما كان بدهم ينقال بزمان ومكان زيارة الرئيس سلام، لأنه كان بدهم يوصلوا رسالتهم الخاصة وهي أن الرئيس هو سبب ما وصلنا إليه. فأجا حدا قال لهم لا، نحن مع الرئيس سلام بالتفاوض. أنا قلت: “دولة الرئيس بدنا لبنان، نحن معك للآخر، بدنا انسحاب بالتفاوض وإعادة إعمار بالتفاوض”.

حول من تمثل
اللي عايش بالجنوب مش مثل اللي عايش برا، بكندا أو ببيروت. أنا بنت المنطقة، عايشة فوق الجو كله، بروح على الدكان وبسمع الناس. جارنا اللي بيعبي مي، كلهم جيراني. أنا اللي عم بسمع. بعد الحملة اللي صارت علي، اكتشفت حجم الدعم من أولاد الجنوب، حتى من جمهور حركة أمل وحتى من بيئة الحزب. بتوصلني رسائل من ناس حاطين صورة السيد حسن بروفايل بيقولوا لي “أنت ما حكيتي شي غلط”.

لماذا أزعجهم التفاوض؟
اللي زعج بيئة الحزب هو كلمة “بدنا التفاوض”. يمكن لأنه ما بيناسبهم وجود دولة من الأساس، وما بيناسبهم دولة تتفاوض. لو قلت بدنا إيران تتفاوض مع أمريكا ومع إسرائيل، كنت صرت بطلة عندهم.

هل التفاوض ضرورة؟
لما تكوني بموقف مضطرة تختاري. كثير من أهل الجنوب اختاروا المقاومة لفترة ظناً منهم أن قدراتها هائلة. أخذوا قرار إسناد غزة، وقبله إسناد سوريا ونجحوا بحماية نظام الأسد. سنة وشوي كان في اغتيالات، حتى وصلنا للبيجر. نتنياهو قال وقتها “في كثير مفاجآت”. كانوا يعرفوا وينهم ويغتالوهم بالسيارات وببيوتهم وبغرف نومهم، حتى فخخوا البيجر. وباليوم الأسود 23 أيلول ضربوا صواريخ، نحن أهل الجنوب اللي تهجرنا تحت القصف. أنا كنت ساكنة جديد بدار الزهراني، ناقلة من ضيعة زوجي صربا. فجأة صارت البنايات تنزل، كبيت بناتي بالسيارة وظهرت حافية. نحن اللي أكلنا الصدمات.

التشكيك بهويتها الجنوبية
بلشوا يقولوا “عبير منا جنوبية، ما بتمثل أهل الجنوب، متجوزة من غير دينها، أهلها مش راضيين عليها”. صار انتحال صفة، ما بتمثلنا.
أنا جنوبية جنوبية، خلقت وتربيت وعشت ودرست وتزوجت هون. نفوسي قبل ما أتزوج كان بعبدا – الغبيري، بعد ما تزوجت صار نفوسي النبطية، بنتخب بالنبطية. وحتى نايب رعد وقبيسي مش من النبطية وبينتخبوا فيها. ما حدا فيه يشكك بهالشي. ولما قالوا ما بتمثلي أهل الجنوب، أنا ما عم بحكي باسم كل أهل الجنوب، أنا عم بحكي باسم اللي بيشبهوني، اللي بدهم لبنان، اللي بدهم سلام وأمان. وهيدا مطلب الأكثرية. أنتم فئة كثيرة قليلة، أنا ما عم بحكي على لسانكم.

الأصوات المعارضة داخل البيئة
شفنا مشكل بكفرجوز، صار في منع لرفع صور الشهداء. هول الشهداء أحلى وأطهر شباب قدموا روحهم، مغرر بهم، قالوا لهم أنتم عم تستشهدوا كرمال وطنكم. صار في خوف، الناس ما بدها تتعرض لخطر. الجمهور اللي أنا بمثله جمهور كبير، منه صامت ومنه صار يحكي وطلعت الصرخة.

هل كان مشهداً مدبراً؟
اعتبروا أن المشهدية مدبرة، أن الرئيس سلام متفق معنا لنقول نحن مع الدولة. بدل ما تطلع عبير مروة، كان لازم تطلع أم شهيد لحزب الله. الحقيقة أننا كنا مجموعات من ثورة 17 تشرين، من التحالف اللبناني الوطني LNA وأنا مسؤولة إعلامية فيه. اجتمعنا قبل بيوم وقلنا جاي رئيس الحكومة لتاني أو تالت مرة ونحن بعدنا ما عملنا مبادرة كصوت وطني حر. بدنا دولتنا، بدنا الجيش، بدنا دوريات قوى الأمن هي اللي تحمي وتحاسب. بدنا قرار الحرب والسلم بيد الدولة، بدنا سلام وأمان مش كل شوي نضب أغراضنا ونفل ونكون رهن قرارات خارجية.

صورة المرأة الجنوبية والهجوم الشخصي:
أنا ما بشبه الصورة النمطية اللي بدهم ياها للمرأة الجنوبية. أنا امرأة حرة وفكر حر، هيدا ممنوع. بدهم ياني أحكي مثل الببغاء. فاتوا على خصوصيتي، أنا متجوزة مسيحي وزواجي بالكنيسة. أنا كامرأة شيعية تزوجت زواج مختلط عم بعطي الصورة اللي لازم تكون بلبنان. أنتم بتدعوا للعيش المشترك وبتعرضوا صور مقاتلين مع العذرا ومار شربل، طب حاربتوني ورجمتوني لأني متجوزة مسيحي؟ وحتى خيي اللي توفى بحادث سير قالوا عنه كان بقوة الرضوان ومتبرى مني. خيي توفى بحادث على طريق النبطية – زفتا، كان عمره 17 سنة وكان معهم. أنا بقول الحمدلله أنه مات بسبب الفوضى وغياب القانون، مش كرمال نظام ديكتاتوري.

ماذا نريد من الدولة والجيش؟
بيسألونا شو منتظرين من الدولة وشو حيعمل الجيش؟ بيعملوا له إنذار بيفل؟ أكيد حيفل نحن وأنتم والجيش، بدنا نكون واقعيين. الجيش اللبناني 40 سنة ما عم ينبنى، معيشته 200 دولار بالوقت اللي دويلتكم كانت تكبر وتتمدد. ما سمحتوا له يتسلح. فرجانا قدراته بعرسال ونهر البارد، باللحم الحي. نحنا عنا إيمان وثقة فيه بس ينعطى قدرات ويكون في قرار سياسي.
جربنا السلاح والمقاومة، شو كانت النتيجة؟ احتلال ودمار. لولا التفاوض اللي عمله الرئيسان كان تمدد الاحتلال أكثر. نحن عايشين فوق المدفعية والغارات وصوت الطيران لحاله رعب. أي شي بينطلق من لبنان على إسرائيل ما حدا بيعرف شو مصيرنا، نحن حقل تجارب لأسلحته.

اتهام العمالة
إذا تهمتي أني عم طالب بالدولة بكل لبنان، وعم طالب بالسلام والأمان لأهل الجنوب، وأنا مستأجرة وفوق بالمنطقة وبنت صربا وعم بطلب السلام لكم ولمناطقكم، فإذا هيدي عمالة، أنا عميلة لدولتي، عميلة لحكومتي، عميلة لجيش الوطن اللبناني. نعم أنا عميلة.

هل غادرتِ النبطية خوفاً؟
صار لي أسبوعين عم شوف بيت لأنه فوق ما في مقومات حياة أبداً. بنتي بالحضانة بكفرجوز وإيدي على قلبي من الحرب. عايشة فوق تروما كل يوم، ما بنعرف شو بصير، صوت المدفع بهز البيت. الحياة بالنبطية شبه مشلولة، المدارس مش كلها فاتحة، الأهالي بين بيت مستأجر برا وبيت بالنبطية. أنا عم شوف بيت مشان بناتي وزوجي شغله ببيروت. اللي بيعرفني بيعرف أني ما بخاف.
اللي بده يستقوي، إسرائيل أقرب إلكم مني، اطلعوا فوق فرجوا عضلاتكم فوق.

أرقام الثقة بحزب الله
الاستطلاع اللي نشرته منصة الدولة بيقول: 37.1% يثقون بحزب الله كثيراً، 22.4% يثقون إلى حد ما، 23.6% لا يثقون إلى حد ما، 14.9% لا يثقون على الإطلاق. 40.1% يشعرون بخيبة أمل وغضب وقلق من تعامل قيادة الحزب. حول القيادة الشيعية المفضلة مستقبلاً: 51.5% يفضلون قيادة سياسية ذات خبرة، 22% جيل جديد من الشباب، 5.9% فقط يفضلون القيادة الحالية، 4% يفضلون قيادة دينية.

الانتخابات
لو في انتخابات هلا حتعكس هيدا الواقع. بالانتخابات الماضية كان معدل التصويت 35%، الثنائي بكل حشده جاب 30% بالكثير من الجمهور الشيعي. بعد الحرب والهزائم والخسائر والإحباط، وحتى المغتربين اللي قهرهم على بيوتهم وأملاكهم بالضيع الحدودية اللي حطوا جنى عمرهم فيها، أكيد حيغيروا رأيهم.

المساعدات وإعادة الإعمار
حزب الله عم يوزع مساعدات حسب إذا بيته رايح كله أو لا، وعم بيقول الأموال جاية من إيران. في ناس بالنبطية معولين على هالمبلغ ليدفعوا سلف 6 أشهر وسنة لبيوت، ليشتروا تدفئة، ليسجلوا أولادهم. تقسيط المساعدة دليل أنه بوضع مأزوم مالياً. من جهة ما بدهم الدولة، ومن جهة بدهم الدولة تعمر وتساعد وتدفع. يا ريت يكون عندهم خيار الدولة، لنكفي بهالبلد.

معارضة شيعية أم وطنية؟
نحن من الأول مجموعات الثورة وموجودة بالأرشيف. كل قضيتنا نحارب النظام الطائفي اللي بصنفنا شيعي سني مسيحي درزي. أنا ضمن التحالف الوطني اللبناني LNA بنفس مبادئ 17 تشرين. إذا بدي اشتغل فلمصلحة وطن، لمصلحة لبنان. أكيد من قلب البيئة الشيعية لأنه مجموعتنا فيها كل الطوائف. إذا بدنا نتقسم مناطقياً وطائفياً فليكن، أنا معارضة شيعية، بس أنا وطنية.

المتفجرات المضبوطة:
أنا بعدني بعول على شوية حكمة عند قيادة حزب الله أنه ما يستعملها بالداخل. يمكن هالشي مؤشر أنه الحرب مستمرة وفي مزيد من الاحتلال فبدو يحضر مناطق ملغمة للعدو الإسرائيلي. بضلني متفائلة أنه ما ح يستعمل التجارب السابقة معنا نحن اللبنانيين. هو بحاجة للداخل اللبناني ليرجع يتقبله، مش من مصلحته ينطوي أكثر ويخلق عداوات.

هل انتهى زمن الترهيب؟
الحالة اللي عايش فيها الحزب من انهزام وصدمات بتمنى ما تنقلب علينا بالداخل. بتمنى يتقبل الرأي الآخر ويكون عنده حد أدنى من الديمقراطية، لأنه زمن الاستقواء والسيطرة والرعب والتخويف انتهى. أي محاولة حيعملها بالداخل حتنقلب عليه أكثر.

ثالثاً: جدول بالمواضيع التي طُرحت