جورج يونس/لبنان قِطارْ العُمِرْ اللي رَحْ يُخْلَصْ

57

لبنان قِطارْ العُمِرْ اللي رَحْ يُخْلَصْ…

جورج يونس/28 ايلول 2019

مسموح نموت ونشحَذ ونِتْسَمَمْ ونُمْرَضْ

مسموح ناخًذْ إدوية أعصاب ونشتري دولار، مسعرو مصرف لبنان بِ 1520، بِ 1700

مسموح نُقْعُدْ ساعات بالشمس تندفع ضرايب وحدهم بيستفيدو منها

مسموح نْبَخِرْ زعما الحرب اللي خربونا وسرقونا وأفلسونا

مسموح نُقْعُدْ بلا شغلا لأننا ما منقرب حدا من العِيَلْ الحاكمة

مسموح نِتْشَفَعْ لالله وللأنبياء والقديسين ونُطلب معونتهم

مسموح نُنْصُبْ اذا كنا عم نشيل حصة لأحد أمراء هالايام التعيسة

مسموح نوقف ع بوابهم ونعيش مع الزبالة ونشِمْ هواء ملوث

مسموح نوَدِعْ كل يوم أهلنا ورفقاتنا بسبب طرقاتنا المظلمة والخطرة

مسموح ندفع أغلى فاتورة موبايل لأسوأ خدمة

مسموح ندفع ثلاث فواتير ماء وفاتورتين كهرباء

مسموح نسوق كلنا “بيكانتو” لأنو ما بقى في حمير تنساق غيرنا بالبلد

مسموح نروح بكمين كرمال هالقريعات، ويجو يدفنونا وهني عم بدخنو سيغار وضِحكِتهم رَطِلْ

مسموح ندفع بالمحكمة مخالفات مش مبلغيننا فيها بعد ما نعطِلْ كل شغلنا

مسموح ندفع أغلى فاتورة طبابة بمستشفى محتلة غرفو الفيروسات

مسموح نِتبَهدَلْ ساعات بسبب طوفان الطرقات بالشتي

مسموح إنو ولادنا يتركو المدارس والجامعات الخاصة لولادهم

مسموح إنو نْهِجْ من البلد كرمال هني يحتلو ويصادرو خيراتو

مسموح إنو نتقشف كرمال هني يعيشو عيشة ملوك ونعيم ورحلات سندبادية

مسموح تسكر ثلاث ارباع المحلات والمطاعم والشركات بأسواقنا لأنو روادها ما معهم بقى ياكلو

مسموح نبيع حالنا لعهرهم وعمالتهم ومصالحهم وكملو ليبطل يخلص الحكي…

اللي مش مسموح إنو نعلي صوتنا أو نعترض، أو نقول آخ ونبكي لأننا موجوعين. مش مسموح إنو نسحب أموال أتعابنا من بنوكي هني أصحابها وإذا سحبونا بدفعونا عليها عمولة بدون موافقتنا. مش مسموح نوقف سياراتنا بدون ما ندفع باركينغ لشركاتهم، مش مسموح يكون عنا كرامة، مش مسموح نسافر بدون ما نسدد ضريبة الخروج، مش مسموح نسبح إلا بمنتجعاتهم المصادرة من املاك شعبنا، مش مسموح نتظاهر لأنو زعرانهم بيجتمعو علينا…

هيك ومن وراهم صرنا نعرف شو يعني أخر الدني، وشو يعني إنو هتلر ونيرون وهولاكو كانو عادلين مع شعبهم مقارنةً بأعمالهم، بس الله كبير والموقدة عندو عم تكبر مساحتها وحراس النار ناطرين ابطال الظلم من عنا تحتى يولعولهم أكبر موقدة.

هلقد بحبك يا لبنان