غَمَرتونا بمحبّتكن…
الكاتب والمخرج يوسف يعقوب الخوري/18 نيسان/2023
جيتوا كتار عزَّيْتونا، وكتار طلبتوا الرحمِه لَـبيّي بـاتّصالات مباشرة أو عبر وسائل التواصل المتاحَه. يا ريت بِـقدَر رِد عليكن فردًا فردًا، بس اعذروني عدَدكُن بالآلاف ونحنا بعدنا عم نستقبل المعزّين، وبـهالحالِه يمكن تاخِدلا القصَه شي أسبوع تَ نشكِركُن عَ غيرتكن ومحبتكن. ولأنّو “متى فاتِت باتِت”، لقيت إنّو الأفضل اشكر الجميع بـرسالِه جَماعيِه شاملِه، وقول:
غمرتونا بِـمحبّتكن يا غوالي!! بـاسم عَيلتي، وعيلِة خَيّي نادر، وبيت الخوري بـالصفرا، كلّ الشكر والحب على وَقفِتكُن حَدنا بِـرحيل يعقوب بيّي.
بِـمأتم يعقوب حصلت أمور غير اعتياديِّه، ومنها؛
غياب ممثلي التيارات والأحزاب والجبهات، وكمان غياب النوّاب والوزرا الحاليين والسابقين؛ لا نحنا نعيناهُن ولا هنّي تحمّسوا يجوا يعزّونا لأنّو مش موسم انتخابات هـالإيّام.
تبيّن إنّو لِـجنازات ما بتتأثّر، وبتمشي كتير منيح، من دون ما تنعي النايب والبيك والزعيم للوجاهة.
الرسميين لِـقلال اللي حضروا لِـجنازة، حضروها بِـحكم الصداقة بيناتنا لا أكتر ولا اقل، وعيلتنا بتخصّهن بـالشكر لأنّهن إجوا تَـيعزّونا مش تَـيعملوا حملات انتخابيِّه.
وما فينا إلا نخصّ بِـشكر كبير؛
– أبو أرز اللي عزّانا من منفاه الاختياري وبَعَتلنا باقة زهور باسمُه.
– مجلس قيادة حزب حراس الأرز اللي أعضاؤه ما تركونا وكأنهن من أفراد عَيلتنا.
– عَيلِة المرحوم عامر الفاخوري اللي عزّتنا من المهجر ووصلنا منها إكليل زهور.
– هيئة كسروان – الفتوح بالتيار الوطني الحر اللي بَعَتِت صليب زهور.
وأنا شخصيًّا بِـشكر من صميم صميم قلبي نوّاب كسروان وجبيل لأنهن ما إجوا، وما شاركونا أحزاننا ولا واسونا. ما بلومهن، شكلو انتخاب رئيس للجمهورية، وتشريع الضرورة للتمديد للبلديات، والسهر عَ مصالح الشعب، كتير شاغلينهن، حرام.
بيّي،
رح ضل حامل اسمك بـقلبي وبـتوقيعي، وليلّي ما بـيعرف، أنا بُـمضي أعمالي الفنّيِّه بِ اسم “يوسف ي. الخوري”، ودايمَن بْـيسألوني شو الـ “ي.”، وأنا بْـجاوب: “يعقوب”
