لو بتحلّوا عنّا… لو بتتركونا نشتغل ونعيش… لو بتتوبوا لربّكم، وبتحسّوا ع دمّكم، وبتشبعوا صفقات وسرقات…
جورج يونس/20 تشرين الأول/2026
لو بتحلّوا عنّا… لو بتتركونا نشتغل ونعيش… لو بتتوبوا لربّكم، وبتحسّوا ع دمّكم، وبتشبعوا صفقات وسرقات… كنا فرجيناكم كيف القيادات الحقيقية بتهتم بناسها، وكيف الأنا ما بتوصل عالسما، وكيف الكفن لا كان عنده جياب، ولا بعمرو رح يصير عنده جياب.
كنا فرجيناكم كيف الراعي الحقيقي بيهتم بقطيعه، ومش متل الراعي اللي عنا. كنا خبرناكم كيف، لما الذئب بيصير بالحبس، ليلى ما بقى بتخاف من دروب الطرقات الوعرة.
كنا فرجيناكم إنّو شبابنا، اللي إنتو وأفعالكم هجّرتوهم على دول العالم، واللي زيّنوا الدني بنجاحاتهم، هني الأمل الوحيد لخلاص هالبلد، بعدما دمّرتوا كل شي فينا وحوالينا.
كنا فرجيناكم كيف الكنوز بتتكدّس بالسما، مش بالحسابات الخاصة، وكيف قيمتها الحقيقية من تعبنا وشقانا ونضالنا، مش من سرقة أحلام الناس وحقوقها.
كنا فهمناكم شو يعني وطنية، وشو يعني ولاء وانتماء صافي للبنان. كنا أثبتنالكم إنّو اللي بيبيع وبيشتري بمصير شعبه، واللي بيرهن مستقبل وطنه لمصالحه، خائن لبلده وللأمانة اللي ائتمنه عليها شعبه.
كنا فرجيناكم كيف بتنبنى الأوطان، وكيف بيكونوا رجال الدولة عن جدّ، مش رجال الصفقات والمصالح الخاصة.
#يوم_الإبداع_اللبناني بالـ٢٠٢٠، لما جمعنا بساحة الشهداء أكتر من ٤٢٠ مبدعًا، عم يرقصوا ويغنّوا ويرسموا وينحتوا ويترجموا أفكارهم إبداعًا على أرض الواقع… بوقت كنتوا إنتو عم تسألوا الإعلام: «وين النخبة؟ دلّونا عليهم!»
نحنا وقتها دلّيناكم عليهم، وعرّفناكم مين نحنا، وشو في عنا طاقات، وشو فينا نعمل لما الفرصة بتسمحلنا نشتغل ونبدع.
وبكرا، الأحد ٢٥ تشرين الأول ٢٠٢٦، ومن قلب ساحة ساسين بالأشرفية، رح نخبركم من جديد، عبر #سباق_الأشرفية_١٠٤٥٢، كيف نحنا منحب لبنان وشعبه.
رح نخبركم كيف منزرع الفكر والإبداع والفرح بدروب شبابنا، وكيف منحوّل الرياضة إلى رسالة، واللقاء إلى مساحة جامعة، والتعاضد إلى سفينة خلاص، لنبلّش سوا ببناء وطن بإيدين أبنائه، ولأجل مستقبل أجياله.
إنتو ما عرفتوا، ويمكن ما بدّكم تعرفوا، قيمة هالأرض وترابها المقدّس. ما عرفتوا شو يعني شاب يقدّم عمره وراحته ومستقبله كرمال يبني وطن. وما فهمتوا ليش في مناضلين متلنا نذروا عمرهم كرمال تقوم دولة، دولة بكل ما للكلمة من معنى، دولة بتحمي الإنسان وبتصون كرامته وبتحفظ حقوقه.
بحياة اللي خلقكم، فكّوا عن سما ربّنا، واتركوا اللي متلنا يشتغل لمصلحة لبنان!
بدل ما تحاربوا كل مبادرة، وتضيّعوا كل فرصة، وتطفوا كل شعلة أمل، تعلّموا من الناس اللي بعدها مؤمنة بهالأرض، وبشبابها، وبقدرتها تقوم من تحت الركام.
نحنا ما منستنى الفرص من حدا… نحنا منخلق الفرص.
ونحنا ما منستنى حدا يعلّمنا كيف منحب لبنان… لأنّو حبّ لبنان بالنسبة إلنا مش شعار، ولا صفقة، ولا وسيلة للوصول إلى سلطة أو مصلحة.
حبّ لبنان فعل، وتعب، ونضال، وإبداع، والتزام.
وإذا إنتو خلّصتوا الفرص بعمالتكم وفسادكم، نحنا بعدنا منخلق الفرص بإيماننا، وبعرقنا، وبإبداعنا، وبإصرارنا إنّو لبنان بيستحقّ وطنًا أفضل.
لأنّو الأشرفية البداية… ولبنان النهاية.
ولأنّو مهما دمّرتوا، بعد في ناس بتبني.
ومهما سرقتوا، بعد في ناس بتعطي.
ومهما هجّرتوا، بعد في ناس بتحلم.
ومهما حاولتوا تطفوا النور، بعد في لبنانيين بيخلقوا من العتمة ألف شعلة أمل.
هيدا نحنا… وهيدا لبنان اللي منآمن فيه.
جورج يونس
صاحب فكرة يوم الإبداع اللبناني
منسّق سباق الأشرفية ١٠٤٥٢
#يوم_الإبداع_اللبناني
#سباق_الأشرفية_١٠٤٥٢
#الأشرفية_البداية_لبنان_النهاية
