كِبِر السبع وشاب، وصار مسخرة للكلاب/إرث البشير نحنا اللي حملناه بقلوبنا المكسورة، وبحساباتنا المصرفية الفارغة، وببيوتنا المتواضعة، وبحلمنا اللي من يوم رحيلو ما عرف يتبخّر
جورج يونس/06 أيلول/2026
آخ، ما أبشعك يا هالأيام! لما الفاجر صار بالدجل عم ياكل مال التاجر! لما الكراكوز والسكرجي صار بدّو يهشّم تاريخ الأبطال! لما القاتل صار بدّو يقتل القتيل ويصليلو بقداديس بكذب فيها عَ الله! لما بتُنْسَبْ البطولات لكل واحد تخبّى وهرب تكتيكيًا بزمن اللي كان خيالة الساحات كتار، بس الأبطال الحقيقيين كانوا قلال! ولما المال المخطوف من عرق ودم المقاومين الحقيقيين رح يصير هوّي مقياس الرجولة، ومعيار الحقايق المشوّهة، وبوصلة القضية المسروقة!
صور الباش، مش نحنَا اللي أمرنا بإزالتها من المكاتب. صليب المقاومة، مش نحنا اللي أصدرنا مذكرة بمنع استعمالو. القرآن، مش نحنا اللي صَرَحْنا ع صفحات مجلتنا إنو مُنْزَلْ! السلا.ح، مش نحنا رفعناه بوجه البشير! رفاقنا بالساحات، مش نحنا اللي نكرنا تعبهم، ولو قد ما اختلفنا معهم! كميونات السلاح، مش نحن اللي بعتناها للشيخ نعيم تبع الممانعة وقت كان محاصر بشارع الحجاج! ويوم اللي تعرّضت المقا.ومة اللبنانية لخطر إلغائها، نحنا اللي تركنا بيوتنا لسنين لندافع عن حقها بالوجود.
مع السوري، ومع الإيراني، ومع الفلسطيني، نحنا لليوم ما عنا ولا صورة، ولا جلسة، ولا تحالف انتخابي، ولا زيارة عزا؛ بوقت صوركم، على ما يقدّر الله، بعدّة مناسبات وبعدّة زيارات، وبتقولوا عنا: إنو نحنا السرايا!!!
إرث البشير نحنا اللي حملناه بقلوبنا المكسورة، وبحساباتنا المصرفية الفارغة، وببيوتنا المتواضعة، وبحلمنا اللي من يوم رحيلو ما عرف يتبخّر.
فخرنا إنو الأكثرية منّا كانوا الأقرب لقلبو ونبضو ونهجو ولسجل أسرارو وإنجازاتو، ولو قد ما شوّهتوا بصورتنا. وبكفي إنو بساعة القرار، كانوا الشرفا والأبطال منّا هني ذراعو التنفيذي.
تلال زحلة، وعيون السيمان، وقناة، وطوابق الهوليدي إن، وأزقّة الأسواق بحرب السنتين، وطرقات شكا، وغرف القرار بالولايات المتحدة، وشوارع الأشرفية وبيروت، وفريق العمل الضيّق لوصول البشير إلى موقع الرئاسة؛ هني اللي بصموا التاريخ بإسمنا وبأفعالنا، سواء حبيتونا أو أنكرتونا.
إنتو اخترعتوا الكذبة وصدّقتوها. إنتو خيّطتوا الخيانة عَ قياس الأبطال اللي تاريخهم كاشفكم، وبِعْتوها للأجيال اللي ما معها خبر بحقيقتكم. إنتو غسّلتوا أفعالكم السودا بعقول شباب ما بتعرف عنكم إلا اللي إنتو خبّرتوها ياه، بسردياتكم الدونكيشوتية.
بكفينا فخر إحترام الناس اللي بتعرف التاريخ والحقيقة وين ما بيتواجد حدا منّا. بكفّينا فخرْ إننا نحنا ولا يوم جرّبنا نزور الحقيقة. بكفينا فخرْ إننا لليوم ما تعلّمنا نقول إلا الحقيقة، قد ما كانت صعبة. بكفينا فخر إنو من داخل مجلس القيادة كنا ضد إتفاق الطائف وضد التنازل عن الصلاحيات. بكفينا فخرْ إنو نحنا قاتلنا وواجهنا كرمال قضية، بس ما قتلنا لحسابات إنتقامية. حتى الاغتيال المعنوي اللي كل فترة بتجرّبوا تعملوه فينا، نحنا ما عملناه معكم، لأن أفعالكم وحدها هيّي متكفلّة بِحَفِر صورتكم بعقول اللي بيفهوا واللي ما بيعرفوا يكذبوا. بكفينا فخر إننا كنّا بشيريين وبقينا بشيريين، ومن واضعي ركائز أكاديمية بشير الجميل، مهما تطاولتم وتماديتم في تشويه صورتنا وإستنساخ الأكاديمية.
بالنهاية، حكمكم “مُبرَم” على صفحات القضاء وعلى أيادي أنزه فرسانه، وحكمنا باقٍ تجاه قضية وجودنا والتزامنا بالـ١٠٤٥٢ كلم²، وتجاه المبادئ التي رسّخها البشير بأحلامنا وعقولنا.
بشير حيّ فينا.
