يا باب بيت مهجور بضيعتنا اهلوا فلوا وما رجعوا
الخوري طوني بو عسّاف/فايسبوك/25 تشرين الأول/2024
وينك فتحني وفوت
ما تضلّ عنّي بعيد
ما عاد طلّ العيد
صوت الأحبّة سكوت
سكّرتني وفلّيت
وخشاب لونن حزن
من مين آخد اذن
تا هجرت عالسكّيت
العتبة اصفّرو خدودها
تبكي فراقك دمع
وبيضلّ شمخة صمودها
ضوّت رجاها شمع
قدّام بيتك هيش
عملو الحشيش دروع
وحتى البيت يعيش
لملم عا حيطو دموع
جدّك وجدّي كان
صوتو جرس مسموع
جمّع سنينو طلوع
ماشي وترك عنوان
لبيكون مع ربّو
وعايف هالدني
والناس بتحبّو
بأخلاقو غني
بيترك بوابو صمت
وحدو الحجر يحكي
كتابو وجع محكي
يبكي وانا ابكي
هيهات ترجع ناس
تحمل وفا واحساس
تفطر كرامة نْ صُمت
غمّضت عيني ونمت
احلم بهاك الباب
اسرح مع السرساب
خلفك لكانو كتار
وكتار صارو تراب
تركو لنا الدهشي
“وفي تراب باقي تراب
وتراب عم يمشي”
وحضور صار غياب …..
الخوري طوني بو عسّاف
#لاهوت_الوجود
