راح نجاوب بطريقا مختصرا ومبنيّي عالعِلم مش عالتعصّب متل ما بِفكرو بعض الناس.
١ـ اللغات السّاميي القديمي الأساسيي تلاتي: الآراميّي ـ العربيّي ـ والعبريّي، وهاللغات بيشبهو بعضن كتير لدرجي إنّو سمّوهن اللغات الأخوات Sister languages.
٢ـ اللغا الآراميّي هيي لغة جدودنا، وانتشرت بكل المنطقا مع انتشار الحضارا الفينيقيّي يلي كانت مزدهرا أكتر من غيرا، ولها السبب المسيح حكي لغّتنا وبشّر فيها بمجامع اليهود، وشعوب المنطقا من هون لبلاد ما بين النهرين اعتمدوها ومع الوقت صار اسما اللغا السريانيّي.
٣ـ اللغا العربيي بقيت محصورا بشبه الجزيري العربيّي، وانتشرت مع الفتح الإسلامي سنة ٦٣٢، ومع الوقت تطورت وصارو العرب اليوم يستعملو اللغا العربيي المحكيّي بمجتمعاتن وببيوتن، بينما اللغا العربيي الفصحى بيستعملوها بس بالكتابي والخطابي والإعلام.
٤ـ اللغا العبريّي كانت وما زالت لغة الشعب اليهودي، واستعملا ودوّن فيها تاريخو من خلال كتب العهد القديم، واليوم تطوّرت مع الوقت متل غيرا وصارت اللغا العبريّي المحكيّي حالياً.
٥ـ الشعب اللبناني وخصوصاً أهل الجبل ضلّو يستعملو اللغا الآراميّي ـ السريانيّي لغاية القرن ال ١٣ تقريباً، ومن بَعدا بلّشو يستعملو اللغا اللبنانيي المحكيي يلي عم نستعملا اليوم بمجتمعاتنا وبيوتنا، ولكن بعدنا عم نستعمل اللغا العربيي الفصحى بالكتابي والخطابي أحياناً.
٦ـ أهل الشمال وخصوصاً جبّة بشرّي ضلّو يحكو اللغا الآراميّي ـ السريانيي لغاية القرن ال ١٨، ولها السبب بعدن أهل شمال لبنان بيستعملو لليوم اللهجي الآراميي متل: بورودي بدل بارودي ـ موروني بدل ماروني ـ أنا رويح بدل أنا رايح… إلخ.
٨ـ كل قرى لبنان والضيَع والبلدات أساميها آرامي ـ سرياني: بعض الأمتال: رشميّا = راس المي (بالآرامي السين = شين، والشين = سين) ـ راشيّا = الرؤوس ـ بزمّار = محل الترنيم ـ كفريّا = قرى بالجمع ـ كفرزينا = قرية السلاح ـ بكاسين = بيت الكؤوس ـ جزين = المخزن.
٩ـ كل القرى والضيَع يلي اساميها بتنتهي بِ (إيل) بكون تسمّت عَ إسم الإله إيل إله الفينيقيي، متل بدنايل ـ سعدنايل ـ تعنايل، بعلبك اخدت إسما من الإله بعل.
١٠ـ يلّي بيدرس عِلم اللغات Linguistic، بيصير يعرف انو اللغا اللبنانيي بتختلف عن اللغا العربيي واللغا العبريي بطريقة تركيب الجُمل، متل: أنا عم باكل ـ أنا عم إشرب، (العم) تركيب آرامي، العرب بقولو أنا آكل، أنا أشرب.
١١ـ مفردات كتيري ومصطلحات كتيري نحنا منستعملا، مش موجودي باللغا العربيي، نحنا منقول: شوب ـ دقر ـ شقل ـ شكارا وحاكورا ـ بحش ـ توك … إلخ والعرب بقولو: حر ـ لمس ـ رفع ـ قطعة أرض ـ حفر ـ عطل.
نحنا منقول: لعوَس ـ حركش ـ فشّاط ـ شلح تيابو ـ زمط بريشو ـ شمّر عن زنودو، العرب بقولو: مضغ ـ افتعل الشيء ـ كذاب ـ خلع تيابه ـ خلّص راسو ـ كشف عن ذراعيه.
١٢ـ إلتقاء الساكنين بأول الكلمي تركيب سرياني، مش موجود باللغا العربيي متل: نحنا منقول: كْتاب ـ بْريق ـ بلاط ـ بحمدون ـ بمهرين ـ بنشعي إلخ… العرب بقولو: كِ تاب ـ إبريق ـ بَ لاط ـ بَ حمدون ـ بَ مهرين ـ بَ نشعي.
١٣ـ يلّي بيتعلم اللغة الآراميي بصير يعرف انو اللغا اللبنانيي المحكيي هي بنتا، بينما اللغا العربيي هيي خالتا، وللتوضيح منعطي هالمتل: ولد ماتت أمو هوّي وزغير وربّتو خالتو، وبس صار كبير صار مفكّر انو خالتو هي أمّو.
١٤ـ كل اللغات بتطوّر مع الوقت وبتتحوّل للغات محكيي، متل اللغا اللاتينيي يلي كانت كل شعوب أوروبا تستعملها، تطورت مع الوقت وصارت لغات محكيي، وبالقرن ال ١٣ تقريباً صار الشعب الفرنساوي يحكي فرنساوي مش لاتيني، والطلياني صار يحكي طلياني، والإسباني صار يحكي سبنيولي، والبرتغالي صار يحكي برتغالي… إلخ. واللغا اللاتينيي ماتت وصارت لغة تراث.
١٥ـ الشعوب العربيي بيستعملو اليوم اللغا المحكيي بمجتمعاتن وببيوتن، واللغا الفصحى بيستعملوها بس بالكتابي والخطابي والإعلام، وما منعتقد انو في إنسان عربي واحد بيستعمل اللغا الفصحى بمجتمعو وببيتو ومع أهلو، وهيدا بيعني انو اللغا المحكيي هي اللغا الحيّي، واللغا الفصحى هي لغّا زايلي مهما حاولو يعيشوها.
١٦ـ لازم يجي نهار تصير اللغا اللبنانيي المحكيي هي لغة البلاد الرسميي وتحل محل اللغا العربيي الفصحى، لأنو لازم نحكي متل ما منكتب، ونكتب متل ما منحكي.
١٧ـ الغريب بالموضوع هوي انو نحنا اخترعنا حروف الأبجديي من آلاف السنين، ونشرناها بالمنطقا وببلاد اليونان، واليونانيون عطوها للرومان، والرومان استعملوها مع شعوب اوروبا وسمّوها حروف لاتينيي، ونحنا تركنا حروفنا واعتمدنا الحروف العربيي، ومن وقتا صارو الناس مفكرين انو نحنا عرب ومنحكي عربي، وهالأمر بيشبه انسان أجنبي لبس عبايي عربيي وصارو مفكرينو عربي، وصار هوي كمان مفكّر حالو عربي .
