Lebanese anti-government protesters wearing protective gear amid the COVID-19 pandemic lift placards demanding the implementation of United Nations resolutions including the disarmament of armed groups in the country, during a demonstration in the capital Beirut, on May 30, 2020. (Photo by ANWAR AMRO / AFP)
صرخة حق. صرخة وجع. سموها ما شئتم. شخصيا ما بشوفا الا صرخة حق من نص قلب موجوع ومحروق. جوزفين حبشي/فايسبوك/28 تموز/2021
حدا يشرحلي كيف يعني ” ٤ اب موعد العودة الى الشارع”؟
انو منحجز موعد للثورة متل ما منحجز موعد مانيكور بيديكور؟ الاربعا الساعة ٥ مدام. لأ، sorry ما في محل قبل، مفولين.هيك يعني؟؟؟؟
انو عم نحدد وقت حتى المشغول يفضي حالو، والمسافر على بودروم ومارماريس سياحة اسبوع ب ٣٠٠$ (باعتلو ياهن ابنو او قريبو فريش ماني من المهجر) يكون رجع، واللي طلعوا عالجبل ليكبسوا بتنجان ويعملوا كشك ومربى يكونوا لحقوا الموسم؟
انا كنت كتير مآمنة بالثورة وموعودة بالتغيير، بس الثورة ما بتكون عالموعد. موعدها بكل لحظة لحد ما تتحقق المطالب.
كيف يعني مننزل ابو ساعة ساعتين قبل العشا، منرفع شعارات، منساند اهل ضحايا انفجار بيروت، وبعدين منتضبضب كل واحد على بيتو؟
منتلقح عالصوفا قدام المروحة (اذا في كهربا) ومنكمّل نضال عتويتر وفيسبوك وعلى واتساب مع مجموعات الثورة لاكتر من ٢٢ ساعة باليوم و bla bla bla bla.
كيف يعني الدولار بيصير ب ٢٣ الف ليرة، ونحنا ما مننهز؟
كيف بوطة السلطة بتعطل تأليف حكومة ٩ اشهر كرمال ولدين اضرب من بعضن، عم بيكبروا راس على بعضن، ونحنا ما مننهز. ولك كيف بتم تسمية شخص سارق الاخضر واليابس والتلفون والاسكان، ونحنا روااااااق، ما مننهز؟
ولك كيف رئيس جمهورية بيعترف بعضمة لسانو انو عرف بشحنة الموت بالمرفأ قبل اسبوعين بس c est trop tard، ونحنا ما مننهز؟
ولك كيف بيعطونا لقاحات مي وملح وما مننهز؟
ولك كيف بيعيشونا عالعتمة وبيخلونا ننام عالبلكون وعالسطح لنتكمّش بنسمة هوا، ونحنا ما مننهز؟
ولك كيف بيخلونا ندوّر بالشبر والندر على موتور حي بعدو شغّال، تا نشغّل جهاز اوكسيجين لأمنا اللي عم تختنق، ونحنا ما مننهز؟
ولك كيف بيخلونا نخترع ادوية من قريبو تا ما نموت، ونصلي يكون في بعد شوية تلج بشي تلاجة حتى نعمل لبخات على جبين طفل محرور وما عم نلاقيلو تحاميل بالصيدليات، ونحنا ما مننهز؟
ولك كيف ممكن يكون الجوع والفقر والذل وغياب الدوا والحليب والخفاضات والكهربا والمي والمازوت جامعنا كلنا، ونحنا ما عم ننهز، لأنو في شي اقوى بكتير عم بيفرقنا، اسمو زعيم فاسد.
ولحد ما يصير لبنان الحر السيد المستقل النضيف هو زعيمنا الاوحد، ما في داعي تعطوا مواعيد ثورة لحدا. هيك نوع ثورة بتهز البدن عالوحدة ونص،بس ما بتهز عروش.
