اليساري كارثي كيف ما قلبتوا، وكيف ما تقلب وتلون وتبدّل وتغيّر الياس بجاني/09 أيار/2024
لما ربنا خبرنا انو يوم الحساب الأخراني راح يحط المؤمنين ع اليمين والخطأة والشاردين عن الحق والسلام ع اليسار، كان بالغالب عم يقلنا بكل وضوح وبالعربي المشبرح، انو اوعا بيوم من الإيام يكون عندكون آمل او ثقة بيساري شو ما كان لونو، واوعا تصدقوا يساري وتمشوا وراه مهما غيّر وتلون، ومهما قال وحلّف انو انتقل من قاطع إلى آخر.
سبحان ربنا ما في يساري همو غير التدمير والمشي بعكس كل شي مفيد ولصالح البشر والبشرية والسلم والسلام..
بكل شعب في مرض قاتل، هو اليساريين يلي هني ضد حالن وضد شعبون، وهمهم وثقافتن الخراب والتخريب والترويج للمخربين. والمشي بالعكس.
في كتير يساريين بلبنان بيقولوا انون راجعوا تاريخن ورجعوا ع لبنان وع الفكر والثقافة اللبنانية، ولكن، هودي عملياً وواقع معاش عند كل كوع بيكوعوا وبيرجعوا ركض ع يساريتن البالية والحادقي والتدميريي.
أخطر هودي اليساريين هني يلي بيقولوا انون تابوا عن يساريتون، راجعوا تاريخن وصاروا سياديين واستقلاليين وضد حزب الله وضد الإيراني.
هودي نفسون بشي مية لون ولون، من جهة هني ضد حزب الله وحماس وإيران والأسد والإسلام السياسي، ولكن هني معون بجهادون وبحروبن وبإجرامن وهمجيتن…معي الشي وضدوا بنفس الوقت.
هني ضد حزب الله جوا لبنان، ومع الحزب بكذبة المقاومة والتحرير وحربه ع اليهود.
هني ضد سيطرة حزب الله ع لبنان واحتلاله، بس معه بالحرب العاملها من 08 تشرين الأول السني الماضيي ع إسرائيل.
هني مع استقلال لبنان وسيادتو، بس بدون يغيروا النظام، ويستنسخوا حالة ستالين وموساليني وجي غيفارا وكاسترو.
وبتطول قصص تناقضاتهن وحربائيتون، ولكن ما بيتغير جوهرن التخريبي والحاقد والمعاكس لكل شي طبيعي.
اليوم هودي اليساريين بلبنان ومهما كان لونون، ولأي مجموعة انتموا، وبأي موقع كانوا، هني عملياً مش مع حدا غي مع ثقافتنون البالية والعميا. لا هني مع لبنان ولا مع اللبنانيين..هني مع الخراب والتدمير والفوضى.
ربنا يحمي لبنان واللبنانيين من اليساريين مهما كان لونون، ومهما كان موقعن، لأنون ضد كل شي، ولأنو هيك يمكن ربنا خالقن.
***الكاتب ناشط لبناني اغترابي عنوان الكاتب الألكتروني Phoenicia@hotmail.com رابط موقع الكاتب الالكتروني على الإنترنت http://www.eliasbejjaninew.com
