اتيان صقر- ابو ارز/٣٠٠ مشنقة ل٣٠٠ مجرم وحرامي، ويلي مش عاجبو يدق راسو بالحيط

59

٣٠٠ مشنقة ل٣٠٠ مجرم وحرامي، ويلي مش عاجبو يدق راسو بالحيط.
اتيان صقر- ابو ارز/06 نيسان/2023

قدّيشُن كتار المهتمّين بالأزمي اللبنانيي وبموضوع إنتخاب رئيس للجمهوريي، أكتر من الهم عل القلب، اميركا وفرنسا والصين وروسيا والاتحاد الأوروبي والسعوديي وايران وقطر ودولة الامارات الخ … ويمكن “الشقيقا” سوريا كمان ازا “الأشقاء” العرب دعموها لتوقف ع جريها وترجع تْحَرتق علبنان من جديد.

وكل دولي من هالدول بدّا رئيس يكون عزوْقا ويناسب مصالحا، والمضحك المبكي انو اكبر الغايبين عن هل الاستحقاق هيي الدولي اللبنانيي!

يا لطيف اديش صار حيْطنا واطي وما بقي حدا ما فشخ من فوقو، ولا مرّا حسينا بإزلال اكتر من هل إزلال … من دون ما ننسا عمليات الشحادي والإيد الممدودي لبرّا، صرنا عم نشحد القمح والمواد الغذائية ومعاشات المعلمين وغيرو وغيرو، أما الشي البوجّع أكتر هوّي المساعدات الماليي يلي عم تجي للجيش من اميركا وقطر وغيرها لحتى هالعسكر يقدر يشتري خبز لولادو.

في حدا يقلّي شو نوعا هل الدولة العاهرا، ومن ايمتا كان لبنان يشحد الرغيف من برا، ما بحياتنا شفنا ذل اكتر من هيك، ولا حيط أوطى من حيطنا، وبالرغم من كل هالزل والبهدلي، العصابي الحاكمي مش عم تتزحزح عن كراسيها، وما حدا استحا عَ حالو وقرر يلبُط هل كرسي وينسحب بكرامي.

العصابة الحاكمة عدد افرادا حوالي ٣٠٠ شخص مش اكتر، وهني يلّي خرّبو الدني، ونهبوا اموال الناس، وأفلسوا الخزينة … وما في حل لمشاكل لبنان الا حل واحد وهوي تعليق ٣٠٠ مشنقا ل ٣٠٠ حرامي. واذا حدا عندو حل غير هيك يخبرنا عنّو؟

منرجع لموضوع رئاسة الجمهوريي، ناس بدّن رئيس تحدّي ضد “المعارضة”، وناس بدّن رئيس تحدّي ضد “الممانعة”، وناس، متل فرنسا، بدّن يدوْرو الزوايا، وعم يفتشو عَ مرشح توافقي، يعني “مخصي” لحتى يرضي الكل ما عدا لبنان.

اما الأحزاب والنواب “المسيحيي” المعنيين بهالأستحقاق أكتر من غيرن، فهنّي فايتين بِ بعضن متل العادي، واجتماعن اليوم بحريصا برئاسة البطرك هوي فاشل سلفاً وتضييع وقت وفلاحا بالبحر.

مرشّحنا ومرشح أكترية الشعب اللبناني هوّي مرشح تَحدّي، يعني رئيس قادر يتحدّى كل هل منظومي الفاجرا وحامل معو برنامج إصلاحي، اول بنودو هوي تعليق ٣٠٠ مشنقة ل٣٠٠ مجرم وحرامي، ويلي مش عاجبو يدق راسو بالحيط.
لبيك لبنان
اتيان صقر _ابو ارز