الحكومة قررت تعمل اتنخابات بلدية لانو خلصت مدتن … المهندس ألفراد ماضي/13 آذار/2025
نظرياً معا حق الحكومة، بس عملياً رح يرجعوا السياسيين الفاسدين ورؤوسا البلديات الفاسدين يتحكموا باكثرية القرى اللبنانية.
اكثرية رؤوسا البلدية حوّلوا القرى والمدن ل شركات عقارية او تجارية او هندسية او عائلية، واليوم عم بيحضروا حالن لاعادة انتخابن لاكمال سرقة المال العام وتغطية الفساد يلي عملوا بالماضي.
والمضحك المبكي انو بعض روؤسا البلديات عم بيطالبوا بزودة 30 الى 50 ضعف ضرايب بلدية، بالوقت يلي لازم هودي يتحاكموا وتنشال كل زودات ضرايب البلديات عن كاهل المواطن.
ولمعلوماتكن، بقسم من المال يلي سرقوا رح يشتروا، وبلّشوا من اليوم، اصوات المعتّرين والفاسدين ب القرى والمدن تيرجعوا يطلعوا رؤوسا واعضاء بلدية.
لانو البلدية كثير مهمة وهيي اساس الانماء والاصلاح، لازم قبل ما تدعوا للانتخابات:
•تعيينوا مدققين لكل بلدية تينعرف الصالح من الطالح …
•تكرموا الاوادم يلي عملوا من قراهن جنة، وتحاكموا يلي اعتبروا انو البلديات ملكن وملك عيالن وينحطوا بالحبوسة …
•تمنعوا كل يلي عليه شبهة فساد انو يترشح على الانتخابات …
•تعطوا الخيار للقاطنين ضمن نطاق البلديات، او يصوتوا بقراهم او بمحل سكنن …
وساعتها مندعي ل انتخابات بلدية!
اذا هيك صار، بيكون عن جدّ بلش الاصلاح والا ” مرحبا اصلاح”…
