يا ريت الإستيذ نبيه بيحترم عقولنا وبيبطل يحكي عن الدستور الياس بجاني/25شباط/15
تحت عنوان، “بري: المطلوب تطبيق الدستور في عمل الحكومة”، نقلت الوكالة الوطنية للأنبار اليوم الخبر التالي: (“الأربعاء 25 شباط 2015 /وطنية – أخذ ملف النفط حيزا كبيرا من لقاء الاربعاء النيابي اليوم، ونقل النواب عن رئيس مجلس النواب نبيه بري تأكيده “وجوب الاسراع في اصدار مرسومي النفط، في اطار الدفع في اتجاه الافادة من ثروتنا النفطية، وحماية حقوقنا في وجه محاولة السرقة الاسرائيلية”. وفي الاطار السياسي، نقل النواب “ان لا جديد على صعيد ازمة آلية عمل الحكومة، وجدد بري تأكيده تطبيق الدستور في هذا المجال، متمنيا على رئيس الحكومة الدعوة الى جلسة لمجلس الوزراء في أسرع وقت لتحريك عمل الدولة وفقا لهذا المعيار”.)
عندما نقرا هيك خبر منقول عيب والله عيب استغبائنا إلى هذه الدرجة، ويا ريت الإستيذ بياخدنا بحلمهه وبيبطل مواعيظ هو نفسه ما بيمارس منها شي بالمرة.
صحيح اللبناني بالإجمال قلبه كبير، وفهلوي بفكره الضيق والنرسيسي، وبيمرِّق شغلات كتيرة بمزاجه،
وصحيح المصلحة الذاتية الجايي من جيناته الفينيقية المغلفة بالأنا هي يلي بتحركه،
وصحيح عينو ديقة وعندو اتنين عجقة،
وصحيح بيحب يقبض من دون ما يشتغل متل ما صاير بالكازينو مع النخبة من الصهورة وأولاد الأخوة والزوجات والقرايب والزلم المحسوبين ع سيدنا وع كل الأحزاب والسياسيين،
وصحيح، وصحيح، ولكن اللبناني منو أهبل ولا مسطول وبيفهما ع الطاير.
الإستيذ نبيه بكلامه عن الدستور في فعلاً اهانة لعقل اللبناني يلي بعدو عم يستعمل عقله، على أساس انو في كتير قبلانين وضعية الزلم وأكل التبن والنوم بزرائب السياسيين ورجال الدين.
كلام الإستيذ هو بالواقع اخبار للنيابة العامة لأنه نقيض ممارساته من 30 سنة ولأنه اعتداء على العقول والذاكرة.
الإستيذ عم يحاضر بالدستور، وخايف عالنفط، ولاطي لإسرائيل، وبيصلي للمقاومة، وبدو مع الحزب والملالي يكبو دولة اليهود بالبحر. هيدا بالعلن وبالتنظير!!
أما مواقف الإستيذ ومواقف ربعه بالسر ومع السفير فلتمان وباقي الخوجات الأجانب من والزوار هو شي تاني وويكيلكس ما خلت شي مستور.
عملياً، الإستيذ نبيه بري هو رمز وعنوان لمرحلة عمرها 30 سنة وأكثر من الاحتلال والهرطقات والتبعية وتقاسم الجبنة والفساد والإفساد.
مرحلة كان وبعدو فيها الإستيذ دايماً بجيبة السوري ومن بعدا بجيبة الإيراني وجيبة جيشه، حزب الله، وهيا أمر مش سر!
وبالتالي لو الإستيذ النبيه بيرحمنا وبيبطل يحكي عن الدستور وبيتركه بحاله التعيسة يلي هو سببها ومسببها الأول.
عملياً وواقعاً، الإستيذ هو عدو الدستور الأفظع وليس فقط الأول، ويلي بيرجع لسجل الإستيذ ما بيشوف فيه غير ضرب واهانات للدستور.
حبدا لو يعي الإستيذ أن غالبية اللبنانيين ما بيشبهوا جماعة السياسة ب ربع 14 آذار يلي هو حاططون بجيبتو، ويلي عم يدلعلون ولادون وأحفادون.
هودي الجماعة ما عندها عظام لا في ركبها ولا في رقابها. انفار جماعة ابو ملحم يلي دائما الإستيذ بيلعب فيون شمال يمين ويمين شمال.
حبذا لو يعي الإستيذ أن غالبية الشعب اللبناني بتعرفه ع حقيقته النفعية، ومش قابضتو جد وبتعرف انه والدستور نقيضين.
غالبية اللبنانيين مش قابضين الإستيذ عن جد رغم كل تذاكيه وتشاطره ومواعيظه وأرانبه وبرماته وتكويعاته وقواسه ع إسرائيل، واناشيده للمقاومة والتحرير.
وع فكرة حبذا، لو الإستيذ بيخلي البلدوزر تبعو بعيد عن الموارنة وبينزلنا عن ضهرو شوي. لأنو عنا نحنا المواني ربع سياسي وديني باكثريته مكفي وموفي فساد وإفساد وقصور وتقسير وعنجهيات وعبادة الأنا وكل خياتها واخواتها. يعني يلي فينا بيكفيا!!
بناء على كل ما ورد، يا ريت الإستيذ بيرحمنا من مواعيظه العكاظية، وبيخفف من تغنيه بالدستور.
ويا ريت بيبطل يقوس ع إسرائيل، وبينزل عن ضهره شعارات نفاق المقاومة والتحرير، وبيكمل هو وعون وجنبلاط بتقاسم الحصص والمغانم حتى هو يرتاح ونحنا كمان.
