الياس بجاني/ وين الرجال بغير الصور حدا يخبرنا

726

وين الرجال بغير الصور، حدا يخبرنا!!

الياس بجاني

28 تشرين الثاني/14

حالتو تعتير ع الأخر وشي بهدلي ما بعدا بهدلي.

شو صار وليش ومين هو هالإدمي المبهدل!

صدقني ما عادت تهم الأسامي بالمرة لأنو كتير من السياسيين بوطنا الغالي مستنسخين عن بعضون بالوطاوي والنطنطة، يعني فوتو كوبي .

المهم الأخ زحط تزحيط وفات بالحيط.

بعلمنا المغوار السياسي هيدا هالأمور والمسمن كتير منيح واقف وإذ به راح انبطاح وع الواطي.

الله يرد عنو العين والحسد.

بعلمنا عامل رجال وعم يتمرجل وصوتو عالي وبيقد مراجل وبيهز بايدي طالع نازل وبيموج موج!!

وإذ به ع السكيت بيوطي راسو وبيزبط حلاسو وبيركض من قبل الضو تا يخد صورة انكجا وبوش لا بوش، ومع مين؟

مع يلي ما احترمو ولا احترم غيرو وقال فيه وبربعو معلقات ردح وقدح وذم ما بيقولها السكران ع ورم قنينة العرق.

الله يساعد شعبنا ع هيك سياسيين مرتين وكمان ع الأخر.

بس يمكن لأنو في كتير من ناسنا بيسكروا ع وضعية “الزلم” ” والزقيفي” بيلزمون هيك سياسيين.

في النهاية الشغلي بدها طولة بال لأنو طنجرة وملاقيي غطاها وألف مبروك، وع شكلو شكشكلو!

ومتل ما قال أحدون من كم يوم يا جبل ما يهزك ريح، وقصدوا كان يقول بلطو البحر ومش فارقا معي.

دخلكون ممكن شي ربيح تهب وتخدون؟

قولو انشاء الله