ماري القصيفي/غبطة البطرك… انت عايش بالغبطة وأنا زعلانة

177

غبطة البطرك… انت عايش بالغبطة وأنا زعلانة
ماري القصيفي/26 كانون الثاني/2024

بعرف آخر همّك
ولكن والله زعلانه ع مار مارون… وبعدين زعلانه عليك مش كرمال شخصك ولكن لأنك بتمثل طايفة الها تاريخ عظيم
وحياتك بدي كرمالك…. كرمال صورتك قدام الموارنة (اوك صاروا قلال بس بعد ما خلصوا)
معقول هالدعوة لعيد ما مارون؟ ما عندك مستشار بيفهم بالدعاية والإعلان والإعلام؟
اول شي صورتك مع صورة هالمسكين مارون ما فيا ولا قاسم مشترك:
صورتو زغيرة وصورتك كبيرة
بدلتو سودا ما بيخاف عليا من تراب الأرض، وبدلتك بيضا مهفهة متل المش شاغل شغلة بحياتو
هوي راكع منحني تحت مسؤولية البطرشيل وانت منتصب القامة حتى ما يوقع تاج العهد
هوي مبهدل فقير وانت لابس بدلة غير شكل
هوي عندو لحية متروكة وانت دقنك ناعمة
هوي مش لابس خواتم وصلبان وانت اسم الله مش تارك شي مش لابسو
هوي معو صليب من خشبتين عتاق انت معك عصا بتلمع متل الدهب
هوي بالطبيعة… وانت خربت الطبيعة كرمال قصر
أما من حيث النصّ
هات ت نحكي عن التعريف عنك وعنو:
مارون يا حرام مختصرينو بكلمتين: أبينا القدّيس
انت عطيوك ٨ صفات آخدين سطرين ولو في مطرح يمكن كانوا زادوا علين ت يصيروا ٩٩
يا سيدنا مبينة الدعوة كأنو مارون جايي يخدم بقداس انت بتترأسو… ويمكن ما يخلوه يفوت ع الكنيسة بهالهيئة ولو كرمال يحمل المبخرة
هلأ هوي ما عندو مشكلة ولا مانع، ولا فارقة معو كل هالقصص…. انا اللي حاملة السلم بالعرض… وبطّل حدا يحكي معي من أهلي وإخوتي وأصحابي لأني بضل إحكي عن الموارنة، والكل قالب خلقتو عليي
وكل ما قول خلص هيدي آخر مرة…. الله بيبعتلي حدا (الله يسامحو) يحركش فيي انو بكل براءة عم يسألني شو رأيك بهالدعوة؟
ومحسوبتك بدا خبرية
هلأ عن جد كرمالك سيدنا… ما باقي من العمر أكتر ما مضى… وما حدا آخد معو شي… سايروه شوي لمار مارون
ع فكرة ما تنسى بوعظة العيد تحكي عن النسك والتواضع والعفة والتعلق بالأرض على مثال أبينا القديس مارون…
على فكرة ليش القداس مش بكنيسة مار مارون متل ما كانت العادة؟ يقول بعض الخبثاء إنو مطران بيروت ما بيحب خوري مار مارون… يا ساتر الله يسامحن شو بينشروا إشاعات مغرضة…
ع كل حال بعتقد مار مارون يللي ما كان ماروني بيتمنّى تركّزوا ع يوحنا مارون… وتتركوه يرتاح
#ماري_القصّيفي
#الموارنة_مرّوا_من_هنا_٢