نداء للسيد حسن نصرالله من الكولونيل شربل بركات: يا سيد، الجماعة اغتالو العاروري قدام بيتك وما قدرت تحميه، ومعناتها انك انت كمان تحت نفس المصير لما بدن اياك

508

نداء للسيد حسن نصرالله …اغتالو العاروري قدام بيتك وما قدرت تحميه، ومعناتها انك انت كمان تحت نفس المصير لما بدن اياك…

الكولونيل شربل بركات/08 كانون الثاني/2024

سيد حسن عم احكيك كلبناني جنوبي بيعرف مصلحة أهلو وحزنان على هاللي عم يصير.
سيد حسن في متل عنا بيقول: “انت ما متت بس شفت مين مات” شوف شو عم يصير بأهل غزة واتعلم.
ما بدنا أهلنا يصير فيهن هاللي صار بغزة.. وكرمال شو؟..

سيد حسن قادة الأرض عندك عم يصيدولك ياهن واحد واحد، يمكن بكرا ما تعود تقدر تمون عا حدا…
الناس عم يجربو يعملو وسايط لمنع الحرب الشاملة وتخريب شو بقي من لبنان، وأنت بعدك مفتكر انك ربحان وعم تجرّب تفهّمنا انك لاعب اساسي بالسياسة الدولية.

سيد حسن ذكرني فيلم مبارح تبع ميرون بأفلام التفجيرات على الجيش الجنوبي، والهيئة وصلت لنفس المرحلة صار بدكن انتصار اعلامي هوليودي…
كنت مفهمنا انك قادر تفوت على الجليل، هلق صرت تتمرجل انك مانع سكان الجليل يرجعوا على بيوتن. انت بتعرف شومعناها هيدي؟ يعني مجبورة اسرائيل تكفي عليك تيصير في استقرار على حدودها. مش متل ما أخدت مع باراك انتصار خروج اسرائيل من لبنان سنة 2000 . هون عم تغلط،عم تعطي لاسرائيل حجة تتشيلك، لأنك ما عدت عنصر استقرار وحماية امن، صرت عنصر تهجير وتخريب. شوف شو لازم تعمل.. ما بتصور بعدك قادر على المناورة.. بالحكي حتى صار خطابك متردد.. البطولة والمراجل راحوا.. ومساندة غزة كمان بينت ما الها نفع. حتى هاللي التجأ لعندك على البيت اغتالوه قدام بيتك وما قدرت تحميه، ومعناتها انك انت كمان تحت نفس المصير لما بدن اياك…

سيد حسن برأيي ما دام بعد في مين يحكي عجّل واعطيهن هاللي بدن اياه قبل ما يفوت الأوان. بدن لبنان؟ ياخدوه.. على القليلة بتبقى فيه انت وجماعتك.. بدون سلاح ليش لأ، الجيش بيحميك متل ما بيحمي الكل. وإذا بدك رأيي.. روح انت وكل المسؤولين العسكريين عا إيران عا بكير متل ما راح الجيش الجنوبي عا اسرائيل.. ما فيها شي انت بتقول هول اشتغلوا مع الاسرائيليي وما الن محل بلبنان وانت وجماعتك اشتغلتوا مع الايرانيي ومش راح يكون الكن محل بلبنان كمان، يوم هاللي راح تتغير الأمور.. وهيدا كل يوم عم يقرب…

سيد حسن نصيحة خي لبناني بهمو مصلحة لبنان وشعبو وبيهمو مصلحة ولاد الطايفة الشيعة هاللي نفختوهن تما عادوا اجريهن عالارض، ومفتكرين حالن ملكوا الدني، ويمكن الآخرة كمان .. شوف كيف بدك تزبط الوضع تيبقى حدا ببيتو، حرام شقى العمر يروح ضيعان.. جرب تفتح عبقية اللبنانية وتمثل انك رضيت بهاللي بيقولوه.. واعطيهن شو ما بدهن عبكير، أحسن ما تضطر تتنازل بانكسار قدام كل الناس. انت طالب بتنفيذ القرار 1559 خليها تطلع منك مش تنفرض عليك.. وشدد على نزع كافة الأسلحة من كل الجهات، الفلسطينية والسوريي ليش لأ؟..

سيد حسن كانت النصيحة بجمل، نحنا مش عم نطلب شي، نصيحة لوج الله، قبل ما يفوت الأوان، جرّب تخلص من هالورطة وتخلّص قد ما فيك ناس حطوا ثقتن فيك…

انشالله هالكلام يبقى الو معنى وقت بتوصلك هالرسالة وما يكون فات الأوان..

وانشالله منرجع منلتقي بلبنان حر من كل سلاح خارج عن الدولة، وفيه دولة حقيقية حاكمة الكل بعدالة بخاف فيها الحاكم قبل المواطن من سلطة القانون.. وانت وغيرك من هاللي افتكروا حالهن ملكوا الدني يرجعوا يقعدوا على الأرض، ويحسوا بآلام الناس ووجعهن، ويبطلوا يضيعوا بتجارة الشعارات والأحلام الزايفة، ونرجع نتصالح مع بعض، ونعيش مع الكل، وحتى مع اليهود، بسلام متل ما الله كتب.. بلكي بتفتح الحدود، وبيرجع ينتعش الجنوب، وبيطلعلنا شي من هالمشاريع هاللي عم تنعمل للشرق الأوسط، وبيكون دم هاللي راحوا الو شوية تمن. والاجيال الجايي بتترحم على هاللي شارك بالحل، مش بتدعي على هاللي ساهم بالخراب كل الوقت وولا مرة عمل شي بنّاء…