الياس بجاني/عا شو شكر الوزير نهاد المشنوق وفلش ونفش ريشو؟

424

عا شو شكر  الوزير نهاد المشنوق وفلش ونفش ريشو؟

الياس بجاني/14 كانون الثاني/14

يلي بيعمل شغلو وبيكون عم يقبض معاشو ما لازم ينشكر لأنو قام بوظيفتو.
كل هالزجل والمخمس مردود، وكل هالنفخ بالمشنوق غلط ومش أخلاقي ولا حتى قانوني.

المشنوق موظف ونفذ الأوامر من بعد رفع الطناجر والشراشف واللحف عن الإسلاميين، عفواً الأغطية السياسية.
ولو يلي قبلو يعني الوزير ابو ملحم، مرواننا،
والوزير زلمة سليمان الفيلسوف القانوني، البارود، لو كانو انعطوا أوامر ونشالت الشراشف كان سجن رومية تنظف من زمان.

باختصار، نحنا شعب فايش بفكرو ومنحب دايماً نعمل من الحبي قبي ومنعشق قصص عنتر وعبلا،
يعني البطولات الفاضيي ومعارك الطواحين.

متير واضح أنو المشنوق ما قبل الوزارة، غيرو بالوزارة ولازم نعرف مع مين عم نحكي!! مش هيك؟
من تاني يوم بالوزارة صرخ مشنوقنا حد قناني الغاز وقلو للزلمي هونيك، انت مش عارف مع مين عم تحكي!

يعني مشنوقنا ما عاد يتهدا، وعن قريب جداً راح نشوفو بحضرة السيد نصرالله من بعد ما جاب الصفا وصفاوتو وممانعتو ع الوزارة وحضروا الاجتماع الأمني.
اليوم مشنوقنا كان بالرابيي عند عمنا الجنرال وتصريحوا من هونيك كان كتير جدي ورسمي واستعلائي. تصريح رئيس وزرا عن جد.
الله يرد عنو ويحميه ويسهلو طريق السرايا.

الشغلي كتير واضحا، مشنوقنا سانن سنانو ع السرايا، والحزب مطمنو كتير وهو مصدق والصفا داعموا.
غلط؟ لا أبداً صح 100%. وفرصا ما بتتفوت.

وضع المشنوق متل وضع كل ماروني بدو يعمل رئيس جمهورية وكل سني عينو ع السرايا.
غلط شي!! لا أبداً مش غلط.

ومش غلط أبداً نعمل زراعة الحشيشي قانونية ونرضي البيك.
ومش غلط السجعان يفكر يعمل رئيس جمهورية. وليش لا؟ ماروني ومن كسروان.
وأكيد مش ناسيين بطلنا المغوار زياد أسود، والغدنفر أميل رحمي. ما التنين موارني كمان وبيحقلون ومن ربع الممانعة والتصليح والمازوت الأسود.

الله مع دواليبو مشنوقنا وع السرايا ركض وعن طريق الضاحيي كمان.
وعاش الوطن.