صلب الموضوع: السلاح والحياد. يعني الطائف والقرارات الدولية قبل ما “ننصلب” كلّنا.
إيلي خوري/فايسبوك/09 تشرين الثاني/2023
قصّة غزّة مطوّلة، وواضح انو النواح ما رح يغيّر شي بالمعادلة. بيسوى الواحد يتفجّع من وقت لوقت، بس يعملا شغلتو كل النهار بتصير شوي كتير تمثيلية. ثم انو عنّا مواضيع لا تقلّ اهمية، إذا مش أهمّ.
اوّلاً، كيف نتفادى مصير غزّة، وليش نبيه ونحيب قاعدين يفنّصوا عالناس وعالعالم بإنوّ هنّي غرامن الـ1701 بس ما خلّونا (الاسرائيلية).
تانياً، تاركين اهل الجنوب لمصيرن بالتشرحط والشحّار رغم انو نصّ “البيئة الحاضنة” وكل الغير حاضنة مش طايقة المسرحية من اصلا.
تالتاً، تاركين القلعوط والتافه وزيرو ينظّر عمستقبل الجيش بحماية الحزب، وهو أنجأ بيطلعلو كفّين عخلقتو ويندكّ بالحبس اذا شي.
رابعاً، ناسيين المشكل الاساس، يعني السلاح القتّل ونهب ودمّر الجمهورية، وقاعدين نترجّا المرشد بتملّق وخشوع ما يفوّتنا بالحيط.
خامساً، تاركين نبيه ونايبو يلعبوا بالمجلس عزوقن وطزّ برئاسة الجمهورية وبتشكيل حكومة بتشبه كل شي الّا التافهين الحالييّن.
سادساً، معارضة كل مشروعا بيتمحور حول النواح عغزّة بالمقدّمة يليه شويّة نقّ عالـ1701 والباقي خارج صلب الموضوع.*
*صلب الموضوع: السلاح والحياد. يعني الطائف والقرارات الدولية قبل ما “ننصلب” كلّنا.
