أيفيت سليمان الحصروني الكولونيل شربل بركات/04 تشرين الأول/2023
شو هالقصة الما بتتصدق.. ليش صار هيك؟..
ما قدرتي عالفراق؟..
منعرفك قوية من جوا ومش ممكن تتهاوني بالرغم من جرحك الكبير. ما بتتركي العيلة بهالظرف الصعب..
ليش قبلتي تروحي؟..
والا الغضب على هاللي صار خلانا كلنا ضايعين؟..
صحيح غياب الحنتوش صعب. وصحيح الطريقة كانت قاسية ومش مفهومة اسبابها، وأقسى منها انو نقبل بالوضع ونعض عالجرح.. بس منعرفك قوية وقادرة وبتحملي مسؤولية العيلة والاحفاد ورفاق الطريق.. وبتعرفي تردي على الحقد بالكلمة الحلوة والايمان.. ليش لكان تركتي بكير؟.. وشو بدو مننا هاللي فوق؟.. ليش بعت وراكي بهالسرعة؟..
ايفيت ولا مرة شفتك مرى ضعيفة أو كتّيرت حكي أو بتعطي دينتك للناس. كنتي دايما رصينة وهادية ومحبة. بتوزعي فرح بدون تباهي وشوفة حال.. وكنتي مكملة للحنتوش، خاصة بالبيت، بالرغم من شغلك والتزاماتك.. كنتي البسمة هاللي بتحل أكبر مشكل.. وتعليقاتك الزغار هاللي عادة ما بتعندي عليهن فيهن كتير من الحكمة وقادرين يساهموا بالبنا مش بالهدم…
يمكن حسيتي انو بعد الحنتوش ما عادت الحياة الها طعمة.. وهيدي ردة فعل الكل بالمصاعب والمحن.. انما بيبقى لكل واحد دور تيخلص المشوار.. شو قصتنا.. انعمى قلبك؟.. والا كبر الشوق؟.. أو أنو الحنتوش ناداكي من فوق واستعجل؟..
ما فينا نقول شي وما فينا بهالوضع الصعب إلا نطلب من الله يرحم شعبو ويبعد عن الكل هالكاس المر ويمكن الغضب اللي جايي.. ما بعرف اذا كان لازم نقدملو شي تيرضى علينا ويبعد هالألم الكبير متل ما كانت تعمل الشعوب ايام زمان.. وهل هيدا هوي السبب انو تكونوا تنينكن أفضل قربان منرفعوا عا مذبح الرب بها الوقت الحرج عن الجماعة كلها؟..
اقبل يا رب.. وارفع غضبك عنا.. وحوّل هالتضحية وهالألم هاللي عم نعيشن تصيروا بذور محبة وفرح، وينبت منن استقرار وسلام يرجع يمجّد اسمك ويجمع الأهل من كل الجوانب حول ارادتك بالتعاون من أجل المستقبل، مش بالتقاتل على الماضي وأحقادو…
انشالله تكون رسالتك ايفيت وتضحيتك انتي والحنتوش مقبولة عنا كلنا، وعن لبنان هاللي منحبو، وهالمنطقة هاللي هيي جزء عزيز عليه.. بلكي بتتفتح العيون ومنتخلى عن الحقد، وشوي شوي منرجع نبني ونعمر بيوت ملياني محبة، وعيل متضامنة ومتكاتفة، بيجمعها خوف الله واحترام تعاليمو، وبيدفعها أحلام متل أحلامك انتي والحنتوش بمستقبل حلو لعين ابل والمنطقة…
الله يرحمك ايفيت… أكيد وانتي والياس بجوار الرب دعواتكن راح تكون مسموعا أكتر من دعواتنا.. أطلبوا وشدّوا تنرجع نبني ونعمر، وترجع الأراضي تزهّر خير وبركة، والأجيال هاللي عم تخلق تحلم بايام حلوة..
تعازينا للعيلة داني ودينا وشربل وماريان وعيالهن ولأم وجيه هاللي تحملت فقدان كتار من المحبين وكلهن سيوف بتحز بقلبها.. انشالله العدرا ام النور بترافقها بهالمرحلة وبتخفف عنها. وأكيد ام مارون هاللي حملت كمان أكتر ما بتقدر. ولكل العيلة الأخوة والخيات وعيالهن والأحبة والاصحاب. ولكل ولاد عين إبل بلبنان والانتشار بلكي ربنا بيوقف غضبو وبيقبل يرضى عنا ويسامحنا على كل شي غلط عملناه بهيكلو وبالبلاد المقدسة هاللي باركها من الفين سني وبعدنا ما عرفنا قيمتها لليوم…
الله يرحما…
