كلمة الكولونيل شربل بركات في أربعين الحنتوش بكنيسة القديس شربل في مسيسوغا – كندا/10 أيلول/2023/الحنتوش عزيز كتير مش بس على قلبي وعقلب كل العينبليي واليوم صار عزيز على قلب لبنان
الحنتوش عزيز كتير مش بس على قلبي.. وعقلب كل العينبليي.. واليوم صار عزيز على قلب لبنان.. كلمة الكولونيل بركات في أربعين الحنتوش بكنيسة القديس شربل في مسيسوغا – كندا/10 أيلول/2023
الحنتوش عزيز كتير مش بس على قلبي.. وعقلب كل العينبليي.. واليوم صار عزيز على قلب لبنان..
بدي اقرالكن كم بيت شعر عملتن سناء وشاركنا فيهن بسهرة الحنتوش مبارح…
بس قبل ما بلش راح مرّق كلمتين زغار للتاريخ…
خبرني مرة مختار كونين عن لسان الزعيم الكبير كامل بيك الأسعد الجد، مش كامل الزغير هاللي منعرفو،
قال لما كان البيك يزور كونين، كان يطلب منن دايما ينتبهوا على عين إبل ويحترموا اهلها ويخلو علاقاتن منيحة معن.. لأنو برأيو “هول الجماعة عندن ام تدعيلن”…
البيك يمكن ما عرف مين هالأم، يمكن افتكر فرنسا؟.. بس نحنا منعرفا كتير منيح.. هيي امنا مريم العدرا هاللي دايما حاميتنا وبتعرف كيف تدافع عننا…
الحنتوش أهميتو ما كانت بس ايام الحرب.. هوي حمل السلاح خمس ست سنين.. انما صارلو تاركو شي اربعين سنة.. وعمل انجازات كتير بالحرب.. انما انجازاتو بالسلم أهم..
ونحنا مش دعاة حرب.. وولا مرة كنا هيك…
بس في ناس بيطلع البخار عا راسن وبيفتكروا انو نحنا عايشين بمزرعة وصاحبها مش سألان عن الخرفان.. ووقت بيجي على بالو بينقي واحد وبيدبحوا…
لاْ مش هيك ابدا… نحنا انزرعنا ببلاد البشارة من شي أربعمية سنة وبعدنا مستمرين.. وعم نزرع التعاون والسلم.. بس.. مع الاحترام المتبادل..
ويوم هاللي فكر يوسف العظمة العثماني مساعد أنور باشا انو بغيّر التاريخ بمجزرة بعين إبل، وبعد أقل من شهرين، كان هوي وكل المتعاونين معو بذمة التاريخ..
ومش بس هيك.. من دم ولاد عين إبل ولد لبنان الكبير…
ويوم هاللي بطرت منظمة التحرير وفكر حدا منها انو كمان بيمسك شي خروف من هالمزرعة وبيدبحوا تيخوف البقية.. وراح خطف وقتل تنين فلاحين بأرضن.. ما هدّى سنتين وكان صار ورا النهر.. وسنتين تانيينن لما كمان ما فهم، طار من كل لبنان…
مظبوط نحنا النا ام تدعيلنا.. وأهم انجاز عملو الحنتوش انو زرع أعلى برج بالعالم على اسم امنا العدرا راح ينوّر الشرق والغرب…
قتلوه؟.. يمكن.. بس غلطو كتير.. لأنو ولاد تبنين وشقرا وبنت جبيل، قبل ولاد عين ابل ودبل ورميش، بيعرفوا مين قتلو وما بأيدو عملتو… والهيئة رسم نهايتو بأيدو… ومتل ما بيقولو :”إن الآتي لناظره قريب”..
الحنتوش – بقلم سناء الديك
كنت العمر كلو صاحب قضية
واليوم صرت القضية انت
رافع بايدك راية الحرية
صارت الراية اليوم دمك انت
صلبان نور تضوي تلالنا الأبية
صليبنا لجديد شهادتك انت
يا شهدا عين ابل قوموا استقبلوه
طل البطل وصار رفيقكن بالدار
هم عين إبل لا لا تعتلوه
عا دربكن ماشي الشباب كتار
