ادمون الشدياق/الحل هو بالعودة للمقاومة من اجل ال ١٠٤٥٢ كلم٢.  … والفدرالية هي حل الجبناء يلي ما بدن يكافحوا منشان كل لبنان

73

الحل هو بالعودة للمقاومة من اجل ال ١٠٤٥٢ كلم٢.  … الفدرالية هي حل الجبناء يلي ما بدن يكافحوا منشان كل لبنان

ادمون الشدياق/29 حزيران/2023

الفدرالية هي حل الجبناء يلي ما بدن يكافحوا منشان كل لبنان. كل ما لقينا شوية مصاعب او انتفاء الرؤية والحلول عند القادة اللبنانيين منتخلى عن ال ١٠٤٥٢كلم٢ ومنصير بدنا نتقوقع بعالمنا يلي محاط بعالم عربي، من ميلي فيه إسرائيل مش عارفي كيف بدها تخلص بحالها وعم تعمل دولة يهودية عنصرية ضد الكل، ومن ميلة ثانية عالم إسلامي متطرف بدو يبلعك وخصوصي انك لح بتكون بكونتونك من دين واحد وما عندك قوة إسرائيل تتقاوم ٣٠٠ مليون مسلم.

انا بفضل جرب حظي مع المسلم اللبناني والتعايش معه ولو صعب. ومثل ما قال المؤرخ جواد بولس الجغرافيا مع الوقت بتحل كل المسائل وبتطبع كل الشعوب المتفرقة بطابعها ويوم من الايام وبفعل الجغرافيا منصير شعب واحد لبناني قبل كل شي.

دولة عنصرية ما بيمشي الحال. اول يوم بالفدرالية لح يطالب الشيعة بضم كونتونهم للاتحاد الايراني، والسنة لسوريا او مصر او السعودية، ولح يتقسم البلد بسبب حق الاستفتاء الشعبي ( referendum ) يلي موجود باي نظام فدرالي، وساعتها لح منضل نحنا والاخوة الدروز عم منصارع محيط واسع وشاسع من المسلمين السنة المختلفين والمأدلجين، والعنصرية الايرانية، والتعصب ونظرية التفوق اليهودي، والضعيف من هالافرقاء الثلاثة اقوى منا والدروز مجتمعين.

والانكي من هيك انه نحنا بكل تاريخنا كنا مفرقين بالداخل المسيحي، وكل قريع عنده كم خاروف لاحقه بدو يعمل زعيم. وخدلك على تخوزق من جوا ومن برا منكون بمشكل واحد منصير بالف مشكل.

الحل هو بالعودة للمقاومة من أجل ال ١٠٤٥٢ كلم٢ مع المسلم يلي بيقول لبنان اولاً ومع الوقت منقدر نحنا واياه نقنع الباقيين.

المهمة صعبة وشاقة وطويلة ولكن برأيي الخيار الوحيد للخلاص.