احزاب سيادية ضايعه بين المقاومة ( بالتي هي احسن) والبيانات والخطابات والخطط الفاشلة ويلي عم تتاخد لرفع العتب ومعروفة النتائج بينما السيادة منتهكة ومغتصبة وملعون سلافها وبيحاربوا بسيف السلطة يلي قبلاني بانتهاك وحتى انتهاء السيادة والتبعية لدولة الملالي وبدن يغيروا من جوا !!! وهني عم يلعبوا بملعبها ومن خلال قوانينها.
وقوى تغييرية مش عارفي وين حاطي ربها وكل شي تغييري عملته لحد اليوم هو تغيير اسم المرشح الرئاسي تبعهم ( يلي ما بدو يترشح من اصله ) بكل جلسة انتخاب والمصيبة مشاكلهم بين بعضهم اكثر من مشكلتهم مع النظام والمنظومة وخدلك على طرق نظريات خنفشارية يسارية يمينية وسطية عفا عليها الزمن وكأنهم جايين اليوم من شي مركبة فضائية جايبتهم من الستينات وبعدهم مش خالصين روداج.
والجائزة الكبرى هي قرطة الحرامية والنصابين والوصوليين والزحيفة والجبنا وضريبين الكم والمندل والخونة يلي بتتألف منهم منظومة الحكم كل ١٢٨ واحد منهم وخليني كون كريم بنص بيضة لو برمت السند والهند وقريت كتب التاريخ كلها مش لح بتلاقي اوطى واخون واضعف واجبن واحيل منهم .
قال هني قواد الامة ونبع المقاومة واسياد الانتصارات ( العمى ) وما بتلاقي الا هالبلد عم ياكل كفوف والمواطن عم بيجوع وعم بيموت على بواب المستشفيات وهني عم بيجمعوا انتصارات مونوبولي ومبسوطين فيهم … والله العظيم عصفورية أصلية وماشية والانيك من هيك نص الشعب اللبناني أهبل وماشي وراهم وشايف الشمس طالعه من قفاهم .
والله شي بيكفر … يا عمي كنا شعب مثقف طليعي طلعنا بشير الجميل وميشال شيحا ويوسف السودا وحسن كامل الصباح وكميل شمعون وشارل مالك وجواد بولس وسعيد عقل والبساتنة كلهم وجبران خليل جبران وكمال يوسف الحاج وفؤاد افرام البستاني وعبد الله العلايلي…الخ وقبلانين هلاء باشباه الرجال هودي. يمكن صار لازم ننفضه لفكرنا الوطني والسياسي والحضاري ونعلي سقفناحتى ما نصير نحنا عنوان السقف الواطي يلي عم يقضي على لبنان ويصير بلدنا يتمنى يغيرنا ويتمنى لحاله شعب ثاني افضل واذكى، عنفواني مثقف طليعي ما بيقبل بانصاف الأمور ولا باشباه الرجال تقود هالوطن.
لازم ثورة على مفاهيمنا وخياراتنا ومفهومنا للقائد والسيادة والزعيم وواجبات المواطن اللبناني والوطن والسياسة والشأن العام حتى تنجح الثورة يلي جايي وما تكون مثل الثورات يلي اجت قبلها ثورات من ورق ملغومة لابتغير بحالنا ولا بتغير بحال ومصير الوطن. والسلام.
