ادمون الشدياق/الجيش وسراب الخلاص

84

الجيش … وسراب الخلاص.
ادمون الشدياق/الثلاثاء 14 شباط 2023

ولك لايمتن لح منضل صدى وصنوج عم بتطن عالفاضي ومقضيينا مقطورين ومنأمن بلترقيع والهروب لقدام…
اليوم المعروف انه الخيار الحقيقي المتوفر للرئاسة هوي بين سليمان فرنجية وقائد الجيش حتى باعتراف صقور المعارضة يعني خياري ومرشحي حzب الله بالبلد ( يلي راضي عليهم الحزب وما عندو فيتو ضدهم ) وبالتالي ومن منطلق العملانية والبرغماتية والواقعية السياسية نحنا بالنهاية عم منروح على اهون الشرين ولح نقبل بقائد الجيش اذا صار عليه إجماع.

يعني بتفسير اخر عم منقي واحد من اثنين راضي وموصي فيهم وبدو ياهن حzب الله. يعني واضربي يا حنة على هيك معارضة كوميدية فكاهية مسرحية وتفقيس مكنات.

ويلي بدو يقلي انه خيار قائد الجيش هوي الافضل وانه الجيش هوي الحل وانه الجيش قادر يحد من سطوة حzب الله وامساكه التام بمقدرات الدولة يعطيني مثل واحد على هالشي وبالاثبات وانا برفعله البرتيطه. والله يخليكم بلا ما يطلعلي هلاء جيش من المزايدين لأنه عم نحكي جد وما في مزح بهالقضية وما بتتحمل المزايدات والمزادات العلنية.

بقى خلينا نبلش نقيم هالجيش وقيادته وقدرته على تخليص البلد.
مش هيدا الجيش يلي بثورة ال ٥٨ وقف عجنب لما النظام اللبناني كان عم يتعرض لاجتياح عبر الحدود من سوريا ورجع بتواطىء مع عبد الناصر واميركا جاب فؤاد شهاب لأنه كان خزمتشي عند عبد الناصر ومسرحية خيمة الحدود والتمثيلية يلي صارت هونيك بتضحك اقل مؤرخ عارف بخفايا الأمور.
ومش هيدا الجيش يلي قبل قائده باتفاقية القاهرة ومضي عليها وكانت اكبر خيانة بتاريخ لبنان وانتهاك للسيادة والكرامة الوطنية بس لأنه عم يحلم بكرسي الرئاسة.

ومش هوي الجيش يلي بعد ما انتصر على الميليشيات الفلسطينية بالستينات والسبعينات بشحطة قلم من رئيس الوزراء المتواطيء مع الغرباء انسحب وخضع للنفوذ الفلسطيني كأنه كان هوي الخاسر.

ومش هوي الجيش يلي بسبب هالخضوع سمح لانتهاك الدولة بال ٧٥ وسيطرة الفلسطيني والحركة الوطنية على الدولة وانقسم طائفياً وساند جزء اساسي منه ( احمد الخطيب وغيره ) القوى يلي كانت عم بتقوض الدولة وسمح باستشهاد شباب مثل عمر الورد كانوا عم بيقوموا محله بالدفاع عن لبنان وعن بيوتهم واهلهم.

ومش هوي الجيش يلي كانت مهمته الوحيدة كجيش الدفاع عن أرواح الناس وعن السيادة والاستقلال ومع هيدا سمح بقتل مئات الآلاف من اللبنانيين يلي ما لاقوا جيش يدافع عنهم واضطروا يدافعه عن نفسهم وعن الجيش والدولة بمعركة غير متكافئة مع قوى الاحتلال والهيمنة.

مش هيدا الجيش يلي مغرراً به من ابو بيجاما قتل شعبه ونهي المقاومة اللبنانية بسبب معتوه بعبدا وقوض اخر معقل مقاومة عن الدولة اللبنانية والسيادة والحرية والكرامة وسلم قصر بعبدا بمؤازرة جزء كبير منه للاحتلال السوري يلي دعس على العلم اللبناني بنص قصر بعبدا.

مش هيدا الجيش يلي قائده اميل لحود كان دمية متحركة للنظام السوري ويلي رجع اسس الجيش على عقيدة موالية للنظام السوري والاحتلال وسلم الاحتلال كل مقومات الدولة اللبنانية ويلي خرق الدستور تيمدد ولايته وضرب النظام اللبناني وهيبته.

ومش هيدا الجيش يلي لما غض النظر عن ثورة الارز قبض قائده الثمن رئاسة جمهورية بلشت بكلمة سر سورية إيرانية وهو كان قبلان يتعين تعيين كحل وسط من الخارج ولو بالنهاية انتهى ندمان.

مش هيدا الجيش يلي على أيام مروان شربل كان يجتمع مع حزب الله تينسق معه بمجلس الدفاع الاعلى ويلي سمح لوفيق صفا انه يفوت على العادليه ويهدد القضاة بدون ما يفتح تمه.

ومش هيدا الجيش يلي ربا ميشال عون عقائديا وصقله مواهبه القيادية والنضالية والادارية وكان مدرسة للجنرال بالشخصانية والديكتاتورية وحب الذات والوصولية وبيع المباديء والجلوس مع الاحتلال الايراني وتسليمه مقاليد الامور والاعتراف بتقصير الجيش كحامي للبلاد والعباد وتكريس المقاومة الإسلامية الايرانية في لبنان كجيش وحيد قادر على حماية لبنان واللبنانيين.

بالنهاية نحنا كشعب مش لح نتعلم من الماضي ونوقف تسليم رقابنا لجيش خزلنا بكل مرة اتكلنا عليه منذ نشوء دولة لبنان الكبير في كل مرحلة وفي كل مفصل اساسي في تاريخنا، جيش ما هب للدفاع عنا ولو مرة وان فعل فبتوجيه وغطاء خارجي مثل ما عمل بنهر البارد وفجر الجرود ومن ثم خضع لمشيئة حzب الله في أن ألغى الاحتفال بالنصر واخذ زاوية وزم فيها وفرجانا حجمه لما هز حzب الله أصبعه بوجهه.

بهنيكم بقائد الجيش فهو الرئيس المناسب للشعب المناسب. لشعب لا يعرف ولا يحترم تاريخه ويسلم رقبته وسيادته وحريته واستقلاله لسرديات آنية سياسية بيعرف في قرارة نفسه انها مجرد سرديات دونكيشوتية وهمية افتراضية عن جيش المفروض هو سياج لبنان وحامي الديار والسيادة. سردية لا وجود لها في اي جزء من تاريخنا. بس هي موجودة بمخيلة يلي عم ينجروا وراء الاوهام يلي عم يبيعها يلي ما بدن المواجهة بل الهروب الى الامام لهيك متهمين بالتعاون ولو بدون قصد مع يلي بدن الهيمنة على لبنان وعم بيقدملنا نمر من ورق بيحمي السيادة والحرية والكرامة وهو عم يدعموا من وراء بقطعة خشب وهمية خيالية ساعة يلي بيريد بيسحبها تيفرط كل شي ، دعمة واهية وملغومةلا بتغني ولا بتطعمي خبز بقضية تحرير الأوطان ومحاربة الاحتلالات والقضاء على غول الفساد والمافيات.

بهنيكم بمخلصكم ولكن صلوا إلى الروح القدس انه ما يكون هالمخلص المسيح الدجال يلي لح يقودنا إلى انهيار اكبر للدولة والسيادة والحرية والاستقلال ( بالهام حزباللهي ) ولو كان بنية صافية وبلا قصد في بلد على شفير الموت والاحتضار وبيطلب قيامة باليوم الثالث من مسيح قوي ييضحي بذاته من اجل شعبه اذا كان بعد في امل اخير من خلاص وقيامة. والسلام.