اتيان صقر ـ أبو أرز: هلْ فارس لْ كنّا ناطرينو إجا ليوم، وإسمو طارق البيطار اوعا تضيْعو هالفرصا

76

اتيان صقر ـ أبو أرز: هلْ فارس لْ كنّا ناطرينو إجا ليوم، وإسمو طارق البيطار اوعا تضيْعو هالفرصا
30 كانون الثاني/2023
بيان من حراس الارز – حركة القومميي اللبنانيي
إلنا سنين ناطرين فارس غير شكل جايي عَ حصان أبيض ليكشف الغطا عن لْوجوه السوْدا يلّي غتصبت السُلطا من عشرات السنين، ودمّرت أجمل وأئدس بلد بِلعالم، وفقّرت الناس ونهبت مصرياتن وجنى عُمرُن، وخانِت لْوطن وباعِتو للأمم الغريبي، ورتكبت كل أنواع لْجرايم وأخطرا فاجعة تفجير لْمرفأ وتدمير نِص بيروت عَ روس صحابا …
هلْ فارس لْ كنّا ناطرينو إجا ليوم، وإسمو طارق البيطار، قاضي نضيف وشجاع، قرّر يتحدّى هل عصابي لْحاكمي، ويدِل بِ إصبعو علْ مجرمين لْكبار ويسمّيُن بأساميُن، ويطلُبن عَ التحقيق.
يا جماعا، هيدي اوّل مرّا من ٤٠٠ سني وجايي منتعرّف عَ مسؤول عندو هل مستوا العالي من الشجاعا، وبيسترجي ياخد قرارات مش عاديّي ضد اكبر زعما بِهالدولي المهتريّي.
وهالظاهرا هاي لازم كلنا ندعما بِكل قُوّتنا لحتى تنجح، وازا نجحت ممكن تكون بداية إنهيار إمبراطورية الفساد بلبنان، متل ما نْهارت امبراطورية الفساد بِ إيطاليا عَ إيام لقاضي الشهير انطونيو دي بييترو اللي بيشبه كتير لقاضي طارق البيطار.
لهسّبب، كل واحد بدّو يخلّص لبنان من هل مافيا المشلّشي بهالدولي لازم يوقف حد هل قاضي ويدعمو بكل الوسائل، وأهم شي لازم نحميه بعيونا وأجسادنا وضفيرنا ازا اقتضي لْأمر، لأن هل عصابي لْحاكمي رح تحاول تكسرو بشراسي لتحافظ عَ حالا، متل ما الحيّي لْمجروحا بتصير أشرس قبل ما تموت… والله يحميكن ويحمي هل قاضي لْبطل و يحمي لبنان.
#القاضي_طارق_البيطار
لبيك لبنان ،
اتيان صقر ـ أبو أرز