الكولونيل شربل بركات/نص وفيديو: وينك انت ساكت ليش ما بتحكي؟

231

وينك؟… انت ساكت.. ليش ما بتحكي؟
الكولونيل شربل بركات/29 كانون الثاني/2023

وينك؟.. تعا.. هالعتّم زايد هون
وسمكت الغيمات.. عم تبكي
ومن كتر ما هالظلم عبا الكون
امواج من شعبك.. ورا أمواج
رافعا الايدين.. عم تشكي
وانت ساكت.. ليش ما بتحكي؟..

وينك؟..
اجو من بعيد..
تيزوروك.. ومعهن طيوب وعيد
ومشيوا كتير وحمّلوا مواعيد..
أنغام حلوي وحب وغناني..
وكبر تُقل الهم عا كتافهن
مرة بعد مرة.. يجربوا يخلوك
تتبسّم وتفتح خوابي الخير..
ليش بعدا مسكّرة بوابك
ومش سامع التنهيد.. يا ربي؟..

وينك؟..
بساعة من هاك الساعات
قادر تعبي الكون حنيي..
وتمرجحو بايديك المليانين
بالحب.. تنشر عطر أحلامك؟..
المفروض تجمعهن.. ومن دهور كتار
حافظينها لدروس بكتابك..
وبعدها أمرار..
بتبيعد المشوار
بيناتهن.. كلمات مكتوبة
على اسمك..
يصوّروك ملبّك ومحتار..
يزيد همهن.. والحمل يتقل
والبغض يكبر..
وانت مش قصدك..
يحمّلوك كل اوهامهن..
مش هيك بدك..
بس هيك عم بيصير
بعدك يا ربي بعيد
والظلم عم بيزيد
يا ريت انت بتكتب وبتقول:
شو بدك…

وينك؟..
ليش ما بتطل
عليهن.. ويغمرن نورك..
ليش ما بتفتح قلوبن هيك
تيجمعوا بعضن على حبك..
بدل ما هالحقد يبعدهن
وكاسات من علقم يشرّبهن..
كل ما بيفكروا يجافوا حدا
عم يبعدوا عنك..
والهيئة.. لما المسافة تزيد
بيناتهن.. بتهرب انت.. وما حدا..
بيعود قادر.. يشوف وجك..
ليش انت الحب؟
والأمان بيزرعو وجودك؟
وكل ما تعاونوا بيقربوا أكتر الك..
وبيصير وجك نور
عليهن يشعّ.. والخير يغمرهن؟..

وينك؟..
قالوا انت.. متسامح وسهران
تا ما حدا يضيّع طريقو ليك..
ويروح عالظلمة البدها تزيد
كل ما بعد عنك؟..
قولك هالفقر حاجة.. وأمرار
بتبقى تجوهر الافكار؟
تنشوف قديش الطمع مبغوض
وما حدا ماخد معو من هالدني..
غير ذكرى.. عند شي محتاج
شاف فيها أيد عم تعطي
خيرك انت وبواسطة انسان..
تعوّد يشوف الحب نعمة..
والجود بسمة..
بتشفي جرح مظلوم
البُعد ما خلاه
يقشع بعتم الليل
نورك الجايي ليه..
وليش البحبك
شو بعد محتاج غير لفتي
منك تقلّوا.. انت بعدك هون؟..
قرّب لعنا بعد يا ربي…