أبو أرز – اتيان صقر: يا مسيو ماكرون اذا مزبوط بدك تساعد لبنان وتشيلو من قعر جهنم منطلُب منك شغلتين 06 كانون الثاني/2023
بيان من حراس لْ أرز-حركة لْ قوميّي لْ لبنانيّي
مسيو ماكرون
بِ آخر تصريح لحضرتك عن لبنان قلت فيه “القيادات السياسيّي لْ لبنانيي لازم ترحل…” وهيك صِبت الهدف وحطّيت اصبعك ع جرح الازمي لان هل قيادات هيي علّة لْعلل وأساس كل مشاكل لبنان من زمان وجايي، ورحيلا هوّي الحل.
بس من ميْلي تانيي حضرتك عم تعطي لْ اولويّي لمسألة الفراغ الرئاسي وبِ التنسيق مع هل قيادات زاتا، ومع “حزب الله” كمان، يلّي سلاحو وهيمنتو على الدولي هوّي جزء رئيسي من الأزمي مش أبداً جزء من حلاّ… وهيدا بيعني إنو في تناقض بين كلامك و تطبيقو على أرض لْ واقع، وبيعني كمان أنو بعدنا عم ندور بحلقا مسكّرا، وعم نعقّد الأزمي أكتر ما هيي معقّدي.
ما في لزوم نزكّرك مسيو ماكرون إنك اجتمعت مرتيْن مع هل قيادات السياسيي، أو بِل أحرى هل عصابات لْ مجرمي، من بعد إنفجار البور، وسمّعتون كلام قاسي، ووعدوك أنن رح يلتزمو بخارطة الطريق يلّي رسمتلُّن ياها، بس من بعد ما دِرت ضهرك ومشيت، كزّبو عليك وتنصّلو من كل إلتزاماتُن وفشّلو كل لْ مساعي يلي قمت فيا لتحل مشكلة لبنان.
لهل سبب منطلُب منك شغلتين، اذا مزبوط بدك تساعد لبنان وتشيلو من قعر جهنم:
اول شغلي، تبطّل تتعاطى مع هل عصابات من هلّق و رايح، لأن التعاطي معا فالج لا تعالج، وهيي لْ وصّلت لبلاد ع جهنم، وأكيد مش هيي رح تقيما… وما تشغل راسك بمسألة لْ فراغ الرئاسي لان اي رئيس رح يطلع من رحم هل عصابات رح يكون نسخا عنّا، وإمتداد لعهد الرئيس السابق يعني امتداد لمسلسل الانهيارات ولْ كوارس، ويعني كمان لْ إقامي ٦ سنين جديدي بجهنم الحمرا.
تاني شغلي، وهيّي لْ أهم، إنك توفي بوعدك يلي كررتو أكتر من مرّا وهوّي فرضْ عقوبات أوروبيي على أفراد هل عصابي المزكورة، وهيك بتكون صبت الهدف ميي بل ميي وحطيت إصبعك عَ جرح لبنان الحقيقي و ع وجعو لكبير.
سماع منّا مسيو ماكرون، ونفّز وعدك لأن وعد لْ حُر ديْن عليه وبلِّش ليوم قبل بُكرا بِفرض هل عقوبات على هل عصابي لْ مُجرمي وهيدا رح يكون لْبدايي لَ حل مأساة لبنان والمفتاح لحل كل مشاكلو وأزماتو لْ مزمني، وساعتا كل شرفاء لبنان رح يشكروك ويقولولك الله يطول بعمرك ومرسي مسيو لو بريزيدان … أمّا إزا ما نفزّت وعدك، وما فرضت هل عقوبات، رح تكون كل مساعيك حركي بلا بَرَكي وكلام بكلام و كمشِة ريح، وِلْ أخطر من هيك انّو الشعب لْ لبناني رح يفقد أملو فيك وبِ فرنسا، ورح ينكسر حِلمو بقيامة وطنو من لْ موت لْ محتوم، وساعتا التاريخ ما رح يرحم لا فرنسا ولا لْ غرب ولا عواصم لْ قرار بِ جريمة قتل شعب ووطن عِطيو عبر التاريخ تلتيْن لْ حضارا لْ إنسانيّي للعالم.
#لبيك_لبنان
#ابو_ارز #اتيان_صقر
