الياس بجاني/فيديو ونص: أصحاب شركات أحزاب طرواديين، وحزبيين قطعان وزلم   

234

فيديو ونص: أصحاب شركات أحزاب طرواديين، وحزبيين قطعان وزلم 

الياس بجاني/11 آيار/2023 

إن عُرّف السبب بطُلّ العجب..ولبنان يموت ويتحلل بسبب سياسيين وأصحاب شركات أحزاب أوباش وتجار هيكل، وحزبيين قطعان ومخصيين كرامة وإيماناً وعقلاً وبصراً وبصيرة.
فعلاً، نيال أصحاب شركات الأحزاب اللبنانية المافياويين بزلمهم القطعان والأتباع الأغبياء والجهلة.
وين ما بدن أصحاب شركات الأحزاب، القطعان بيروحوا وبيمشوا وع العمياني.
ع الضاحية لعند السيد وقاسم وقاووق راحوا، وعم يروحوا، تا يزقفوا ويهوبروا للمقاومة الكذبة، ويسترضوا سيد امونيوم، بلكي بيعملون رؤساء، ولو عا خازوق.
ع الشام، وع سوريا الأسد الكيماوي، وع براد راحوا بطوابير.
ع القرداحة كمان راحوا عزوا حافظ بابنه باسل، وحافظ قاتل وطنهم ومشرد شعبهم.
ع الطائف راحوا وباعوا الهوية والتاريخ ودعوسوا ع دماء الشهداء، وما خلوا شي ما تنازلوا عنه.
بغباء وهبل سلموا سلاح المقاومة المسيحية، وتركوا حزب الله وسلاحه ودويلته، وكل دويلات ومخيمات الفلسطينيين والسوريين.
وقبل الطائف لعند عبد الناصر راحوا وبصموا ع اتفاقية القاهرة يلي خرّبت لبنان وعملتوا ساحة حرب عرافاتية.
تخلوا عن جيش لبنان الجنوبي البطل، وباعوا أهلن اللاجئين في دولة إسرائيل.
ع طهران راحوا ومجدوا قتلة وإرهابيين مقابل كرسي رئاسي مجوف من كل صلاحية ودور.
ع الرياض كمان بيروحوا كل يوم تا يتغنوا بعروبة أصحابها تخلوا عنها ودفنوها.
ع الدوحة راحوا أذلاء وخانعين ومقابل الملايين والمواقع السلطوية باعوا البلد ودستوره واستقلاله.
ع انقرة والقاهرة راحوا ومستعدين يروحوا كل ساعة تا يبيعوا شعبهم.
ع جهنم.. بيروحوا…عند عزرايل بيروحوا..المهم شو بياخدوا وبس.
ع غزة لعند حماس راحوا ولبسوا كوفية عرفات يلي حاربهم تا يطردهم من بلدهم وإقامة فلسطين بديلة فيه.
قطعان وزلم مطيعين ما بيردوا لصاحب شركة الحزب التاجر طلب.
سبوا فلان بيسبوه. حبوا فلان بيموتوا فيه تبويس وتغنيج ومديح وزجل مخمس مردود.
مجدوا بفلان بيمجدوه.
خونوا فلان بيخونوه وبيلعنوا سلسفيلو.
هيدا كله صاير من غير شر وبدون صيبة عين وحسد ببلد الرسالة والحرف!!
زلم واغنام مطيعين ع الآخر، ومطرح ما بدو الزعيم ورئيس الحزب الشركة بيروحوا وراه بذل وع عماها.
بيروحوا وبيهوبروا بالروح وبالدم منفديك يا فلان!!
طيب مع هيك شريحة فاجرة وكافرة من شعبنا، وين ممكن تكون نهاية لبنان؟؟
النهاية أكيد بالمسلخ … وهيك صاير.
صلاتنا تا الله يساعد ويشفي كل لبناني حاسة النقد عندو مقتولي، والكرامة مدفوني، والوطنية والسيادة معروضين للبيع والأجار، والضمير مخدر، وبايع حاله للشياطين، وقابل بوضعية الغنم.
مع هيك قيادات زفت وتعتير وذل، ومع زلم وقطعان… قمح بدها تاكل حني… وعم تاكل!!
وكاسك يا وطن بزمن تعتير ومحّل وبؤس.

*الكاتب ناشط لبناني اغترابي
عنوان الكاتب الالكتروني
Phoenicia@hotmail.com
رابط موقع الكاتب الالكتروني على الإنترنت
http://www.eliasbejjaninew.com