هيدي تاني مرّة بيتعدّى “توم برّاك” ع تاريخنا…
الفراد ماضي/فايسبوك/08 كانون الأول/2025
هيدي تاني مرّة بيتعدّى “توم برّاك” ع تاريخنا…
اوّل مرّة لمّن اعتبر لبنان جزء من بلاد الشام، واكيد هيدا غلط! لبنان، ولا يوم كان تابع لبلاد الشام… بس قلنا ” زلّة لسان”…
تاني مرّة، من يومين، اعتبر لبنان وسوريا واحد… وهيدا استهتار ب تاريخ لبنان وزحلة “مدينتك” ومقاومتن…
ولاد مدينتك، سيّد توم، هنّي اللي ساعدوا “الحرافشة” سنة 1791 تَ شحطوا والي الشام من بعلبك، وهنّي اللي كسروا عَ بواب مدينتك هالوالي لِ موظّف عند العثمانيين (الاتراك اصحابك اليوم) لمّا رجع بجيوش جرّراة تَ ينتقم.
وبل ١٨٦٠ ما سقطت زحلة إلّا بدعم من العثمانيين اللي بوقتها كان عم يسهّل دخولن عالبقاع، كمان والي الشام!
وتَ ما نضل بالتاريخ، سنة ١٩٨١ رفضت زحلة تسلّم راسا للسوري وتصير جزء من نفوذو. تحاصرت من الجو والبرّ، وقُصفت بالطيران! ما ركعت، وبقي راسا مرفوع. وبقرار اميركي قَصفت اسرائيل الطيران السوري، وبقيت زحلة بمقاومة كل اهلها رافعة جبينا وصارت “اسطورة ” ورمز للمقاومة الحقيقيّة…
جايي هلق تعتبرنا ساعة جزء من بلاد الشام وساعة جزء من سوريا…
مش زابطة معك، واذا بدك دروس بالتاريخ عنّا كتير مؤرخين مستعدين يعطوك دروس، وبخاصة عن تاريخ مدينتك زحلة…
كنت ناطر حدا من الدولة او السياديين يردّ، بس ما حدا رد لغاية في نفس يعقوب…
منشان هيك ردّيت انا…
أخيراً، سيّد برّاك لازم تعرف انّو: لبنان مش مشروع “للضم وللفرز”…
