الحزبي بلبنان يا خاروف يا بوق وبالحالتين رصنوا عند صاحب شركة حزبو
الياس بجاني/09 حزيران/2025
من دون ما سمي لأنو الأسامي ما إلها لا مغزى ولا معنى ولا قيميي.. كون المشهدية معممي ع كل يلي بشركات الأحزاب تبع جماعات الزرار والفولار، وكمان عند الأحزاب الوكالات والجهادية تبع الإسلام السياسي بشقيه السني والشيعي.
اليوم الصبح حضرت مقابلة ع تلفزيون من تلفزيوناتنا ببلدنا المحتل، لبنان، كان فيها ضيف “تعتير” ع الآخر ومن غير شر ومن دون صيبة عين.. ضيف ومع انو بعدو شب ومتعلم إلا انو ما ترك مجال للمشاهد يقول عنو غير: العمى بقلبه شو بوقي وشو ذمي وشو متشاطر وشو غبي.
مواقف بمية لون وحربائية وذمية و100% صدى وببغائية لصاحب شركة حزبو، يلي مش عارف ربو وين حاطو.
قال شو؟؟ مصارحا ومصالحا حتى قبل السلام والتطبيع مع إسرائيل؟؟؟ ومش بس هيك.. قبلو ع بيئة مجروحا، وهي بالواقع لاعني سلسفيل البلد، ومخزقتو، ومدمرتو، وما تاركي لبناني من دون رزم جروح وانهر دموع.
هالشب الحزبي بيحزن وبيلوي القلب لأنو متل كل المنتمين لأحزاب شركات لبنان التعتير والدكتاتورية والإقطاعيي، الراضين والمبسوطين تكون رقابهن مربوطا بحبال الذل، ولسانتون مفطومي ع التبعية والصنجية والببغائية، وع مواويل الزجل المخمس مردود.
هودي “هالمعترين بعقولن، وأكيد بإيمانن، يلي بشركات الأحزاب .. تبع الزرار والفولار.. منقدر وبراحة ضمير نقول انون مخصيين بالفكر، والتفكير، والقرار، والرأي، والمواقف والسيادة، والإستقلال والحريات.. وعالأكيد الأكيد بالمفاهيم الوطنية والقيمية.
هودي يا أما خواريف ما بيمعوا حتى وصاحب شركة الحزب اخدون ع المسلخ، او صنوج وأبواق وحناجر بتردد ببغائية صدى ونتاق وهرار اسيادها…متل حال هالشب يلي حكيت عنو بالأول.
بالمختصر المشبرح والفج…ومن دون ما نستثني أي حزبي، إن كان من شركات الأحزاب المحلية، أو من الأحزاب الوكالات، أو الأحزاب الجهاديي: الحزبي بلبنان يا إما خاروف، يا إما بوق، وبالحالتين رصنوا عند صاحب شركة حزبو..
وقمح بدها تاكل حني بزمن المّحل يلي فيه العنزي بتنط ع الفحل….ودمتم ودامت عليكم نّعم القطعان.
