افتكرنا الباشا باشا!
جورج يونس/31 أيار/2025
من بين كل الاسماء اللي انطرحت، نحن حملنا اسمكم ونادينا بوصولكم واعلننا فوزكم قبل كل الناس، لأننا افتكرنا إنو معكم يمكن يرجع الوطن للأوادم والحق لأصحابو ويمكن يرجع يحق للفقير يعيش عنا.
وراحت السكرة وإجت الفكرة، وداب الثلج وبلشت تبين المروج الكئيبة ع حدود مآسي شعبنا المنكوب. أتاري لا فيه خيالي عالخيل ولا فيه بطل جايي، واتاري اللي بعاشر القوم سنين بصير يضرب بسيفهم ولو ع رقاب الأوادم.
سكارى نحن بأحلامنا، وقوادنا غرقانين بنهمهم لتدمير معنوياتنا الباقية ولنهب أخر جثث الكرامة اللي بعدا باقية عنا! بصادرو الاراضي ما فيه شي بردهم، بيحتكرو الخدمات والتنفيعات والصفقات والمراكز بلا ما يعملو اعتبار لحدا، بيسرقو المال العام وبحولو القضاء لوجهة نظر بلا ما يسألو، بيتكاتفو مع بعض بتنوع عمالتهم للخارج حسب مصالحهم بلا ما يحترمو المبادىء، بغرقو البلد بالفوضى ليعيشو هني بالنعيم ولنبقى نحن صغار، بيعملو زعما ع حساب دماتنا، بيتجاهلو سرقة أموال المودعين ليغطو جشع اصحاب المصارف والسياسيين ورجال الاعمال، بضحو بيلي مش مدعوم ليحمو سيطرتهم ع مفاصل حياتنا، بحطو الجيش بوج شعبو اذا ما قرر الشعب ينتفض عالفاسدين، بعينو مستشارين ما بيعرفو يعيشو الا عالتبعية والتقارير، بيسجنو اللي بيسرق رغيف ليغطو ناهبي المال العام…
مش هيك بيبنو دولة، ولا ع حساب المعترين بعومو وطن منهوب من المافيا، ولا ببيض العيد أو الرحلات السندبادية والشهادات التسويقية بيعمر لبنان، ولا بعيشة العظمة والثياب الفاخرة بيتعمر هالبلد، إنما بحكم القانون، وسيف العدل والمساواة، وبالتواضع قدام شعب صرلو ٥٠ سنة بياكل مصايب ونكبات، وبكل كلمة بتخرج من فم ألله.
بدكم مصاري تركو الفقرا بهمومهم وفكو عن سما ربهم وتعلمو من الكبار كيف بينجاب المال. هيدا ترامب قدامكم وبكم شهر رجع اميركا عظيمة ومش من جيوب شعبو! وقدامكم كيف ولي العهد محمد بن سلمان بشهرين عوم الطبقة المتوسطة والفقيرة ورجع الأموال المنهوبة من افواه اسود المال. وقدامكم الرئيس احمد الشرع اللي رجع بكم شهر فتح بواب سوريا الكانت مسكرة بوج كل الناس ع كل الدني وكيف بلشت ومضات الخير تدق بواب سوريا.
بالخلاصة افتكرنا الباشا باشا طلع الباشا زلمي ومتلو متلهم ما بيعرف يكسر الا بواب الفقرا.
بدكم مال استردو من اللي سرقونا ومش من ضرايب بتكسر ضهرنا اكثر ما هوي مكسور وإلا بتكونو متلكم متل #كلن ما فيكم الا عالفقرا.
كنا افتكرناكم الامل طلعتو حبل المشنقة لأحلامنا المكسورة.
انا قلت اللي عندي لاني حر ولانو صار الموت اهون بوطننا، ولأنو الحياة عنا بلا كرامة وبلا إنسانية صارت بلا طعمه، ولأنو وحدو الرب اللي حط الروح هوي اللي بحدد ايمتين وكيف ياخدها ولو مين ما كان الوسيلة ع درب الموت.
من عمق الظلم اللي رسمتو بسياساتكم عالجنة اللي خلقها ربنا عالارض منقلكم الله كبير.
#عشوائية_الحكم #غوغائية_الضرائب #الضرائب_والقروض_مش_إنجازات
