هضامة بري هي اجمالاً ڤازلين ليقطّع خازوق منجّرلك ياه عشكل ارنب او نكتة.
فــازلــيـــن ايلي خوري/فايسبوك/15 تشرين الأول/2024
غني عن اي تعريف، دولة رئيس مجلس نوّام عمدى حياتنا. شيخ پرلمانات العرب وغينيس ريكورد برلمانات العالم. الاطول بالتاريخ، دغري بعد رمسيس. 32 سنة وكسور، الله لا يكسر حدا.
فرعون نكتجي ومحبوب من البيتعاطوا معو، رغم انّن بيعرفوا انو هضامتو هي اجمالاً ڤازلين ليقطّع خازوق منجّرلك ياه عشكل ارنب او نكتة.
يلقبّ تحبّباً بالاستيذ كجنوبي. ورئيس مجلس سيّد نفسو لمّا يخبّرك قدّي مجلسو عم يقوم بمهمّاتو كاملةً. عارف حالو اعور بين عميان تافهين ما بينطاق سما ربّن. وعارف انك بتفضّل تحكي معو ولو عخسارة، على انك تضطّر تتحمل تقالة الباقيين ولو عربح. ويبدو عارف الفرق بين لمّا الناس بتنتقدو ولما بتنتقد الله. هو عن مَونة مواطن عنايبو الأول بمناسبات فشلو، اما التاني فعن كره ورفض مخطوف لخاطف اجنبي مدّعي حمايتو.
لـيـبـيــدو
برلماني عريق بس مش حافظ من ديموكراسي 101 الّا خبريّة العدد. فخور بالليبيدو تاع طايفتو وبيتوقّع نسلا يجتاح البلد، اذا مش هالجيل البعدو اكيد. ولاحقين عالشهادات هلّق مش وقتا.بيلعب سياسة لعب: الشيعة مونوپولي، بيوتن ليغو، الجنوب ريسك، الموارنة باصرة، الدروز طرنيب، السنّة بلاك جاك، المجلس پوكر، والبلد روليت.
برلماني عريق بس ما بيحبّ يطبّق دستور وتعديلات. الدستور عندو كلينكس او ورق تواليت لوقت حشرة. اما صبّاتو، وبالرغم من كل افضالو، فللتلِكوُحِ عُنوان. اكتر صبّاط بيتلكوَح بالجمهورية، بتفكّرو شغل پاتشي مش من عند آيشتي.
بـالـنسـبـة لـلـخــطّ
برلماني عريق بس مغروم بسليمان، لدرجة كان قاعد يعِدّلو اصواتو ببلاش، ولمّا لاقى جهاد سابقو، لغي صوت وفشكل جلسة تما يوصل جهاد للـ60 (سيكولوجيا). وطبعاً كرمال سلم اهلي مش حليفو بالخط – خطّ تخربش دجاج بدّك حكيم تيقرا، والافضل نفساني.
خطّ ملالي وبعث وتحرير وقضيّة كبرى وشعب واحد بدولتين وحماية خاصرة. خطّ شعب جيش وبطيخ ووحدة ساحات وعدم طعن مقاومة بضهرا. خط هوكستين وحوار قبل انتخاب، خطّ نهب دولة وناس و51%، خطّ سيّد ولحود وعون ودوحة واغتيالات وعقوبات، خطّ بلطجة وشيعة شيعة شيعة، وطبعاً خطّ نزوح وارهاب وتهريب نيترات ومال وبضايع. خطّ خنفشاري عكذبات كبرى، كحرمان ومظلومية وعتالة وعدوان، مع مصايب عمدار الساعة. خطّ مش خرج إلاّ انوّ ابطالو وزعران موتسيكاتو يشمّوه، اقوى من الكوك وارخص. برلماني عريق ومحبوب، بس بالنهاية – رغم الهضمنة و”الاعتدال” – هيدا الخط خطّو اولاً واخيراً، ساعة عضهر بعث مجرم وساعة عضهر ملالي تخلّف. ثم انو ما حدا قدر يستولي عالبلد نهائياً الّا عبر مجالس برئاستو (بعث وملالي). الله يرحم كل السبقوه.
شـو عـامــل؟
بصراحة، ولا مرّة كان خطّو خط شيعة عامل الّا نادراً، شيعة تأسيس المتصرفية والجمهورية، شيعة وصايا شمس الدين، شيعة لبنان. كل المربّحنا جميلة فيه انو كم مرّة بهالعمر، تحوّل لممانع دايت وخفّف تقالة دمّ حلفاؤ شوي عن هالناس، او ما يسمّی “ادارة توازنات” – يعني ڤازلين.
ولكن، وبكل بمحبّة وتقدير للحسنات الما كفّت لتغطّي عالسيّئات، منعرف انّو ما النا الّا الاستيذ لنعمل سوفت لاندينغ عادل للجميع بما فين البيئة الحاضنة، انما مش لرموزا ورموز مرحلتا. يعني ممارسة قدراتو الڤازلينية الى اقصى حدود، بس مع حلفائو هالمرّة – ولو “لمرّة واحدة واخيرة”.
تنرجع لصلب الموضوع، بتصوّر احلى خاتمة لتاريخو، هي اذا بيعمل معروف وحسب قولو: “الّي طيلع الحمار عالميدنة ينزّلو”.
