حزب الله هو الأم الحنوني لكل الزعلانين، عون وجنبلاط والحريري والحكيم، وكلون يعني كلون!!
الياس بجاني
19 كانون الثاني/16
نيالنا بهيك زعماء وسياسيين حناين وزعلون غير شكل… وكما ردات أفعالون!!
عون لمن زعل من 14 آذار، وما عجبتو الحصة حرد وتنحر وراح عند حزب الله وبقي عندو.
جنبلاط لمن زعل من 14 آذار وشاف الدفي عم تبرم كمان هرول نادماً ومستغفراً وراح عند السيد والصفا ومن عندون عالشام.
الحريري زعل عالبلد متل ما خبرنا وخاف، فركض ركض عند الحزب بس عن طريق فرنجية،
وهلقتني زعل الحكيم من الحريري وأخد عا خاطروا، وما راح بعيد وما ضيع االبوصلة، ومتل الباقين راح دركبي عند حزب الله بس عن طريق عون!!
نيالنا فعلا بهيك زعماء مرهرفين ومغنجين وزعلون وردات افعالون غير شكل،
وكلون بس يزعلوا بيروحوا عند حزب الله وبيرتموا بحضن السيد والصفا ورعدو الحيط الواقي، يا مباشرة يا مواربة.
الظاهر والله أعلم، ما في ادفئ من حضن الحزب، وما في أحن من خضن رعد وقاسم والسيد!
ومبين انو الحزب كمان أخذ محل الأم الحنوني.
وهلقتنيي صارت الإم الحنوني بدويلة الضاحية ومش بفرنسا!!
وسبحانك ربي ما اسهل الجري والهرب من الأبواب الواسعة!!
فيا سعدنا ويا فرحتنا…
وكاسك يا وطن،يا وطن ما عاد لا فيك حراس ولا مين يحرس والكل نايم بحضن المقاومة الحنوني.
وشر البلية بزمن البؤس والمحل لا يضحك فقط، ولكنه “بيفقع” من الضحك.
ونحنا كلنا فقعانين من الضحك ع هيك زعماء تعتير وبهدلي.
*الكاتب تاشط لبناني اغترابي
عنوان الكاتب الألكتروني
Phoenicia@hotmail.com
في أسفل فهرس صفحات الياس بجاني على موقعي المنسقية الجديد والقديم
فهرس مقالات وبيانات ومقابلات وتحاليل/نص/صوت/ بقلم الياس بجاني بالعربية والإنكليزية والفرنسية والإسبانية
