في أعلى التعليق بالصوت/فورمات
اسمعوا كلامهم ولا تفعلوا أفعالهم
راعي لا يرعى ما إلو عازي
الياس بجاني/16 كانون الأول/14
هيك وبصوت عال وإيمان وخوف من الله وحدو، ومش من حدا من البشر، ومين ما كان يكون مش مهم، بدنا نسأل كل حدا عندو ضمير ووجدان وبيحترم نفسو شو نفع الراعي إذا ما بدو يرعى قطيعو ويتركو لوحوش الغاب، وكمان هو يساعد الوحوش تا يفترسوه. بيناتنا، وبضمير كتير مرتاح، ومن دون مسايرة لحدا، هيك راعي ما إلو عازي، ونقطة ع السطر.
وكمان بدنا نذكّر هيك رعيان شاردين انو ما حدا ترك هالدني وأخد معو شي لا قصور ولا مال ولا نفخة صدر ولا تكبر ولا عزوة ولا سلطة. الإنسان من التراب انجبل وإلى التراب سوف يعود، وجسدو راح ياكلو الدود يلي منو وفيه، بعد كم يوم من بعد ما ربنا يسترجع وديعتو منو، يلي هي الحياة. بزمن البؤس والمحل يلي نحنا فيه كتير محتاجين رعيان مش ذئاب كاسرة ومتوحشي.
يا ريت هالرعيان، كل الرعيان وين ما كانوا، ومين ما كانو، يلي عابدين تراب الأرض، وقاتلون الإستكبار، وغرقانين بغرائزون، يا ريت بيرجعوا للإنجيل يلي بيقول الإنسان ما بيقدر يعبد ربين يا المال يا الله، وما بيقدر يشرب من كاسين، كاس ربنا وكاس الشيطان. نحنا يلي سلاحنا الكلمي مش لازم نسكت وع طول من واجبنا نشهد للحق ونسمي الأشياء بأسمائها.
ولكن وكمان لازم دايماً نصلى تا الرعاة يكونوا فعلا رعاة ومش ذئاب. اليوم خلونا كلنا نصلي وبخشوع حتى كل راعي ما عم يستعمل وزناتو للخير يتوب ويرجع لعند ربنا ولعند العضرار ولحضن يسوع ويؤدي الكفارات وإلا بيوم الحساب عجهنم دركبي. جهنم يعني دود ما بيهدا ونار ما بتنطفي ووجع ما بيوقف. ومن عنده أذنان صاغيتان فليسمع.
برسم أصحاب الجبب واللحى والقلانيس/لان واقع الحال مقيم نعيد نشر ما غناه الفنان رامز ضاهر زمن الانتداب الفرنسي تحت عنوان: رجال دين
من كتاب في الذاكرة الشعبية – تأليف خالد اللحام/الجزء الأول/شركة الزوايا ش م م بيروت
قدم الفنان رامز ابو ظهر اغنية على مسرح كنيسة المزرعة، حيث كانت الكنائس تلك الايام تقيم مسارح لتقديم الاعمال الفنية ذات المستوى والمضمون السياسي والوطني والاجتماعي. يقول الفنان رامز ابو ظهر :”غنيت على مسرح كنيسة المزرعة أغنية هاجمت فيها المظاهر التي غرق بها بعض رجال الدين في تلك الايام، مع ان المفروض بهم ان يكونوا هم طليعة الوطنيين وطليعة المهتمين بحياة الناس ومصير الناس ومشاكل الناس، وقال فيها:
شو هالعدل والانصاف والله محتارين
بدنا نحكي بس منخاف يقولوا كافرين
اي شي بيكفر يا جماعة وشي بيشيل الدين
عما نشوف البطرك حاكم والقاضي مدير
وعما نشوف المطران نائب والمفتي وزير
واللحى بمجرى السياسية في الها تأثير
مين بيشاهد هالمشاهد يللي عم تصير
ما بيترك دينو وايمانو وعقلو ما بيطير
شي بيكفر يا جماعة وشي بيشيل الدين
عم نشوف الشيخ لابس بدلاتو الحرير
وعم نشوف الخوري مزوزق عامل مانيكير
والمسيح كان يمشي حافي والنبي فقير
بالايمان هدوا الممالك وصاروا شعب كبير
عالصراط المستقيم احسنوا التدبير
سلمونا لجماعة قرفونا الدين
مين بيشاهد هالمشاهد يللي عم تصير
ما بيترك دينو وايمانو وعقلو ما بيطير
شي بيكفر يا جماعة وشي بيشيل الدين
بيجوز من الله هالديوره كيف محشيين
بالمصاري والخيرات متبنيين تتبين
وفيهم رهبان الله يبارك كيف معلوفين
مهما صاموا مهما صلوا بيضلوا ناصحين
والرسل كانوا جماعة فقرا وصيادين
سلمونا لجماعة قرفونا الدين
اي شي بيكفر يا جماعة وشي بيشيل الدين
يا مين قشع يا مين شاف شو في بهالاوقاف
من الفضايح والسرقات باسم الاسعاف
تحت ادارة كم شخصية من شعب الاشراف
وهالاشراف بعيد عنك من الامانة نضاف
الواحد منهم قرد ملفلف بخمسين لحاف
ما في عندو جنس الرحمه ولا ذمة ولا دين .
في أسفل فهرس صفحات الياس بجاني على موقع المنسقية القديم
فهرس مقالات وبيانات ومقابلات وتحاليل/نص/صوت/ بقلم الياس بجاني بالعربية والإنكليزية والفرنسية والإسبانية
