المخرج والكاتب يوسف ي. الخوري/عِقدِة الموارني بحاجي لْ إينشتاين يحلّها

309

عِقدِة الموارني بحاجي لْ إينشتاين يحلّها…
المخرج والكاتب يوسف ي. الخوري/22 شباط/2021

سمير: داعم مواقف بكركي، وبدّو إنتخابات نيابيّي مبكِّرا، ونُص نُص مع الثورا، وبدّو يسقِّط الرئيس.

سامي: داعم مواقف بكركي، وبدّو إنتخابات نيابيّي مبكِّرا، ونُص نُص مع الثورا، ومن أوّل العهد مش راضي عالرئيس.

حدا فيه يقلّي ليش سمير وسامي متخانقين!!

جبران: بيتذاكى عَ مواقف بكركي، وهوّي بِخطّ الممانعا ومتحالف مع حزب الله.

سليمان: on off مع بكركي، وهوّي بِخطّ الممانعا وما بيزعّل حزب الله.
حدا فيه يقلّي ليش جبران وسليمان متخانقين!!

سمير متخانق مع جبران، وجبران متخانق مع سليمان، يعني سمير وسليمان متّفقين.

سمير صُحبي مع سليمان، وسليمان صُحبي مع سامي، يعني سمير وسامي متّفقين.

جبران متخانق مع سمير، وسمير متخانق مع سامي، يعني جبران وسامي متّفقين.

جبران متّفق مع سامي، وسامي صُحبي مع سليمان، يعني جبران وسليمان متّفقين.

جبران متّفق مع سليمان، وسليمان متّفق مع سمير، يعني جبران وسمير متّفقين.

سليمان كل عمرو بيتباهى بعلاقاتو مع بيت الأسد، وسامي ما حدا عمل أد بيّو قِمم مع حافظ الأسد، وجماعة سمير عم ينشروا بهاليومين صُوَر جبران مع بشّار الأسد، وجماعة جبران عم يعيدوا نشر صور سمير مع حافظ الأسد (مع إنّو هالزيارة التعزيي كلّفتو 11 سني حبس).

ما زال سليمان وسمير وجبران وسامي أربعتن متّفقين إنّو العدو هوّي الإسرائيلي الصهيوني، وأربعتن لافِحهُن شي من أجواء بيت الأسد، فَ ليش نازلين نشر بِغسيل بعضن وليش مش متّفقين؟!!

سمير بيصلّب بالخمسي،
سامي بيصلّب بالخمسي،
جبران بيصلّب بالخمسي،
وسليمان بيصلّب بالخمسي،
فَ عَ شو هنّي مختلفين؟

سمير معتبرتو بكركي واحد من القوايا،
سامي معتبرتو بكركي واحد من القوايا،
جبران معتبرتو بكركي واحد من القوايا،
وسليمان معتبرتو بكركي واحد من القوايا،
أربعتن بيتن براس القلعة وبكركي مباركتن، فَ عَ شو بيضلّوا مقبّرين؟!

هاي بيسمّوها عَقدة الموارني الخونفوشاريّي، وما إلها إلّا جواب واحد:
“مش كل مين صلّب بالخمسي هوّي ماروني”.

ملاحظة: أوعا حدا من غير طوايف يشوف حالو علينا، كل طايفي فيها اللي كافيها…