الكولونيل شربل بركات/أول قداس قداس بمزار أم النور في بلدة عين إبل الجنوبية

159

أول قداس قداس بمزار أم النور في بلدة عين إبل الجنوبية
الكولونيل شربل بركات/24 تشرين الأول/2020

بعد كل الجهد وبالرغم من الصعوبات هاللي بتطلع بوج العمل البناء وبعيد جميع القديسين هالسنة راح يصلي المطران شكرالله الحاج بمزار ام النور هاللي خلص فيه الباطون وكل شي بيتعلق بالبنى وصار جاهز تيستقبل كفاية الشغل التزييني والكماليات من الدرابزين للمصعد لواجهة الكنيسة والجنينات وأكيد التمثال هاللي راح يزين المنطقة ويرجعلها رونقها بحماية ام النور سيدة بلاد البشارة.

هالمناسبة كتير عزيزي علينا كلنا هاللي ساهموا بالفكرة وبالتبرع وبالحماس وهاللي رافقوا التنفيذ بكل مراحلوا وكل هاللي حلموا بيوم من الأيام انو يصير في عا مدخل عين إبل مزار كبير لأم النور يقصدوه الحجاج على هالأرض المقدسة محل ما مشي سيدنا المسيح وامو وباركوها من شي الفين سني وهاللي بقيوا أهلها فيها على ممر الأيام وتحملوا كتير من الصعوبات والمشاكل واجا وراح عليها جيوش ودول وهيي بقيت أمينة وحفظت التراث والاسامي والعوايد وتعاونوا سكانها بكل مشاربن وأفكارن ومعتقداتن هاللي تلونت وتغيرت مع الوقت ومع التطور بس الروح الحلوة والقبول بالآخر رافقوها بأكتر ايامها بالرغم من النقط السودا هاللي لا بد منها تنفهم أهمية العيش بسلام وقيمة الخير والبحبوحة يوم اللي بيجوا ونعرف نحافظ عليهن وما نفتكر أنن من المسلمات ما بتتغير وما في ضرورة نساهم باستمرارها.

الاسبوع الجايي بأول الشهر راح نودع سيدنا شكرالله ونشكر معو الله على نعمة وجودو بيننا كمطران وراعي صالح وأب فاضل مشي عا درب الرب بكل تواضع وحمل مسؤولياتو بكل جدارة وساهم بتشجيع المشاريع الخيرة بدون منة ولا تكلف. هوي كمان كان وحدة من نعم امنا العدرا هاللي ما منعرف قيمتها تنجرب غيرها. انشالله الله بيبعتلنا مطران جديد يكون من نفس الطينية يتحلى بذات الفضائل وأولها التواضع وبعد النظر والأفق الواسع بالفكر تيجمع المشتتين ويكفي مشوار العاملين بحقل الرب ويرجعلنا بصلواتو وتشجيعو الثقة بلبنان بلدنا هاللي منبقى معلقين فيه وما منعرف قيمتو كمان إلا يوم هاللي منبلش نخسرو أو نحس أنو في شي مش منيح عم يهددو.

واليوم كمان بهالمناسبة منحب نتقدم من خينا بول هاللي كان أساسي بهندسة وتنفيذ المشروع وهاللي خلّى كل من حولو يصير مهتم بمشروع ام النور وكأنو مشروعو الخاص وحلمو الشخصي بدنا نتقدم منو بالتعزية على فقدان واحد من هاللي ساهموا من بعيد بالحلم وهوي هاللي فتش على مين يقدر ينفذ التمثال ووصل عا ارمينيا ونظم زيارة اللجنة لمشغل هالفنان اللي صمم التمثال وما اكتفى بكل المجهود قام دفع رعبون من جيبتو تيبلش الشغل ويطلع التمثال المصغر هاللي فرجانا كيف بدو يكون العمل النهائي. للأسف هراري ما راح يقدر يشوف نتيجة مجهودو لأن الكورونا زارتو وأخدتو معها بها الأسبوع وخلتنا كلنا نحزن على فقدو مش بس خيينا بول وعيلتو والأصحاب. أكيد راح ينذكر بصلواتنا وباسمكن جميعا منتقدم من عيلتو ومن خيينا بول ومن كل أصحابوا بالتعزية وأنشالله ام النور بتكون مرافقتو برحلتو وبتستقبلو بالسما مع الأبرار والصديقين.

من كندا بعدا صلواتنا مرافقيتكن ودعواتنا وحلمنا أنو نلتقي فيكن كلكن على أرض عين إبل قريبا ونكون عم ندشن ونفتتح مزار ام النور والبلد كلو يكون رجع يتعمر على أسس صلبة تعطيه دفع جديد تيبقى أمل الأجيال الطالعة هاللي بدها تبلش تشوف كيف راح تكون المنطقة أحلى بعد كل المشاكل خاصة يوم هاللي راح تباركها ام النور وتشع عليها وتزينها تعاون ومحبة وهمة للعمل المنتج هاللي وحدو بيبني الدول وبأمن الرفاه والاستقرار مش الجدل العقيم ولا الحقد الأسود ولا الاتكالية الفارغة.
العدرا ترافقكن وأم النور تنور ايامكن وما تشوفوا من اليوم ورايح إلا كل خير.
المجد لله…