الياس بجاني/يا لبناني..شو بتحب تاكل خبز أو هوا وصواريخ مجبولين بصلصة الإنتصارات الإلهية؟

196

يا لبناني..شو بتحب تاكل خبز أو هوا وصواريخ مجبولين بصلصة الإنتصارات الإلهية؟
الياس بجاني/20 تموز/2020

اليوم اللبناني المشحر والمعتر وخصوصاً اللبناني يلي من جماعة نفاق ودجل وكذبة المقاومة والتحرير..

هيدا اللبناني تحديداً عندو اليوم  خيارين وما في ثالت.
انت يا بطل ويا محرر ويا موهوم ويا رافع شعار”الشيطان الأميركي والإسرائيلي ورمي اليهود بالبحر”.
شو بتحب انت يا مقاوم تاكل وتطعمي اولادك وعيلتك؟

المانيو  قدامك ع الطاولي إما خبز ولحمي وهودي عند الغرب والعرب ومش جايين ما دام حزب الله محتل لبنان وعم يفكفكوا ويهدوا ع راس اللبنانيين، وما دام عون ودياب وباسيل وبري والطرواديين من أمثالون هني بالحكم ومربوطين برقابون بحبال الملالي وحزبهم الإرهابي.

أو بتحب تاكل هوا وصواريخ مع صلصة الإنتصارات الإلهية يلي عند حزب الله الدجال والمجرم والإرهابي؟

حزب الله المحطوط ع قوائم إرهاب 75 دولة بدو يطعميك يا لبناني صواريخ ورصاص وبارود ورزم كرامي من صناعة الملالي من بعد ما خرب المصارف وسرق الودائع وضرب الليرة والإقتصاد وسكر المدارس والمؤسسات وعزل لبنان واستعدا العالم وجاب مليونين مهجر سوري وتسبب بان تلتين الشعب اللبناني عاطلين عن العمل.

هيدا هو خيار المقاومة الكذب.. وهيدي هي عطايا نصرالله الملالي وهز الأصابع وجهاد زراعة الفجل والخس والبقدونس  ع البلاكين.

يا لبناني إذا ما قلت لا كبيرة .. نصرالله مكفي تا يشيل لبنان عن الخارطة ويضموا لإيران الفقر والإرهاب.

شو بدك تختار..القرار إلك.

إذا خيارك مانيو الصواريخ فرجاء عيرنا سكوتك وضلك كول وحدك تا تشبع وتنفزر.

ولكن أكثرية اللبنانيين مش هيدا خيارون وما راح يسكوا أكثر ومصممين مع سيدنا الراعي وكل الأحرار والبنانانويين انو يخلصوا من سرطان واحتلال حزب الله ويسفروا السيد وكل يلي معو ون وي تيكت ع إيران متل ما رجع بدون عودي من العراق لعنا الشيخ محمد كوثاني ع طيارة خاص.

يا لبناني تا تاكل خبز ومش هوا وصواريخ وشحار وتعتير لازم تطالب بتنفيذ القرار 1559 وبإنهاء وضعية احتلال حزب الله الإيراني والإرهابي وبتسليم كل سلاحه للدولة وبتفكيك دويلته وضبط الحدود والمطار والبور واقفال لبنان الساحة بوج كل تجار تحرير فلسطين المنافقين والطرواديين من عرب وفرس وجهاديين.

يا لبناني بالنهاية يا بتاكل خبز،  يا بتاكل هوا صواريخ!!!

*الكاتب ناشط لبناني اغترابي
عنوان الكاتب الألكتروني
Phoenicia@hotmail.com
رابط موقع الكاتب الالكتروني على الإنترنت
http://www.eliasbejjaninew.com