الياس بجاني: قانون الانتخاب جايي ومعه الانتخابات وابليس ما بيخرب بيته

127

قانون الانتخاب جايي ومعه الانتخابات وابليس ما بيخرب بيته
الياس بجاني/31 أيار/17

منطمن الخايفين على وقوع البلد بالفراغ، ومنقلن لا تخافوا ولا تعطلوا هّم،..البلد بأيادي أمينة..
ولكن أمينة بغير مفاهيم الأمانة والإيمان ومخافة الله ويوم الحساب الأخير.!
أيادي اسخريوتية وطروادية وملجمية وع الآخر..!!!
يا خايفين من أهلنا حطوا اجريكن وكمان ايديكن بماي باردة،
وتأكدوا انو في قانون انتخابي، وفي انتخابات كمان..
نعم، في انتخابات وفي قانون لأنو ابليس ما بيخرب بيته…
والأبالسة وع راسون ريسون لاسيفورس مهما اختلفوا بيجمعون حبهم للشر وللأذية!!!
ولأنو ابليس حريص على نفسه وعلى بيته،
ولأنو ساكن عقول وقلوب وغرائز انفار الطاقمين السياسي والحزبي ومعشعش جواتون ومكتر..
هيدا الإبليس ما راح يخرب بيته ولا راح يهد هيكل غنائم الحكم وغلاله ع نفسه.
اه، نعم في قانون انتخابي،
ولكن قانون هجين ومفصل ع مقاس ومصالح وأطماع واجندات يلي عم يطبخوه.
هودي الطباخين ال 7 او ال 8 هني إبليس بشحمه ولحمه وأكتر..
هودي الطباخين بيحطولوا مية وزك لإبليس بطمعون وجحودون ونرسيسيتون وبعشقهم للشر.
أما مسرحيات وعروض الخصام والجدلية المثيرة للغرائز والمذهبية والصلاحيات والحقوق فهي عدة شغل النفاق والدجل..
باختصار، كل الهوبرات والعنتريات بين بعبدا والسرايا وكليمنصو وعين التينة ومعراب والضاحية، وبين الصهر الغنوج والباقين..
هيدي كلها لا بتقدم ولا بتأخر، وكلام فارغ ما عليه جمرك، ولا خصو تحديداً لا بحقوق ولا بصلاحيات ولا بوجود المسيحيين..
كل القصة من أولها لأخرها انو 99% من انفار الطاقمين السياسي والحزبي هني جماعة تجار ساكنون ابليس وآخر همون البلد والناس ..
كل همون مصالحون وأرصدتون ونفوذون ومراكزون ونفخة الصدر والعنجهية..
وع فكرة هيدي الدعوى القضايئة يلي السيزار والباسيليوس والسليم رفعوها مبارح ضد نواب واعلاميين عم يزلطوا اهل الحكم ويفتحوا ملفاتون،
هي كمان دعاوى عدة شعل للتخويف والتهويل والقمع وكم الأفوه..
وباختصار، مع هيك ابالسة وكتبة وفريسيين..
طحن بدها تطحن.. وخبز بدها تاكل حني..
والسلام على من يعرف معنى السلام ويعيشه..
واللعنة على كل مسؤول وسياسي واعلامي فاجر ووقح وفجعان لا يخاف الله ولا يحسب حساباً لحساب يومه الأخير..

*الكاتب ناشط لبناني اغترابي
عنوان الكاتب الألكتروني
phoenicia@hotmail.com