الياس بجاني: الرئيس القوي وجيش الوهاب .. قوي عا مين ووين وكيف!!؟

319

الرئيس القوي وجيش الوهاب .. قوي عا مين ووين وكيف!!؟
الياس بجاني/20 تشرين الثاني/16

شو المطلوب نفهمه نحنا المواطنين من اطلالة جيش الوهاب النهاب والملحق ببراميل وكيماويات عمنا الأسد؟

شو المطلوب نفهمه من اطلالة جيش الوهاب التابع مليون بالميي لإشارات هز أصابع مرشد الجمهورية المقيم سعيداً في حجره اللاهي؟

شو المطلوب نفهمه من اطلالة جيش الوهاب النهاب الموظف قداحاً ومداحاً عند الملالوي الأمني والمخابراتي وفق صفا وما يصطفيه ويفرخه ويفقسه من سرايا ومرايا؟

شو المفروض نفهمه من تظهر جيش الوهاب قبل يومين من عيد الإستقلال؟

وشو كان المفروض نفهمه من استعراض القصير العسكري ومن تهميشه الكامل والفاضح لإستعراض عيد الإستقلال؟

يلي بدو المرشد، السيد نصرالله يفهمنا ياه كتير واضح وكتير بسيط . والمفروض أن اللبيب من اشارات الوهاب يفهم وإلا!!

عم يفهما عالرايق أنه هو الحاكم وانو نحن كلنا مجرد أتباع وحاشية ولزوم ما لا يلزم…

عم يفهما انو يلي منا بيكبر راس شغلوه بيكون مع الصفا والسرايا والمتفرعات والأبواق.

عم يفهمنا المرشد أنه ما علينا كلبنانيين غير لاهيين سوى الطاعة والخضوع والخنوع وإلا!!

عم يفهمنا انو لازم وضروري نعمل متل ما عملو جماعة ركني احزاب 14 آذار ونبيع القضية.

عم يقلنا ننسى القضية ونعمل متل ركني وحزبي 14 آذار يلي استسلموا ورضخوا للأمر الواقع وبرموا وجهتون عالوزرات والمغانم والتناتش ودفنوا كل شي بيخص السيادة والدولة والقرارات الدولية والسلاح والدويلي.

بدو يفهما المرشد بان الأمره له وليست لرئيس الجمهورية ولا للحكومة ولا للدولة ولا للقوى الأمنية الشرعية.

بدو يفهما انو الرئيس ببعبدا وجوده وعدم وجود واحد لأنو الرئاسة هي للدويلة مش للدولة.

أكيد نحنا فهمنا..بس دخلكون يلي رافعين رايات النصر مع الرئيس من عرابين للعهد هني فهمانين؟

أكيد نحنا فهمنا ولكن هل أصحاب شركتي وركني 14 آذار هني فهمانين انو نحن الناس فهمانين وانو هني مكشوفين وانو كل رايات نفاقون ودجلون مفضوحا ومكشوفي ع الآخر؟

مبين انو هالعهد هو عهد تعميم الفوضى الخلاقة والملجمومي.

مبين انو هالعهد هو عهد تفريخ الميليشيات وتعميم موضة الإستعراضات العسكرية.

مبين انو هالعهد هو عهد تغييب الدولة وعهد اكمال حزب الشيطان سيطرته على الطوائف والمذاهب والساحات كلها..

مبين انو هالعهد هو كمان عهد الفيتوات والتحجيم وتفقيع وتنفيس البالونات المنفوخة … وعهد اليالي الملاح..

واكيد هيدا كله ماشيي اموره  تحت راية الرئيس القوي.. ورئيس استعادة الحقوق!!

السؤال هو قوي عم مين ووين وكيف.. طمونوننا طمنكم الله..!!

**الكاتب ناشط لبناني اغترابي
عنوان الكاتب الألكتروني
phoenicia@hotmail.com