خضر سلامة للسيد حسن: أوقف السرقة والنهب في حزب الله

302

خضر سلامة للسيد حسن: أوقف السرقة والنهب في حزب الله

http://www.timesoflebanon.co/?p=35579

موقع جنوبية/نشر الناشط والمدون خضر سلامة رسالة على الفايسبوك وجهها إلى الأمين العام لحزب الله السيد حسن نصر الله، بعد نشر جريدة “الأخبار” مقابلة مع السيد. ووجّه سلامة عددا من الاسئلة إلى نصر الله تتركّز حول بيئة حزب الله واحوال جمهور الحزب اقتصاديا واجتماعيا وسياسيا..

صباح الخير يا سيد حسن، خبرونا جماعة الأخبار أنك عم تتابع فيسبوك، ولأني بشوفك انسان عادي، مثلنا مثلك مفروض، لا موكل من الرب ولا نازل فيك نص بأي دين سماوي، حبيت احكيك لأني بحبك، واكتبلك لأني مواطن لبناني، للأسف مش مؤمن، بس وحياتك بحب كل واحد ضد اسرائيل، وانتَ، اذا استثنينا كتاب جريدة الحياة والفان كلوب تاع داعش، كل الناس بتعرف أنك ضد اسرائيل. بس بدي أسألك كم سؤال:

1. هلق انت بتعرف يا سيد، أنو انا من جيل تربى وقت كانوا شباب حزب الله من الناس وللناس؟ بذكر كانت النكت على شباب حزبك، ع سياراتهم المكسرة، وقديش بيخدمو الناس، تتذكر جرافات جهاد البناء أول التسعينات؟ خزانات المي تاع ابو الفضل العباس بالضاحية؟ هيديك الأيام الحلوة؟ هول الشباب بعدهم نضاف، وبعدهم فقرا، واهلهم كمان، وعم بقاتلو هني ومآمنين بكل قضية، منآمن نحن كمان بجزء كبير منها، بس في تجار فاتوا عالخط، ولابسين بدلات رسمية، مش عسكرية. ايه، إذا ما بتعرف، اليوم أي مواطن فقير عادي بالضاحية، مش مسنود من مسؤول كبير حزبي، بدو ألف واسطة ليلاقي تخت بمستشفى “اسلامي”، أو قريب من الجو، مش بس هيك، بدك تدفع المعلوم لتفوت، وإلا، مثلها مثل أي مستشفى تانية بتكبك برا. وبتعرف قديش صارت أقساط المدارس الإسلامية؟ عم تتابع لوايح الأسعار؟ طب أنا بعرف أنو السيد هادي – شهيدنا جميعا، والسيد جواد، درسوا بمدرسة قريبة من الجو الي عم بحكي عنه، عندك فكرة قديش صارت الأقساط بالضاحية؟ انت بتقبل يا سيد؟

2. يا سيد حسن، من عام 1992 نواب حزبك الكرام، استلموا تمثيل مناطقهم تماماً، البقاع والجنوب والضاحية وجرود جبيل، وطبعاً ما في أمل بأي قانون طبيعي يسكر الاحتكار وبالأخير هيدا حقكم، لأن أي حزب طبيعي بالعالم بحب يحافظ ع سلطته. بس بحياة أغلى الناس عندك، بتعرف كم ساعة بتجي الكهربا بهيدي المناطق؟ طب بتعرف كم يوم بتجي المي بالأسبوع؟ انت بتقبل انو يكون النائب تاع منطقتك عم يتصدى للمؤامرة الصهيونية والكهربا مقطوعة ببيتك من أسبوع؟ شو شغلة النائب يا سماحة السيد؟ وحياتك نحن منحب نصمد، بس انو ما فينا نصمد ع ضو؟ ضروري نقضيها ع عتمة؟ ما بيطلعلنا كمواطنين، حضرتك بتمثلهم بالبرلمان عادة لأسباب تتعلق بالجغرافيا السياسية والطائفية، حدا يحكي باسمنا عن أمورنا اليومية العادية؟ مؤسساتكن اللي كانت لخدمة المستضعفين صارت للربح التجاري، مش مشكلة هيدا قدر أي شركة.. طب المؤسسات الرسمية الي بمناطق نوابكم؟ المستشفيات الرسمية والمدارس الرسمية؟ هول ضروري يضلو مهملين للواحد يعوزكم؟ هيدي لعبة السياسة بعرف.. بس انو، البشر كمان بشر.

3. ليك يا سيد، اذا بتشقلب منيح بالفيسبوك، رح تكتشف انو الي بحبوك كتار، شيوعيين وقوميين سوريين وعرب، في شيعة كتير بحبوك صحيح، بس والله في سنة وفي مسيحيي وحسب ما بعرف في يهود كمان بحبوك، وفي كفار بحبوك، هيدي ما تنساها، غيرك نساها، وجمهورك المباشر كمان، نساها، أنا لا بدي ياك تكون ع يمين المهدي، ولا بفكر اذا انت ح تستقبل المسيح او لاء، انا بعرف انك زلمة بتحسبله اسرائيل ألف حساب، وبحبك وبيتشكك بموقفنا وبعلمانيتنا يومياً، لأنو منحبك، هيدي اذا انت بتعرفها، بكون ممتاز، جمهورك مش ح يعرفها ومش ح يفهمها.

4. بدي اسألك، شي مرة سامع لأم كلثوم؟ أنا مأكد أنك سامع كم غنية، ومش عيب، هيدا دليل أنك انسان، وما بعتقد بعد حدا بالكوكب قرر انك معصوم، مشكلة الناس المؤمنين ببلادنا يا سيد، انو مفكرين الي بيعمل معصية، بيسمع غنية أو بيشرب كاس أو بتلبس قصير أو ما بصلي وما بصوم، بكون عمل شي عار، شي فضيحة، بعدن مش عارفين كيف يعني الله رحمن رحيم، يمكن لأن ما شافوه، وانا ما شفته، بس انت بتعرف، خبرن طيب، قلن للمؤمنين يحلو عن رب الكفار، وكل واحد يعيش ع راحته، انت بتقبل حدا بشي ضيعة يقرر يمنع الموسيقى بالضيعة؟ او يمنع الكحول بمطعم قريب؟ هيك بتقبل ولو حالات هون وهون؟ هول الاشيا الصغيرة، مش تفاصيل، هول أساس.

5. شو بدك بالي عم يحكو ليفشو خلقن، لاء انت مش حالش، ومش متلك متل داعش، هول عم يحكو لأن ما عاد عندن كتير اشيا يحكوها، بس حاول ما تصير متل داعش يوما ما، مش ضروري كل الناس يفكرو متل حزب الله، ليكونو ضد اسرائيل، ولا ضروري كل الي ضد اسرائيل يعني بفكرو متل حزب الله. يطول بعمرك بس وحياتك انا عم شوف الرانجات موديل السنة الي نازلة عالسوق، وحجاب الحرير الي بألف دولار، وعم نسمع عن سمسرات، صفقات ادوية واختلاسات بمؤسسات اجتماعية وتبييض اموال ببنوك خاصة، طب هول معليش؟ مش انت من جيل حزب المستضعفين؟ مش انت ابن الجنوب، بس تربيت وكبرت بالبقاع؟ بتعرف انو ابن البقاع الي ما عنده فرصة يتفرغ بالحزب، يا إما بروح عالجيش يا إما بيشتغل ع الفان يا إما بفوت عالحبس؟ هيدا برقبة مين يا سماحتك؟ هلق انت ايمتى آخر مرة سمعت تصريح لنائب عن هيديك المنطقة؟

6. عم تقاتل بسورية من سنتين، بيني وبين حالي بعرف انو لو ما عم تقاتل، داعش كانت صارت ع باب بيتي، والله يرحم الي عم يموتوا بكل الاحوال، الحرب انت قلت انها مش ح توصل ع محل.. ع كل، اذا خلصت الحرب، او قبل ما تخلص، تتذكر بس حكيت عن أبو حسن سلامة؟ الشهيد الي اغتالته اسرائيل، وشو صار فيه بس كان معتقل عند النظام السوري؟ عم تتخايل انو في آلاف اليوم عم بصير فيها هيك، انسى داعش والنصرة والجيش الحر ومدري شو، عم بحكي عن الناس، عن ناس بيكتبو وبيرسمو وبفكرو، هول ناس مات نصهن تحت التعذيب بالمفرق، شو بدي بحكي انو نظام ممانع ومقاوم، هيدا النظام متل بورصة وول ستريت بتطلع كرامته وبتنزل حسب الثمن، عم بحكي عن غير شي، عن ناس عاديين، هول الناس كتير منهم بالحبس يا سماحتك، وكتير منهم هرب لأن الحبس ناطره، هول حكيات ما بصدقوهن جماعتك بس انت بتعرفهن انو مزبوطين، وانو هول الناس بالذات مش مؤامرة ولا خصن بالمؤامرة، وانو هيدا النظام لو جيت للجد وتركته ع الناس العاديين، ممكن يحط داعش بجيبته.. احكي فيهن لهالناس، لأن هول ما الهن حدا، لا النصرة رح تخطف حدا كرمالهم، ولا الأمم المتحدة رح تدخل كرمالهم، هول شباب عاديين، كانو عم يحلمو بوطن، لا في نصرة وداعش، ولا في أسد ومخلوف، يمكن احلام طفولية بعصر سايكس بيكو الجديد، بس احلام بريئة يا سيد.

ويعطيك العافية.