جورج يونس/عندها لن ينفع البكاء على الاطلال وتكون إنتهت سكرت غوغائية الترشيحات وانعدام الافق

54

عندها لن ينفع البكاء على الاطلال وتكون إنتهت سكرت غوغائية الترشيحات وانعدام الافق
جورج يونس/فايسبوك/14 نيسان/2022

حدا عم يشَرِحْ ويحلل بالعمق لوائح الثورة؟
حدا بيعرف الأشخاص بالمباشر وبالشخصي وبدون عاطفة او إحتك معهم ومع قصصهم بالعمق؟
حدا عندو خلفية حقيقية عنهم غير إنهم حاملين علم الثورة؟
حدا مستوعب سر ترشح اكثر من 600 شخص محسوبين او حاسبين حالهم عالثورة وسر ال 71 لائحة من اصل ال 103 بدون ما ننسى الثوار المرشحين ع لوائح الاقطاع والاحزاب؟
حدا بيعتبر كثرة الترشيحات الما منعرف منين جايي وكيف تأمنلها رسم الترشيح لعبة بريئة؟
حدا بيفهم ليش كثار من اللي كنا معتبرينهم رموز للثورة راحو تعمشقو بلوائح الاحزاب والاقطاع؟
حدا انتبه إنو فيه لوائح للثورة اعلن عنها ونزلت تشكيلاتها وصورها وبعدين لما صدرت اللوائح النهائية تفاجأنا إنها غير المعلن عنها بالاساس والمرشح اللي كان مثلاً ع لايحة قادرين او ملحم خلف او سوا او غيرهم صار بمحل ثاني والعكس صحيح؟
حدا سأل ليش كل هالفوضى وليش كل هالشي عم بصير بهالشكل؟
حدا متذكر إنو نحن عم نتعاطى مع مجرمين قتلو الثوار وطيرولهم عيونهم وفجرو بيروت ودفنو الحقيقة وسرقو ايداعات الناس وذلوهم بتعبهم ولقمة عيشهم، وإنو نحن مش بأوروبا لتتغير الامور بالديمقراطية الشفافة في ظل الفوضى وطغمة المافيا والميلالية، وتحكمهم بالقانون بكل مفاصل اللعبة والوطن؟
حدا فايق انو كثير من صناديق تصويت المغتربين بال 2018 ما وصلت لليوم ع بيروت حسب تصريح وزير الداخلية السابق مروان شربل؟
حدا مش شايف الفيديو المرفق لتبديل الاصوات بإنتخابات ال 2018 بعد ما الناس صوتت؟
حدا بيعرف إنو مشاركة المجتمع المدني بال 2018 لم تقنع 52% من الناس بالمشاركة؟
حدا ملاحظ إنو تشرذم المجتمع المدني بال 2022 هو اكبر بكثير مما كان عليه بالانتخابات الماضية وهل حدا عم بقدر خطورة هيدي اللعبة واسبابها وخلفياتها؟
حدا اكتشف إنو العديد من الاسماء البارزة بالثورة عندها ارتباطات وتحالفات مبطنة ومتنوعة مع إحترامي لقناعات الجميع؟
وعليه، اذا كنا نحن من الاساس ضد كل المنظومة كيف منقبل نشارك معها بالسلطة وبالانتخابات بظل قانون هني مركبينو وكيف ممكن نتوقع نتائج مختلفة؟ ما جرب البعض من الكانو محسوبين عالثورة حكومة حسان دياب ونجيب ميقاتي وشو كانت النتيجة؟
حسب خطة المنظومة المتحكمة بمصيرنا ومصير الوطن، نحن امام لعبة خطرة، خصوصا مع تحكم المافيا بكل حنايا اللعبة الانتخابية بموجب قانون مفصل حسب حصصهم ومصالحهم، ومع غياب اشراف مؤسسات المراقبة الدولية الفاعلة. فقد قامت السلطة بزرع ريح التشرذم لتحصد الثورة ولوائحها والشعب الموجوع العواصف، فتأتي النتيجة بعد 15 ايار شرعية قانونية دستورية للمنظومة المحكومة بهيمنة السلاح وارادة المحتل.
في ذلك الحين، ستكون حجتهم تجاه الثورة وغضب الناس، إنتم هوبرتم وطالبتهم بالانتخابات وانتم خسرتموها بالأغلبية لصالح نفس التركيبة القديمة ولو مع بعض التعديلات “من رتبة لزوم ما لا يلزم”، وعليكم الصمت وتقبل خيارات الناس والشرعية الموثقة. عندها لن ينفع البكاء على الاطلال وتكون إنتهت سكرت غوغائية الترشيحات وانعدام الافق.
اللي تعود ع جزمة المحتل ما بقى يعرف معنى الحرية!
#لبنان_تحت_الاحتلال #انا_مقاطع #راجعين #المنظومة #انا_او_لا_احد