الياس بجاني: تعليق على موقع “قوات الحكيم” للأخ شارل جبور وقراءة سياسية هادئة وموضوعية في محتوى التعليق

2996

مشكلة عويصة مع “قوات الحكيم” ومع رئيسها ومع اعلامها وهي أنو الناس بمفهومهم بسطاء وممكن يصدقوا كل شي ع العمياني

الياس بجاني/23 أيلول/17

خيي شارل:
هلق طلعت معك انو قرنة شهوان خلقت على خلفية اعتقال الحكيم وبنتيجة تأثير الإعتقال على مجتمعنا وعلى الشباب من مؤيديه بشكل محدد؟؟
نظرية جديدة وملفتة وفعلاً تستحق الدراسة..

وع فكرة يلي كتب بيان المطارنة الموارنة هني فارس سعيد وتوفيق هندي وسمير فرنجية ومعهون مجموعة من السياسيين والكتاب والإعلاميين وليس سيدنا البطريرك صفير….

أما عن مواقف وزراء القوات داخل الحكومة من ملف الكهرباء والبطاقة البيامترية..
فمنك غلطان أبداً..
ولكن بربك هل هذه ملفات استراتجية ولها تأثير سلباً أو إيجاباً على احتلال حزب الله؟

على العكس تماماً فحزب الله بالحكومة عم يتناغم مع معظم مواقف القوات المعيشية واللا استراتجية وع المكشوف
وهذا ذكاء ودهاء من قيادته هدفه الإلهاء عن ملف احتلاله وهو يحقق هذا الهدف بإمتياز وخصوصاً في اعلام القوات ومعكم شخصياً…
وهذا بالتحديد ما هو حاصل وللأسف انت تعتبره انجاز!!.

يبقى أن المواقف الكاشفة لموضوع التوطين ومحاولات ربع الممانعه تفسير كلام ترامب بما يخدم المخطط الإيراني فهي مواقف لم تكن فقط من القوات ولكن من أكثرية القوى السيادية الحالية والسابقة (وفهمك كفاية عن من هي السابقة على الأقل في مفهومنا السياسي) ..
وأيضاً جاءت من مغتربين لبنانيين ناشطين في اميركا (وليد فارس وتوم حرب) ومن السفارة الأميركية التي وضحت حقيقية موقف ترامب..

وبالتالي مش صحيح ان هذا الكريدت (الفضل) يعطى فقط للقوات ويعتبر من انجازاتها..

وفي موضوع التنسيق مع الحكم في سوريا ..
فالتنسيق لم يتوقف في أي يوم وها هو حبيبكم الصهر جبران وبطلب شخصي منه التقى وليد المعلم والمسؤولين الإيرانيين.
وفي نفس الوقت القوات لم تعترض داخل الحكومة على تعيين سفير للبنان في سوريا!!

وكمان المجلس السوري اللبناني الأعلى ورئيسه القومي السوري (نصري خوري) في احلا حالاتون..
والشخ نصري كل يوم عندو اجتماعات مع المسؤولين من الرئيس وبالنازل..
خيي شارل اعزموه عا معراب وخالي الشغل ع المكشوف.. بيكون احسن وفيه مصداقية..

وكمان وزراء الممانعة بالحكومة رايحين جايين ع الشام والإجتماعات ع المكشوف وكمان توقيع الاتفاقات..

وما تنسى خيي شارل انو رفيقكم والشريك في النوايا وفي “أوعا خيك” حبيبكم وحبيبنا الوزير بيار رفول زائر دائم لعاصمة الأمويين..

في الخلاصة ما في ريحة التوازن في الحكومة بكل ما هو استراتيجي..
ونعم وزراء القوات الثلاثة هني سوبر ممتازين وعم ينجزوا..
ولكن في كل ما هو غير استراتيجي وهذا أمر يشجعه حزب الله ويباركه ويسوّق له.

خيي شارل في مشكلة عويصة مع قوات الحكيم ومع الحكيم شخصياً ومع اعلام القوات يلي حضرتك مسؤول عنو..
المشكلة هي أنو الناس بمفهومهم هني معترين وما بيقروا وما بيعرفوا التاريخ وبسطاء وممكن يصدقوا كل شي وع العمياني..
ومنضل نبيعون قصة ال 11 سنة سجن ونربحون جميلي….!!

غلطانين كتير خيي شارل ولك محبتي وكل التقدير الكبير على مجهودك الإعلامي المميز والعالي النبرة ولكن ..ما تزعل…العكاظي في عدد كبير من جوانيه..!!!

لمشاهدة تعليق الأخ شارل جبور اضغط على الرابط  هنا أو في أسفل (3 أحداث… والقوات هي هي)

3 أحداث… والقوات هي هي