الياس بجاني: عهد تعتير وكوارث من قبل ما يبلش بنهجه وفكره والخطاب

79

عهد تعتير وكوارث من قبل ما يبلش بنهجه وفكره والخطاب
الياس بجاني/12 حزيران/17

عهد تعتير وكوارث من قبل ما يبلش بنهجه وفكره وربعه والخطاب،
وما في شي راح يتغير إلا من السيء للأسوأ.. وع الأكيد..الأكيد…
ربنا يحمي لبنان وشعبه من عهد ما إلتزم ولا بعهد ولا بوعد ولا بشعار.
أما قانون الانتخاب فراح يمرق بعد ما خلصت مسرحياتون النفاق والدجل…
هودي يلي عاملين البلد مزرعة خاصة فيون هم شركاء في تجويع واذلال وتهجير الشعب اللبناني..
هودي السياسيين المرتين وأصحاب شركات الأحزاب المقلعطين فصلو قانون الانتخاب على مقاسون وتحت مظلة حزب الله وغب فرماناته وراح يمرقوه اليوم أو بكرا..
راح يمرقوه على الأكيد لأنو ابليس ما بيخرب بيته..
ونعم، المهم يجي الصهر ع المجلس ويصير نايب…
بالحقيقة، المصيبي مش بالسياسيين والأحزاب بس،
المصيبي هي بشريحة الأغنام من شعبنا القبلانيين بوضعية الهوبرجية والزلم والزقيفي.. ومنون كتير عايشين ببلاد الإنتشار
من هودي الزقيقة منون صاروا وزراء ونواب، ومنون عم يسنوا سنانون تا يتعينوا سفرا ويجو نواب..
وجعي ع بلد مذبوح،
وجعي ع بلد احزابه شركات تجارية،
وجعي ع شريحة من شعبنا ما بتعرف إلا البواب الواسعة، وضاربها عمى البصر والبصيرة..
وجعي ع طقم سياسي وحزبي ما عندو ولا ذرة إيمان، وفاقد الرجاء وما بيخاف ربه..
وعلى الأكيد والشي مليون أكيد إذا قضاة الأرض ما قدروا يعملوا واجباتون ويقاصصوا الكفرة، والمارقين والظالمين ويلي سرقوا مال الأرملة واليتيم..
فقاضي السماء قادر وما في مهرب من عدله ومن يوم حسابه…
وعلى الأكيد الأكيد عدل السماء آت لا محالة…
وخبز بدها تاكل حني من هيك معاجن تنك ومفختي…